სამართლდამცველებმა იარაღი ცინცაძის საქათმის ბუდეში, კვერცხებთან ერთად იპოვეს.
იმ დროს, ცინცაძე “რესპუბლიკური პარტიის” ჩოხატაურის ორგანიზაციის ახალგაზრდული ფრთის ხელმძღვანელი იყო. მისი დაკავება თავიდანვე შეფასდა ოპოზიციონერებზე ზეწოლად და ცინცაძე პოლიტპატიმრების სიაშიც მოხვდა. მით უმეტეს, რომ სწორედ მამუკა ცინცაძე იყო, გოჯა ჯიქიას საქმის ერთ-ერთი მოწმე _ ხელისუფლების მიმართ ოპოზიციურად განწყობილი და 7 ნოემბრის აქციის აქტიური მონაწილე გოჩა ჯიქია, ჩოხატაურის ცენტრში, 2007 წლის, 26 ნოემბერს, დაახლოებით, სამი საათისთვის მაშინ დააკავეს, როცა ჯიქიას არასრულწლოვანი შვილები გამოჰყავდა საბავშვო ბაღიდან. მანქანის ჩხრეკისას, პოლიციელებმა ტროტილი აღმოაჩინეს და შესაბამისად, სისხლის სამართლის საქმე აღძრეს. ჯიქიას პროცესზე, პოლიციელების გარდა, ორი მოწმე დაიკითხა _ ერთ-ერთი იყო მამუკა ცინცაძე, რომელიც იმ მომენტში გოჩა ჯიქიასთან ერთად იმყოფებოდა და რომელსაც, მიუხედავად მრავალმხრივი ზეწოლისა, ვერ დაადასტურებინეს, რომ ჯიქიას მანქანაში მართლაც ჰქონდა ტროტილი.
შემდეგ იყო აპრილის საკნების აქციები, სადაც მამუკა ცინცაძემ, თანაგუნდელებთან ერთად, პრეზიდენტის გადადგომის მოთხოვნით რამდენიმე დღე გაატარა.
მართალია, მას შემდეგ რამდენიმე წელი გავიდა, თუმცა, ცინცაძის საქმეზე განაჩენი ამ დრომდე არ დამდგარა _ ათეულობით სასამართლო პროცესი სხვადასხვა მიზეზით გადაიდო.
მამუკა ცინცაძის ინტერესებს დაკავების დღიდან “ახალგაზრდა იურისტთა ასოციაციის” ადვოკატი, ჯაბა ზერეკიძე იცავს. სულ ცოტა ხნის წინ კი, ცინცაძემ, რომელიც დღემდე ამტკიცებს, რომ იარაღი ჩაუდეს, საქმის ხელახალი გამოძიების მოთხოვნით მთავარ პროკურატურას მიმართა.
ამ დრომდე უცნობია, დაიწყო თუ არა საქმეზე ხელახალი გამოძიება, თუმცა, “გურია ნიუსმა” ერთი საინტერესო დეტალი აღმოაჩინა, რომელიც იურისტების თქმით, ცინცაძის საქმეს შესაძლოა საფუძვლიანად შეცვალოს.
როგორც გავარკვიეთ, იარაღი, რომელიც მამუკა ცინცაძის საქათმის ბუდეში სამართალდამცველებმა აღმოაჩინეს, შინაგან საქმეთა სამინისტროს საინფორმაციო ანალიტიკური ცენტრის დასკვნის თანახმად, იდენტურია სოფელ ვანზომლეთის სკოლაში 1992 წელს დაკარგული იარაღისა. უფრო დაზუსტებით კი ორივე იარაღის ნომერი ერთი და იგივეა.
თუმცა, ეს ყველაფერი არ არის _ ჩვენ ისიც გავარკვიეთ, რომ სკოლიდან იარაღის მოპარვაში ერთ-ერთი ეჭვმიტანილი, ამავე სკოლის მოსწავლე გოჩა თავაძე იყო, რომელიც დღეს ჩოხატაურის პოლიციის უფროსის მოადგილეა. ცინცაძის დაკავების დროს, თავაძე იმავე თანამდებობაზე მუშაობდა.
ის, რომ სკოლიდან იარაღის მოპარვის საქმეში ერთ-ერთი ეჭვმიტანილი იყო, ჩვენთან საუბრისას გოჩა თავაძემაც დაადასტურა:
_ იმ დროს 15 წლის ვიყავი. ძალიან ბევრ სკოლაში გაიძარცვა სამხედრო კაბინეტები და გაიტანეს იარაღები. თითქმის მთელი კლასი დაგვიბარეს დაკითხვაზე, თუმცა, რაც არ მქონდა ჩადენილი, ის ვერ დამიმტკიცეს.
_ ბატონო გოჩა, ხომ არ აგვიხსნით, 1992 წელს დაკარგული იარაღი, რომლის მოპარვაში ერთ-ერთი ეჭვმიტანილი იყავით, როგორ აღმოჩნდა ოპოზიციონერის სახლში, რაც ბევრ კითხვას აჩენს?
_ ნამდვილად არ ვიცი. ეს საქმე დიდი ხანია დახურულია. მაშინ ბევრი სკოლა გაიძარცვა. ქობალიას რაზმებმა ბევრი იარაღი გაიტანეს.
_ გინდათ გვითხრათ, რომ ქობალიას რაზმების მიერ მოპარული იარაღი 20 წლის შემდეგ, ისევ ჩოხატაურში, ცინცაძის საქათმეში აღმოჩნდა?
_ მე არ ვიცი, ვინ და რა მოიპარა, მაგრამ ის ვიცი, რომ ცინცაძის სახლიდან ყველა კანონის დაცვით ამოიღეს იარაღი ოპერატიული ინფორმაციის საფუძველზე. მასე ჩოხატაურში დაახლოებით 1000 ოჯახიდან იქნა ამოღებული უკანონო იარაღი.
_ 1000 ოჯახიდან? გამოდის თითქმის მთელი ჩოხატაური კრიმინალი ყოფილა…
_ დაახლოებით ასეთი ციფრია…
_ პოლიციელი ბრძანდებით და იცით, საქმე როგორ იხსნება. ისიც იცით, რომ თავიდან ყველაფერი ეჭვით იწყება. შესაბამისად ეჭვები, რომლებიც ამ ფაქტს ახლავს, არ უნდა გაგიკვირდეთ…
_ თქვენ როგორ ფიქრობთ, 15 წლის ბავშვი, შევძლებდი იმხელა სეიფების გატეხვას? რა სისულელეა…
_ იარაღი, რომლის მოპარვაში ერთ-ერთი ეჭვმიტანილი თქვენ იყავით, საკმაოდ დიდი ხნის შემდეგ აღმოჩნდა ოპოზიციონერთან, რის გამოც ის დააკავეს და თქვენ ამ დროს პოლიციის უფროსის მოადგილე იყავით…
_ პოლიციის უფროსის მოადგილე ნამდვილად ვიყავი. რაც შეეხება ვანზომლეთის სკოლიდან იარაღის მოპარვის ფაქტს, ეს საქმე დიდი ხანია დახურულია.
_ დაზუსტებით ვიცით, რომ ეს საქმე მამუკა ცინცაძის დაკავების შემდეგ დაიხურა.
_ არა, უფრო ადრე.
_ მამუკა ცინცაძის საქმეში მოწმეებად მხოლოდ პოლიციელები ფიგურირებენ. მხოლოდ მათ დაინახეს სად იყო იარაღი. ესეც ბევრ კითხვას ბადებს.
_ ჩხრეკას სხვების ესწრებოდნენ და სასამართლოზე პოლიციელების დაკითხვას, რომლებიც ჩხრეკას აწარმოებდნენ, კანონი ითვალისწინებს…
_ კანონი იმასაც ითვალისწინებს, რომ იარაღის ჩადება დანაშაულია და ამის ჩამდენმა პასუხი უნდა აგოს. სხვათა შორის, ცინცაძემ საქმის ხელახალი გამოძიების მოთხოვნით პროკურატურას უკვე მიმართა. მართალია, თანამდებობის შენარჩუნება მოახერხეთ, მაგრამ როგორ ფიქრობთ, ამ საქმის გამოძიება ისე დასრულდება, რომ რთულ კითხვებზე პასუხის გაცემა არ მოგიწევთ? მით უმეტეს, რომ ეს, რაზეც ახლა ჩვენ ვისაუბრეთ, ის დეტალია, რომელიც ამ დრომდე უცნობი იყო…
_ ამით დავასრულოთ ეს საუბარი, _ გვითხრა თავაძემ, ტელეფონი გაგვითიშა და კითხვა, რა ძალებით მოახერხა პოსტის შენარჩუნება იმ დროს, როცა წინასაარჩევნო პერიოდში, თავის უფროსთან, ტატო ვასაძესთან ერთად (რომელმაც, თავაძის მსგავსად, არჩევნების შემდეგაც შეინარჩუნა თანამდებობა) “ნაციონალების” გასამარჯვებლად ყველაფერს აკეთებდა, უპასუხოდ დატოვა.
