მინისტრი აცხადებს, რომ დღეს სასჯელაღსრულების სისტემის უმთავრესი გამოწვევა ჯანდაცვის პრობლემის გადაჭრაა.
ახალ ხელმძღვანელობას წლობით დაგროვებული და გადაუჭრელი პრობლემების მოგვარება უწევს,რაც არც ისე იოლია.მინისტრის თქმით, დღეს უკვე შეუძლებელია იმ პაციენტების ციხის პირობებში განკურნება, რომლებსაც წლების განმავლობაში არ მკურნალობდნენ. მინისტრი ციხის რესპუბლიკური საავადმყოფო გადატვირთულობაზეც მიუთითებს. საწოლები ძირითადად იმ ადამიანებს უკავიათ, ვისი გამოჯანმრთელებაც ციხის პირობებში პრაქტიკულად შეუძლებელია. შესაბამისად, პრობლემად რჩება საავადმყოფოში ახალი პაციენტის შეყვანა. სასჯელაღსრულების მინისტრმა პრეზიდენტ სააკაშვილს უკვე მიმართა თხოვნით და მძიმედ დაავადებული პატიმრების შეწყალება თხოვა.
“ესენი ის ადამიანები არიან, რომელთა მკურნალობაც შეუძლებელია ციხის პირობებში და რომლებიც სწორედ მათი ჯანმრთელობის მდგომარეობის გამო არანაირ საფრთხეს არ უქმნიან საზოგადოებას,”_ აცხადებს სუბარი და იმედი აქვს, რომ უახლოეს ერთ-ორ კვირაში დაახლოებით 120 მძიმედ დაავადებული პატიმარი ოჯახს დაუბრუნდება.
გადატვირთულობის გარდა, ციხის საავადმყოფოს სერიოზული ტექნიკური პრობლემაც აქვს. მინისტრის თქმით, სამედიცინო აპარატურა ან გაფუჭებულია ან გაძარცვული.
“რენტგენის აპარატს, რომელიც საავადმყოფოში დგას, ნაწილები აკლია და მისი ყიდვა გერმანიაში მოგვიწევს. უფუნქციოა სხვა დანადგარებიც, ისეთი ელემენტარული პროცედურისთვისაც კი, როგორიცაა რენტგენის გადაღება, ექოსკოპია ან სისხლის ანალიზი, პატიმარი ციხის გარეთ გაგვყავს.
მინისტრი ამბობს, რომ რომ მოკლე დროში შეუძლებელია ყველა პრობლემის გადაჭრა, თუმცა უკვე მოხერხდა შიდა რეფერალის სისტემის ამოქმედება და გარე ჯანდაცვასთან ურთიერთობის სწორი ფორმის ჩამოყალიბება.
დაახლოებით 2 თვეში ექსპლუატაციაში შევა ტუბერკულიოზის ახალი ცენტრი, რომელიც ძველმა ხელისუფლებამ ზარზეიმით გახსნა, თუმცა როგორც აღმოჩნდა სარემონტო სამუშაოები ბოლომდე მიყვანილი არ ყოფილა.
ერთი თვე გვინდა, რომ შენობის რემონტი დასრულდეს, კიდევ 1 თვე დასჭირდება აუცილებელი სამედიცინო დანადგარების შემოტანას. იანვრის ბოლოს, ტუბერკულოზის ახალი საავადმყოფო, რომელიც მართლა უმაღლესი სტანდარტის არის, სრული დატვირთვით ამოქმედდება”_ აცხადებს მინისტრი სუბარი.
