“გურია ნიუსს” ეს ინფორმაცია მთავარ პროკურატურაში დაუდასტურეს.
პარალელურად, თბილისის საქალაქო სასამართლოში ლოპოტას ხეობაში დაკავებული ახმედ ჩატაევის საქმის განხილვა გრძელდება. მოწმეთა გამოუცხადებლობის გამო, პროცესი დღესაც გადაიდო. პროკურატურა, ყოველგვარი დასაბუთების გარეშე, უკვე მეხუთედ აცხადებს, რომ პროცესზე მოწმეების წარმოდგენა ვერ მოახერხა. ბრალდების ძირითადმა მოწმეებმა _ მესაზღვრეებმა, რომლებიც ამტკიცებდნენ, რომ ლაფანყურში ხელყუმბარებით შეიარაღებული ახმედ ჩატაევი ნახეს, მოგვიანებით ჩვენება შეცვალეს და ძველი პროკურატურის მხრიდან გახორციელებულ ზეწოლაზე ალაპარაკდნენ. მათი ჩვენება მხოლოდ მედიასაშუალებებით გავრცელდა და სასამართლომდე დღემდე არ მისულა. ჩატაევის ადვოკატი ნინო ანდრიაშვილი ამბობს, რომ ლაფანურის საქმეზე დაკითხულმა მესაზღვრეებმა ჩატაევის სასარგებლო ჩვენება მისცეს, თუმცა ოფიციალური ჩვენება ჯერჯერობით არავის მოუსმენია და უნახავს.
ადვოკატი ანდრიაშვილი ეჭვობს, რომ პროკურატურა მიზანმიმართულად აჭიანურებს საქმის განხილვას, რაც, დიდი ალბათობით, ლაფანყურის სპეცოპერაციის საქმეს უკავშირდება: “მოგეხსენებათ, ლოპოტას საქმესთან დაკავშირებით ცალკე მიმდინარეობს გამოძიება. იქ ჩატაევი მოწმის სახით არის დაკითხული. ჩემი ინფორმაციით, ასევე დაკითხულია არაერთი ადამიანი და ამ დაკითხვებით ვლინდება არაერთი დანაშაული. თავისთავად, პროკურატურის ინტერესია, რომ ის საქმეები და საკითხები ამ პროცესზე არ გაჟღერდეს. ბუნებრივია, რომ ადვოკატების მიერ დასმული შეკითხვებიდან ბევრი დანაშაული გამოაშკარავდება. პროკურატურას კი სურს, რომ გამოძიებას ხელი არ შეეშალოს, რაც მათი მხრიდან სწორი პოზიციაა, მაგრამ ჩვენ რას გვერჩიან და ტყუილად რატომ დაგვატარებენ სასამართლოში ყოველ ორ კვირაში ერთხელ?! ისედაც ხომ ცხადია, რომ ამ პროცესზე მოწმეებს იქამდე არ დაკითხავენ, სანამ ლაფანყურის საქმესთან დაკავშირებით არ მიიღებენ გადაწყვეტილებას.”
ჩატაევის ადვოკატი მიიჩნევს, რომ ლაფანურის საქმის შინაგან საქმეთა სამინისტროსთვის გადაცემა იმ ვითარებაში, როდესაც არაერთი ყოფილი და მოქმედი სამართლადამცავის ბრალეულობა იკვეთება, აშკარა ინტერესთა კონფლიქტია: “მიუხედავად იმისა, რომ გამოძიებას კვლავ მთავარი პროკურატურა კურირებს, მიმაჩნია, რომ საქმის შინაგან საქმეთა სამინისტროსთვის გადაცემით, აშკარა ინტერესთა კონფლიქტთან გვაქვს საქმე. ვფიქრობ, რომ საკმარისი იქნებოდა მთლიანად პროკურატურას ეწარმოებინა გამოძიება და არა შს სამინისტროს, ვინაიდან საუბარია კუდ-ის თანამშრომლებზე, რომლებიც მხილებულები არიან უკანონო ქმედებებში და მათ, ადრე თუ გვიან, ბრალი უნდა წაეყენოთ.”
საქმის უსაფუძვლოდ გაჭიანურების გამო, ადვოკატი შიშობს, რომ მოწმეებზე კვლავ ზემოქმედებას მოახდენენ და შესაძლოა, მათ ისევ შეცვალონ ჩვენებ: “ამის საფრთხე ნამდვილად არსებობს, რადგან დღეს ჩვენთვის მხოლოდ ცნობილია მესაზღვრეების ის ჩვენება, რაც მედიით ვიდეო და აუდიო ჩანაწერების სახით გავრცელდა და არ ვიცით რას აკეთებს პროკურატურა. შესაძლებელია მათზე ზეწოლაც მოხდეს და გადაათქმევინონ ძველი ჩვენება”.
დღევანდელ სასამართლო პროცესს ახმედ ჩატაევიც დაესწრო, რომელიც 2 კვირის წინ, პროკურატურის შუამდგომლობით, 5-ათასლარიანი გირაოს სანაცვლოდ გაათავისუფლეს. საზოგადოების ერთი ნაწილი ფიქრობდა, რომ გათავისუფლებული ჩატაევი იმავე დღეს დატოვებდა საქართველოს და ავსტრიაში წავიდოდა, სადაც მას ლტოლვილის სტატუსი აქვს.
