ირაკლი რუხაძე: “გამოდის, რომ გამგებელი ცრუობს!”

მაგრამ თუ კარგად დააკვირდებით, ნახავთ, რომ ეს სიმშვიდე მოჩვენებითია. დღეს აქ, როგორც მთლიანად საქართველოში ყველა გაპოლიტიკოსებულია და სალაპარაკო თემა მხოლოდ პოლიტიკაა.

განსაკუთრებით დიდ ინტერესს იწვევს საზოგადოებაში გამგებლობის კანდიდატის, ირაკლი რუხაძის წარსული, მისი ამჟამინდელი საქმიანობა და სამომავლო გეგმები.

ჩვენ მას დავუკავშირდით და ის კითხვები დავუსვით, რომელიც სოციალური ქსელებით და პირადი მიმოწერებით მოგვაწოდა საზოგადოებამ.

– ბატონო ირაკლი, თქვენზე მითქმა-მოთქმა უკვე გასცდა აბაშის ფარგლებს. მოდით თანმიმდევრობით მივყვეთ. ამბობენ, რომ თქვენ კოლეჯის დირექტორობის პერიოდში არ გაეცით დიპლომები და თუ გაეცით, ისიც ყალბი.

– 1996 წელს აბაშაში გაიხსნა „ლეგია და კომპანიის“ ფილიალი. ცენტრალური კოლეჯის დირექტორი იყო ველიჯანაშვილი, რომელიც შემდეგ დეპუტატი გახდა და მისი ადგილი დაიკავა ლელა ნებიერიძემ. ამ კოლეჯმა რაიონში 6 წელი იფუნქციონირა. ჩვენ გვქონდა ხელშეკრულებები გაფორმებული „ფანასკერტელთან“, „სდასუ“-სთან და წარმატებული მოსწავლეები რეკომენდაციით მიდიოდნენ ამ უმაღლეს სასწავლებლებში. პირველ ხანებში, აბაშაში ბარდებოდა გამოცდები და დიპლომებსაც ადგილზე ვაძლევდით, შემდეგ კი გამოცდების ჩასაბარებლად მოსწავლეებს თბილისში უხდებოდათ წასვლა და უკვე იქ აბარებდნენ სახელმწიფო გამოცდებს. ვინც არ წავიდა გამოცდის ჩასაბარებლად, ბუნებრივია, დიპლომის გარეშე დარჩა, ვინც ჩააბარა სახელმწიფო გამოცდა, დიპლომიც აიღო და მუშაობს კიდეც. ასე რომ, ტყუილია რასაც ამბობენ. ნებისმიერს შეუძლია დღესაც მივიდეს არქივში და ნახოს, რომ დიპლომები არის, მაგრამ გაუცემელია, რადგან სახელმწიფო გამოცდა არ აქვთ ჩაბარებული, ისე კი დიპლომს ვერავის მივცემდით.

– რატომ დაიხურა სასწავლებელი?

– იმ პერიოდში განათლების მინისტრი კარტოზია იყო. მაშინ სასწავლებელს ყოველ სამ წელში უნდა განეახლებინა ლიცენზია. ბოლოს ლიცენზიის აღება 3 000 დოლარი ჯდებოდა და ფინანსების უქონლობის გამო ჩვენი ფილიალი დაიხურა. არანაირი დარღვევა არ გვქონია, უბრალოდ, ლიცენზიის გარეშე ვერ გავაგრძელებდით მუშაობას.

– სოციალურ ქსელებში თქვენზე ძალიან ბევრს წერენ. ერთ-ერთმა ქალბატონმა “რუსთავი 2”-საც მისცა კომენტარი და თქვა, რომ თქვენ არ ხართ ის კანდიდატურა, რომელიც გამგებლად უნდა მოვიდეს აბაშაში. ამბობენ, თქვენ ღორის გულისთვის მეზობელს ესროლეთ და კრიმინალური წარსული გაქვთ. მართლა გაქვთ თოფი და მართლა ესროლეთ იმ ქალბატონს?

– სანადირო თოფი მართლაც მაქვს და რეგისტრირებულია კიდეც. ასე რომ, ამაში არაფერია უკანონო. რაც შეეხება ამ ყბადაღებულ თემას, უბრალოდ, სასაცილოა აფიშირებისთვის. იყო ერთხელ ასეთი შემთხვევა _ ქალები წაკამათდნენ და ხომ მოგეხსენებათ ქალების ამბავი, ყველაფერს აკეთებდნენ რომ ჩხუბის საბაბი ჰქონოდათ. ერთხელ მეზობლის ღორი ჩვენს ბოსტანში იყო გადმოსული, მე თოფი ჰაერში გავისროლე პირუტყვის შესაშინებლად. იმ ქალისთვის არ მისვრია, ამას როგორ ვიზამდი, როცა ოჯახებით ბავშვობიდან სიახლოვე გვქონდა? ან რომ მესროლა, ჩვენს სახლებს შორის 15 მეტრია დაშორება და როგორ ფიქრობთ, არ მოხვდებოდა და არ დაიჭრებოდა? მე საკმაოდ კარგად ვისვრი მიზანში. ან ეს რომ სიმართლე იყოს, პოლიციაში არ მიჩივლებდნენ? უბრალოდ, თავს არ მივცემ იმის უფლებას, გავახმაურო ფაქტი, რის გამოც ის ქალბატონი ჩემზეა ნაწყენი. ეს ოჯახური ამბებია და არ ვთვლი საჭიროდ სააშკარაოზე გამოტანა ღირდეს. ასე რომ, ხმამაღლა ვაცხადებ, მე არც კრიმინალთან მაქვს კავშირი, ჩემს სიცოცხლეში არავისთვის ზიანი არ მიმიყენებია და მზად ვარ ყველას გავცე პასუხი ამ თემებთან დაკავშირებით.

– სოციალურ ქსელებში თქვენზე უამრავი კომენტარი იწერება. მაგალითად: „ირაკლი არაკომპეტენტური პიროვნებაა, სადაც იმუშავა არსად არ ივარგა თორემ ის რომ კაცური კაცი ყოფილიყო, კარგ ადგილებზე მუშაობდა. ძლივს დაიხსნა თავი რამდენჯერ ციხიდან“. რაზეა საუბარი?

– ნამდვილად ვერ ვხვდები რაზეა საუბარი, კარგი იქნება თუ დაკონკრეტდებიან და ისე დაწერენ. მე გითხარით, რომ ჩემი წარსული სუფთაა და არც კრიმინალთან მაქვს კავშირი.

– დღევანდელობას დავუბრუნდეთ. ამბობენ, რომ თქვენ მოშიმშილე მარინა ქუნთელიას გადაუხადეთ 7 დღის ფული, მერე კი ფულები შემოგელიათ და მოშიმშილეებიც ადგნენ. მართლა ასე იყო?

– ქუნთელიამ 8 დღე იშიმშილა და არ მითხრათ ახლა, ბოლო ერთი დღე გაჩუქა ან ნისიად იშიმშილაო. ამას ვინც ამბობს, არ მგონია, მას რაიმე ადამიანური გააჩნდეს. ახლა იმასაც ამბობენ, ქუნთელიამ ფული აიღო და წავიდა აბაშიდანო. ნეტავ, ეს ფულიც მე მივეცი?

– ამ კითხვებს პირადად ქუნთელიას დავუსვამთ. თქვენ ის გვითხარით, მართლა გადაუხადეთ მოშიმშილეებს ფული?

– არა, ეს ბრალდებაა და შეურაცხყოფაა იმ ქალების მიმართ. ვინც იმ ქალებს იცნობს, ამას არ იტყვის, ისინი ყოველთვის სამართლიანობისთვის იბრძოდნენ და საკუთარმა შინაგანმა მემ გამოიყვანა გარეთ. ვინ ამბობს ამას და თუ შეუძლია ეს დაამტკიცოს, მე მზად ვარ საქვეყნოდ დავუჯდე პირისპირ და ყველას გასაგონად გავცე პასუხი. თუ არადა, იქვე მოვითხოვ დაისაჯოს ცრუ ბრალდებებისთვის.

– გამგებელ გოჩა ჭანტურიას ციტირებას მოვახდენ: „ერთხელ მოვახერხე ირაკლი რუხაძესთან შეხვედრა _ სამწუხაროდ, ის არის ამ მაპროვიცირებელ ძალაზე დამოკიდებული და ამბობს, რომ მათ ვერ ჩაეხსნება. ის მათ დაკვეთას ასრულებს, თავად მოშიმშილეები ვის დაკვეთას ასრულებენ, დღემდე ვერ გავიგე.“ შეხვდით გამგებელს და ნამდვილად უთხარით, რომ თქვენ ამ ქალების დაკვეთას ასრულებთ და ვერ წახვალთ მათ წინააღმდეგ?

– არა, ჭანტურიასთან პირისპირ შეხვედრა არ მქონია. მხოლოდ ერთხელ შევხვდით და იქ სხვებიც იყვნენ. ასეთი რამ არ მითქვამს, მე მხოლოდ „ქართული ოცნების“ იდეებს ვიზიარებ და იმ ადამიანებს ვექვემდებარები, რომლებიც ახალ ხელისუფლებაში არიან და ჩემს კანდიდატურას უწევდნენ ლობირებას. რა შუაშია ეს ქალები, ან რა დაკვეთა უნდა მქონდეს მათგან? ვერც იმას ვხვდები, რაში სჭირდება ჭანტურიას ამის თქმა… ასეთ ლაპარაკს ჯობია საზოგადოებას უთხრას, თვითონ საიდან მოვიდა, სად იყო ამდენ ხანს, რატომ არ ჩანდა “ოცნების” გვერდით, თუ ის მართლაც “ოცნების” კადრია, ან რატომ დგას იმ ადამიანების გვერდით, რომელთაც არა ერთი დანაშაული აქვთ ჩადენილი რაიონის მოსახლეობის წინაშე.

– ბატონო ირაკლი, ისევ გადაუხვიეთ თემას. კონკრეტული პასუხი გამეცით _ შეხვდით თუ არა პირისპირ გამგებელს და თქვით თუ არა ეს სიტყვები?

– არა.

– მაშინ რა გამოდის?

– გამოდის ის, რომ გამგებელი ცრუობს!

– თქვენ შეგიძლიათ პირადად უთხრათ მას, რომ ცრუობს?

– კი და არა მარტო ეს. ის მაშინაც ცრუობს, როცა მოშიმშილე ქალბატონების შიმშილობას ეჭვქვეშ აყენებს. გაიხსენეთ, რას ამბობს ინტერვიუში: „რაც შეეხება მათ შიმშილობას, იქ არის დამონტაჟებული კამერები და კარგად ჩანს, რომ მათთან მთელი დღის განმავლობაში უამრავი მნახველი მიდი-მოდის, შეაქვთ და გამოაქვთ რაღაცეები“ მისი სიტყვების შემდეგ არაერთხელ მომისმენია სხვების კომენტარებიც, რომ ეს ქალბატონები ღამე ძეხვს და პურს მიირთმევდნენ და გაზიან სასმელებს აყოლებდნენ. ამოიღოს კამერის ფირები და დაამტკიცოს. წინააღმდეგ შემთხვევაში უკვე მას მოეთხოვება პასუხი ცრუ ბრალდებებისთვის, აღარაფერს ვამბობ იმაზე, რომ მათ „ზონდერქალები“ უწოდა. კიდევ ერთხელ გეტყვით, რომ ყველამ კარგად გაიგოს – გამგებელს პირისპირ სალაპარაკოდ არ შევხვედრივარ, ის ცრუობს.

– აქციები შეწყდა. საკრებულომ და გამგეობამ ჩვეულ რიტმში გააგრძელა მუშაობა. ხალხი ამბობს, რომ თქვენ და თქვენი გუნდის წევრები გარიგებაზე წახვედით საკრებულოს თავმჯდომარესთან და გამგებელთან, სიჩუმის სანაცვლოდ ზოგმა ფული აიღეთ, ზოგმა კი თანამდებობები.

– არა, არა, ვინ ავრცელებს ასეთ ჭორებს, არ ვიცი, მაგრამ ადვილი მისახვედრია, ვის უნდა აწყობდეს ჩვენი სახელის შებღალვა. არანაირი გარიგება და შეხვედრა არ ყოფილა. მე არ ვაპირებ ბრძოლის შეწყვეტას, ჩვენ ახლა ფინანსურ პოლიციასთან ვთანამშრომლობთ, ასევე, სხვადასხვა საქმეა აღძრული და გამოძიება დაწყებულია, ამიტომ არ გვინდა აქციებით და ხმაურით ხელი შეეშალოთ სათანადო ორგანოებს. ისე, კარგი იქნება, თუ გამოინახება რაიმე ფორმა და მოხდება ყველას შეხვედრა საზოგადოების თანდასწრებით, რომ ერთხელ და სამუდამოდ ყველა კითხვას გაეცეს პასუხი და ამდენი მითქმა-მოთქმა შეწყდეს. მე მზად ვარ ამისთვის.