რევაზ ჩიტიძის გადადგომისთანავე გავრცელდა ხმა, რომ საკრებულოს ახალი რჩეული ამირან გიგინეიშვილი იქნებოდა. ჟურნალისტებისთვის გამართულ საინფორმაციო ხასიათის შეხვედრაზე , ამირან გიგინეიშვილმა დაადასტურა, რომ ლანჩხუთის საკრებულოს ყოფილ უმრავლესობასთან კონსულტაციების გავლის შემდეგ, საერთო გადაწყვეტილებამდე მივიდნენ. დეპუტატ თემურ ჩხაიძის გუნდის კანდიდატურად ამ თანამდებობაზე საკრებულოს წევრი დავით წულაძე სახელდება. ამ გუნდისა და საკრებულოს დეპუტატების გუშინ გამართულ შეხვედრაზე, ნუგზარ ჩხაიძე, რომლის პოლიტიკური სტატუსი ლანჩხუთში დღემდე გაურკვეველია, ცდილობდა ზეგავლენა მოეხდინა ყოფილ უმრავლესობაზე, წულაძის კანდიდატურის მხარდასაჭერად. ეს ინფორმაცია ამირან გიგინეიშვილმა არ უარყო. მაგრამ გარკვეული ზეწოლის მიუხედავად, გიგინეიშვილმა მაინც არ თქვა უარი, წამოეყენებინა საკუთარი კანდიდატურა. უფრო მეტიც, იგი დარწმუნებულია, რომ საკრებულო მას მიანიჭებს უპირატესობას. გუშინ გამგეობის პრესცენტრიდან ყველა ადგილობრივმა ჟურნალისტმა მიიღო შეტყობინება, რომ იმართებოდა შეხვედრა საკრებულოს დეპუტატებსა და თემურ ჩხაიძეს შორის. მაგრამ შეხვედრაზე ჩვენი დასწრება საკრებულოს თავმჯდომარის მოადგილემ არ ისურვა, მიზეზად კი შემდეგი გარემოება დაასახელა. ეს არის სამუშაო შეხვედრა. აქ შეიძლება, ისეთი შეხედულებები და მოსაზრებები გამოითქვას, რომელთა შეცვლაც შემდეგში აუცილებელი გახდეს! პრესაში მათი წინასწარ გახმაურება კი არავისთვის არ იქნება სასურველი(?!). ამ მოტივით ზვიად აფხაზავამ დარბაზი დაგვატოვებინა, თუმცა პირობა დადო, რომ ყველა შეკითხვას უპასუხებდა. ამ შეხვედრის დეტალები ჩვენთვის დღეს გახდა ცნობილი, მაგრამ არა ზვიად აფხაზავასგან. საკრებულოს მომავალი თავმჯდომარე, ცდილობდა არ გაქცეოდა არცერთ კითხვას და ყველაფერზე ჰქონოდა ამომწურავი პასუხი. მან არც ის დამალა, რომ გუშინდელ შეხვედრაზე მაჟორიტარი დეპუტატის წარმომადგენლების მხრიდან იყო არა ზეწოლა, არამედ იმპერატიულ ტონში საუბარი. მათი მთავარი მოთხოვნა ყოფილა, საკრებულოს მხარი დაეჭირა დავით წულაძის კანდიდატურისთვის. ამ შეხვედრაზე, საკრებულოს წევრის, მერაბ წილოსანის ინფორმაციით, იმყოფებოდნენ ნუგზარ ჩხაიძე, ზაალ სანაძე, კობა მირზაშვილი, ვახტანგ ზენაიშვილი და თენგიზ ხელაძე. ეს ადამიანები აქტიურად იყვნენ ჩართული თემურ ჩხაიძის წინასაარჩევნო კამპანიაში. მათგან მხოლოდ ნუგზარ ჩხაიძე ახმოვანებდა გარკვეულ მოთხოვნებს. ამირან გიგინეიშვილს კითხვაზე _ რატომ გახდა აუცილებელი, ჟურნალისტებისთვის დაემალათ გუშინდელი შეხვედრის დეტალები, პასუხი არ ჰქონდა. სამაგიეროდ, იგი მედიას და, ზოგადად, საზოგადოებას, მეტ საჯაროობას და გახსნილობას ჰპირდება.
