12 თებერვალს, სოფელ ნასაკირალში და სოფელ ცხემლისხიდში გამგებლის მოვალეობის შემსრულებელმა, კოტე შარაშენიძემ და მისმა მოადგილემ, გიორგი ღურჯუმელიძემ სოფლის მცხოვრებლებს ახალი რწმუნებულების დანიშვნის შესახებ ამცნეს. მოგვიანებით კი იზურგეთის მუნიციპალიტეტის გამგეობის პრესამსახურმა სოციალური ქსელით გვამცნო ამის შესახებ სურათებით და ტექსტით, რომელსაც უცვლელად გთავაზობთ:
12 თებერვალს, ოზურგეთის მუნიციპალიტეტის გამგებლის მოადგილემ, გიორგი ღურჯუმელიძემ სოფელ ცხემლისხიდის მოსახლეობას, ახალი რწმუნებული დავით ჭანუყვაძე წარუდგინა, რომლის არჩევაც დაბა ნასაკირალის რწმუნებულის მსგავსად, ადგილობრივი მოსახლეობის აზრის გათვალისწინებით მოხდა და იგი სამთვიანი საგამოცდო ვადით დაინიშნა.
გამგებლის მოადგილემ მოსახლეობას ახალი ხელისუფლების ის პრიორიტეტული საკითხები გააცნო, რომელთა დაგეგმვასა და განხორციელებას კოალიცია “ქართული ოცნება” ადგილობრივი თვითმმართველობის წარმომადგენლებთან ერთად გეგმავს
გიორგი ღურჯუმელიძემ ჯანდაცვის სფეროში ამ დროისთვის არსებული მინიმალური სადაზღვევო პაკეტის მნიშვნელობაზე ისაუბრა, რომელიც სულ მალე გაიზრდება და თითოეული მოქალაქისათვის ხელმისაწვდომი გახდება. გარდა ამისა, მან აღნიშნა, რომ სოფლის მხარდამჭერი პროგრამის ფარგლებში, პრიორიტეტული პროექტები სოფლისა და მოსახლეობის სასიკეთოდ დაიგეგმება.
გამგებლის მოადგილემ რწმუნებულს ახალ პოსტზე დანიშვნა მიულოცა და წარმატებები უსურვა.
12 თებერვალს ოზურგეთის მუნიციპალიტეტის გამგებელი, კონსტანტინე შარაშენიძე დაბა ნასაკირალის მოსახლეობას შეხვდა და მათ სოფლის ახალი რწმუნებულის მოვალეობის შემსრულებელი, შოთა ართმელაძე წარუდგინა.
რწმუნებულის კანდიდატი დაბა ნასაკირალის მოსახლეობამ დაასახელა და გამგებელმა სწორედ აქედან გამომდინარე წარადგინა ის რწმუნებულის პოსტზე, რომელიც სამთვიანი საგამოცდო ვადითაა არჩეული.
მოსახლეობასთან შეხვედრისას კონსტანტინე შარაშენიძემ დაბა ნასაკირალის პრობლემურ საკითხებზე ისაუბრა და ერთ-ერთ პრიორიტეტულ საქმედ სოფლის ადმინისტრაციული შენობის კეთილმოწყობა დაასახელა.
გამგებელმა ასევე ადგილობრივ მცხოვრებლებს მოუსმინა და ახალ რწმუნებულს, მოსახლეობის აზრის გათვალისწინებით, სოფლისათვის პრიორიტეტული საქმეების კოორდინირებულად გადაწყვეტა დაავალა.
კონსტანტინე შარაშენიძის თქმით, უნდა აღდგეს დაბა ნასაკირალის კულტურის სახლი, რომელიც იქ მცხოვრებთათვის ადრე კულტურისა და ხელოვნების ცენტრს წარმოადგენდა.
ჩვენს მიერ მოპოვებული ინფორმაციით, ართმელაძის დანიშვნის წინააღმდეგი იყო ნასაკირალის მოსახლეობის ერთი ნაწილი და 2013 წლის 4 იანვარს აქცია გამართეს. მათი განცხადებით, შოთა ართმელაძე ძალიან დიდი ხანია მუშობდა დაბა ნასაკირალის მეურნეობის დირექტორად, რომელიც ფაქტობრივად, ძველ დროში, სოფელს განაგებდა და მათ არ სურთ ისევ ძველი კადრები დაინიშნონ სოფლის მმართველად. მათი განცხადებით, სწორედ ამ პიროვნების მუშაობის დროს გაჩანაგდა და დაინგრა ნასაკირალში კულტურის ცენტრი, ასევე ჩაის ფაბრიკები, ადმინისტრაციული შენობა, გაიყიდა ჰექტრობით მიწის ნაკვეთები და ა.შ.
როგორც დაბა ნასაკირალის მცხოვრებლები აცხადებენ, სოფელში მოინახება ისეთი კანდიდატურები, რომლებიც ახალგაზრდები, ნიჭიერები და “ნაციონალებთან” გასვრილნი არ არიან, ართმელაძეს კი ამ სოფლისთვის არაფერი კარგი არ შეუქმნია.
ოზურგეთის მუნიციპალიტეტის გამგებლის მოვალეობის შემსრულებელი, კოტე შარაშენიძე “გურია ნიუსთან” საუბრის დროს ამბობს, რომ ის არავის ნიშნავს ისეთს, რომელსაც აქვს “ნაცმოძრაობასთან” კავშირი.
