“არ მჭირდება გულის ჯიბით “სპისოკის” ტარება” _ ყოფილი პროკურორი თავის პროტეჟეებზე

მერაბ მგელაძე ოზურგეთელია და ის რამდენიმე წლის წინ პროკურორად მუშაობდა, იყო გურიის მთავარი პროკურორის ია დოლიძის  მოადგილე. როგორც “გურია ნიუსს” უთხრეს, სწორედ ია დოლიძე უწევს პროტექციას მგელაძის  პროკურორად დანიშვნას.

ამავდროულად, ია დოლიძე ყველაზე დაახლოებული პირია პარტია “ქართული ოცნება _ დემოკრატიული საქართველოს: ოზურგეთის რაიონული ორგანიზაციის თავმჯდომარესთან, დავით დარჩიასთან, რომელიც პრემიერ-მინისტრის ბიძინა ივანიშვილის მეგობარი და თანაკურსელია. როგორც წყარო გვატყობინებს, ია დოლიძე და დავით დარჩია სულ ერთად არიან და თანამდებობის პირების დანიშვნა – განაწილებას დარჩიას  ია დოლიძე ურჩევს. მეტიც, როგორც გვითხრეს, ის გულის ჯიბეში “სიით” დადის, სადაც ჩამოწერილი აქვს შესაძლო კანდიდატურები.

დავით დარჩიასთან ახლო ურთიერთობას “გურია ნიუსთან” არც თავად ია დოლიძე უარყოფს.

_ რა თქმა უნდა, დავით დარჩია ჩემი უახლოესი მეგობარია, ჩვენს ოჯახებს ნათელ-მირონობა აკავშირებს ერთმანეთთან, მართლაც სულ ერთად ვართ, რაც შეეხება გულის ჯიბით “სპისოკის” ტარებას, ამას ნუ დაიჯერებთ, მე ეს საერთოდ არ მჭირდება. ძალიან დიდი ხანი ვიმუშავე საკმაოდ მაღალ თანამდებობებზე და დღეში 300 კაცის სახელს და გვარს ვიმახსოვრებდი, ასე რომ “სპისოკი”  ჩემთვის არაა საჭირო, ძალიან კარგად ვიცნობ ოზურგეთს და ვიცი თითოეული ადამიანი ვინ არის, რა გაუკეთებია ამ საარჩევნოდ თუ ისე. ასე რომ, ადამიანების განსაზღვრა, ვინ ვინ არის, კარგად შემიძლია.

_ბატონო ია, როგორც ვიცით შეიძლება თქვენი დეიდაშვილი მერაბ მგელაძე პროკურორად დაინიშნოს, ის არის თქვენი კანდიდატურა და მხარს უჭერთ მას ამ პოსტზე..

_ კი ბატონო, მერაბ მგელაძე ჩემი დეიდაშვილია, რამდენიმე წელი  პროკურორად მუშაობდა, ახლა დასავლეთ საქართველოს სამხედრო პოლიციაში მუშაობს. ის პროფესიონალია, იცის  საქმე ძალიან კარგად, არის ერუდირებული პიროვნება და ჩემი აზრით, საუკეთესო კანდიდატურა ამ პოსტზე.

_ ესე იგი შეიძლება ითქვას, რომ მერაბ მგელაძის კანდიდატურა განიხილება?

_მე არ ვიცი ზემოთ რა ხდება, ჩემი აზრით, სერიოზულად ამ თემაზე საუბარი ჯერ ნაადრევია და არც განიხილება. რამდენიმე თვის წინ იყო ვაკანსია  და შეიტანა განცხადება. ეგ იყო და ეგ. ერთ რამეს გეტყვით რა და მინდა თქვენი გაზეთის საშუალებით გაიგოს მან, ვისაც ეს ეხება, რომ არავითარი საფრთხე არ ემუქრება იმას, ვინც ფიქრობს რომ მერაბ მგელაძის მოსვლით შეიძლება რაიმე დაკარგოს, შეუძლია მშვიდად იყოს.

ახლა, რაც შემეხება მე, გეტყვით რომ ბრძენი კაცი ჭკვიანისგან იმით განსხვავდება, რომ “ერთ მდინარეში ორჯერ არ შედის”, – ამას მიხვდება ის, ვინც ჩემი პიროვნებით არის დაინტერესებული და მოდი ამით დავხუროთ რა ჩემი თემა, _ გვითხრა ყოფილმა პროკურორმა ია დოლიძემ.

ჩვენ დავუკავშირდით ოზურგეთის რაიონულ პროკურორს კახა კოჩივარს, რომელმაც განგვიცხადა, რომ აღნიშნულთან დაკავშირებით საქმის კურსში არაა და პროკურატურაში შესაძლო ახალი კადრის დანიშვნის შესახებ ინფორმაციას არ ფლობს.