“არა მგონია, “ქართული ოცნებისთვის” უგულავას დაპატიმრება პოლიტიკურად მომგებიანი იყოს”

_ 1 ოქტომბრის არჩევნების შემდეგ არ ჩანს პარტია “მომავალი საქართველო,” ტაიმ-აუტი აიღეთ?

_  2012 წლის საპარლამენტო არჩევნებში, მოგეხსენებათ გაიმარჯვა კოალიცია “ქართულმა ოცნებამ,” რის შედეგადაც პრაქტიკულად მოხდა ხელისუფლების შეცვლა, ჩვენ მივიჩნიეთ, რომ ვინაიდან ახალი ხელისუფლება მოვიდა, მათთვის გარკვეული დრო უნდა მიგვეცა, რათა დაგვენახა, თუ რის გაკეთებას აპირებდნენ ისინი, აქედან გამომდინარე, ჩვენ შევწყვიტეთ დროებით ახალი ხელისუფლების ოპონირება.

_ როგორც არასაპარლამენტო ოპოზიცია, როგორ შეაფასებდით არჩევნების შემდეგ განვითარებულ მოვლენებს?

_ სამწუხაროდ არჩევნების შემდეგ პრაქტიკულად უკეთესობისკენ არაფერი შეცვლილა, პირიქით ბევრი თვალსაზრისით მდგომარეობა გაუარესდა, ხელისუფლება ძირითადად დაკავებულია ეგრეთწოდებული სამართლიანობის აღდგენით, თუმცა მინდა გითხრათ, რომ ამასაც ვერ ახერხებენ ეფექტურად.  მე ასევე შეშფოთებული ვარ ივანიშვილის გადაწყვეტილებით, რის საფუძველზეც ბათუმში მეჩეთი უნდა აშენდეს. თავის დროზე,  როდესაც სააკაშვილმა ამ თემაზე დაიწყო საუბარი, ამას მოჰყვა ქართული საზოგადოების და მათ შორის ვინც ახლა ხელისუფლებაშია, ამ ადამიანების სამართლიანი გულისწყრომა, რამაც სააკაშვილის ხელისუფლება იძულებული გახადა შეეწყვიტა თურქულ მხარესთან მოლაპარაკებები, თუმცა მეჩეთის აშენების საკითხი წარმატებით დააგვირგვინა ბიძინა ივანიშვილმა ისე, რომ  ეს არ შეუთანხმებიათ საპატრიარქოსთვის.

მე ვსვამ კითხვას, _ სად არიან ახლა ის ადამიანები, ვინც გააფთრებით ეწინააღმდეგებოდა მეჩეთის აშენებას, რატომ არ იღებენ ხმას?  აბსოლუტურად არაფერი არ კეთდება მოსახლეობის მძიმე სოციალური მდგომარეობის  გაუმჯობესების კუთხით, მაშინ როდესაც ჩვენი საზოგადოება უმძიმეს სოციალურ მდგომარეობაში იმყოფება. ხალხის მთავარი დაკვეთა იყო სოციალური მდგომარეობის გაუმჯობესება, რაც  სამწუხაროდ ვერ მოხერხდა.  ქვეყანაში არის მძიმე პოლიტიკური მდგომარეობა, შეიძლება ითქვას, რომ საქართველო სამოქალაქო დაპირისპირების ზღვარზეა, “ქართულ ოცნებასა”  და “ნაციონალურ მოძრაობას”  შორის კოჰაბიტაცია ვერ შედგა.  ფაქტი სახეზეა, რომ დღეს ბრძოლა მიდის  ორ ძალას შორის, თუ რომელი ძალა განახორციელებს თბილისზე პოლიტიკურ კონტროლს, ეს ხდება იმ ფონზე, როდესაც “ნაციონალური მოძრაობის” პარლამენტის და საკრებულოს დეპუტატები საეჭვო ვითარებაში ტოვებენ “ნაციონალურ მოძრაობას.”  ხელისუფლება ცდილობს, პარლამენტში მოიპოვოს საკონსტიტუციო უმრავლესობა, ხოლო დედაქალაქის საკრებულოში _ უბრალოდ უმრავლესობა.  ამ ფონზე, გიგი უგულავას უყენებენ ბრალს, მე შორს ვარ იმ აზრისგან, რომ “ნაციონალურ მოძრაობაში”  არიან წმინდანები, მაგრამ ვფიქრობ სამართალდამცავების მხრიდან მეტი პროფესიონალიზმია საჭირო, რომ საზოგადოებამ ნათლად გაარჩიოს პოლიტიკურ ზეწოლასთან გვაქვს საქმე თუ სამართლიანობის აღდგენასთან.

“ნაციონალური მოძრაობა” მიიჩნევს, რომ დღეს ფრონტის ხაზი მერიაზე გადის და ამის გამო დანიშნეს ვანო მერაბიშვილი მერის მოადგილედ. მათ მიაჩნიათ, რომ მერაბიშვილი ძლიერი ფიგურაა და შეძლებს  მერიაში პროცესების სწორად წარმართვას. მეორე საკითხია  საზოგადოება მიიღებს თუ არა მერაბიშვილს მაშინ, როდესაც “ნაციონალურ მოძრაობას” უამრავი შეცდომა აქვს დაშვებული და სწორად მერაბიშვილი იყო მაშინ საპასუხისმგებლო თანამდებობაზე.  რაც შეეხება უგულავას, მე ვფიქრობ “ქართულმა ოცნებამ” თავისი საქმე გააკეთა და მერს ბრალი წაუყენა, არ მგონია პოლიტიკურად მათთვის მომგებიანი აღმოჩნდეს უგულავას დაპატიმრება.  აშკარაა, რომ “ნაციონალური მოძრაობა” ბრძოლას არ წყვეტს  და ისინი სერიოზულად ემზადებიან.  ყველაზე რთული პერიოდი,  ჩემი აზრით, იქნება 19 აპრილამდე დარჩენილი დრო.  ორივე პოლიტიკურმა ძალამ კარგად იცის,  რომ მათი ასე თანაცხოვრება ვერ  გაგრძელდება, მე ვფიქრობ უახლოეს ხანში დიდი პოლიტიკური ვნებათაღელვა გველის.  ვნახოთ, ალბათ ნაციონალები ელოდებიან 19 აპრილს გამოვა თუ არა ხალხი მათ მიტინგზე,  რის შემდგომ, თუ მათ დაინახეს,  რომ ხალხი მათ ისევ უსმენს, უკვე არ არის გამორიცხული, მთავრობის და პარლამენტის დათხოვნა და ხელახალი არჩევნების დანიშვნა.

–შუალედურ არჩევნებში ხომ არ გეგმავთ მონაწილეობას?

–შექმნილი ქვეყანაში პოლიტიკური ფონიდან გამომდინარე, შუალედურ არჩევნებში  მონაწილეობას არ მივიღებთ, სახვა შემთხვევაში ჩვენ ვიქნებით ძალიან აქტიურები რათა ჯანსაღი ოპონირება გაუწიოთ ხელისუფლებას.

ეხლა გვაქვს შიდა პარტიული სამუშაოები, ვაძლიერებთ სტრუქტურულ ერთეულებს, მათ შორის ვქმნით რეგიონალურ ორგანიზაციებს, რის შემდგომ პარტია მზად იქნება მონაწილეობა მიიღოს საქართველოში ჩასატარებელ ყველა დონის არჩევნებში.