საკრებულოს თავმჯდომარე ალეკო მამეშვილი არ ესწრებოდა. მანამდე გავრცელებული ინფორმაციით, იგი მალე დატოვებს საკრებულოს თავმჯდომარის პოსტს. ეს ინფორმაცია არ დაადასტურეს საკრებულოში _ საკრებულოს თავმჯდომარის მოადგილემ, ავთანდილ მექვაბიშვილმა, სხდომის დაწყებისთანავე დეპუტატებს აუწყა, რომ მამეშვილი ავადმყოფობის გამო ვერ დაესწრებოდა სხდომას და საკრებულოს 30 დეპუტატსა და დამსწრე სტუმრებს დღის წესრიგით გათვალისწინებული საკითხები გააცნო.
პირველი საკითხის ირგვლივ _ “ოზურგეთის მუნიციპალიტეტის 2013 წლის სახელმწიფო შესყიდვების გეგმაში ცვლილებებისა და დამატებების შეტანის შესახებ”, ამირან გირკელიძემ ისაუბრა. მან თქვა, რომ მუნიციპალიტეტის 2013 წლის ბიუჯეტთან შესაბამისობაში მოსაყვანად, სახელმწიფო შესყიდვების გეგმაში დაზუსტდეს მუხლის “სარემონტო-სამონტაჟო სამუშაოების” ღირებულება და 225 ლარის ნაცვლად, განისაზღვროს 350 ლარით. ასევე განსაზღვრულია და გაზრდილი საკანცელარიო საქონლის ღირებულება. 400 ლარით გაიზარდა კომპიუტერული ტექნიკის შეძენის ხარჯი.
მეორე საკითხად განიხილეს და დაამტკიცეს განკარგულება ოზურგეთის მუნიციპალიტეტის ორი შპს-ს _ “ოზურგეთის სამედიცინო სასწავლებლისა” და “ოზურგეთის ცენტრალური სტადიონის” ლიკვიდაციის შესახებ.
განსაკუთრებული მღელვარება მესამე საკითხის განხილვამ გამოიწვია. ოზურგეთის მუნიციპალიტეტის არასამეწარმეო (არაკომერციული) იურიდიული პირის, “ოზურგეთის მუნიციპალიტეტის სპორტის განვითარების საინფორმაციო-ანალიტიკური და მეთოდური დახმარების ცენტრის” და ოზურგეთის მუნიციპალიტეტის არასამეწარმეო (არაკომერციული) იურიდიული პირის, “გომისმთის” მიმართ ლიკვიდაციის პროცესის დაწყების შესახებ _ ოზურგეთის მუნიციპალიტეტის საკრებულოს განკარგულების დამტკიცების თაობაზე”.
აღნიშნულ საკითხზე ისაუბრა დეპუტატმა ლევან ნინიძემ. მან განმარტა, რომ ლიკვიდაციის პროცესი კანონის გათვალისწინებით დაიწყო და დარჩენილი ქონება გადაეცემა ოზურგეთის მუნიციპალიტეტს და შესაბამისად, დარჩენილი ქონების მიღებაზე უფლებამოსილება მიენიჭება საკრებულოს ეკონომიკური განვითარების კომისიის თავმჯდომარეს.
სერიოზული პოლემიკა შედგა აიპი ორგანიზაციების ლიკვიდაციის აუცილებლობის თაობაზე. ავთანდილ მექვაბიშვილმა განაცხადა, რომ აქ საუბარია ლიკვიდაციის დაწყებაზე და არა დღევანდელ ლიკვიდაციაზე. ტრიბუნასთან მდგომ ლევან ნინიძეს კი ოპოზიციონერმა დეპუტატმა, ლელა ნაცვალაძემ მიაძახა: “ბატონო ლევან, შენ ისე იცი ახლა მაგი, რაფერც მე ჩინური და დაანებე თავი მაგ ლაპარაკს!”
ამ რეპლიკის შემდეგ, საკრებულოს დეპუტატმა დავით მდინარაძემ სასწრაფოდ ითხოვა სიტყვა და ცოტა არ იყოს, აღელვებულმა თქვა: “ხალხო, ზრდილობა ოჯახში და საბავშვო ბაღში მაინც არ გვისწავლია? ეს სირცხვილია, სხვები გვიყურებენ. გამოხატეთ თქვენი აზრი, მაგრამ ელემენტარული ზრდილობაა საჭირო. შენობით მე არ ველაპარაკები ასეთ დროს ადამიანებს. თუ არა, დავიხუროთ ქუდი და გავიდეთ აქედან”.
ზრდილობის თემაზე ექიმ მდინარაძის “რეცეპტმა” ცოტა ხანს კი იქონია გავლენა, შემდეგ კი ხმამაღალი საუბარი, აქა-იქ უხეში ჩანართებით, კვლავ გაგრძელდა.
იურისტმა თამაზ ტრაპაიძემ განმარტა, თავის დროზე აიპი ორგანიზაციების შექმნის და შემდეგ მათი არსებობის აუცილებლობის შესახებ: “მე განვმარტავ, რომ თუკი საუბარია იმაზე, რომ ლიკვიდაციას არ იწყებ დღეს, მაშინ დღის წესრიგში უნდა ეწეროს ადმინისტრაციული წარმოების დაწყება. რაც შეეხება ა(ა)იპ ორგანიზაციებს, თავის დროზე სახელმწიფომ უარი თქვა სხვადასხვა ორგანიზაციების დაფინანსებაზე, თუმცა ეს სჭირდებოდა მუნიციპალიტეტს. ამიტომ სამოქალაქო კოდექსში შევიდა ცვლილება, რათა დაერეგისტრირებინათ ა(ა)იპ-იები. სხვა საქმეა ის ა(ა)იპ-ები, რომელთა არსებობა ეჭვს იწვევს. ასეთ შემთხვევაში, წლის ბოლოს უნდა მომხდარიყო გადამოწმება. საჭიროების შემთხვევაში კი _ მათი ლიკვიდაცია,” _ თქვა ტრაპაიძემ.
დიმიტრი კვერღელიძემ ამ მიმართულებით დახარჯულ ნახევარ მილიონს წყალში გადაყრილი ფული უწოდა, რაზეც არ დაეთანხმა მექვაბიშვილი: _ შეიძლება, ყველაფერი არ იყო ზუსტად გათვლილი და თავის დროზე ვერ გავაკეთეთ კარგი ანალიზი, მაგრამ საქმე მაინც კეთდებოდა, _ თქვა მან.
მეოთხე საკითხი თემურ მოქიამ წარმოადგინა და იგი კიდევ ორი ა(ა)იპ-ის _ “დასუფთავების სამსახურსა” და “კომუნალური მომსახურების ცენტრს” შეეხო. მათი მხოლოდ რეორგანიზაცია ხდება და ამიტომ საკითხს დიდი ხმაური არ გამოუწვევია.
მეხუთე და მეექვსე საკითხები, ოზურგეთის მუნიციპალიტეტის ტერიტორიაზე არსებული არასასოფლო-სამეურნეო დანიშნულების მიწის ნორმატიული ფასის დადგენას და 2012 წლის ბიუჯეტის აუდიტორული შემოწმების მიზნით, დამოუკიდებელი აუდიტის მოწვევას შეეხო, რასაც დეპუტატთა უმრავლესობამ ერთად უყარა კენჭი.
საკრებულოს სხდომაზე ინტერესი გამოიწვია “ოზურგეთის მუნიციპალიტეტის გამგეობის საფინანსო-საბიუჯეტო სამსახურის დებულების დამტკიცების შესახებ” ოზურგეთის მუნიციპალიტეტის საკრებულოს 2010 წლის 4 აგვისტოს დადგენილებაში ცვლილების შეტანის შესახებ” ოზურგეთის მუნიციპალიტეტის საკრებულოს დადგენილების დამტკიცების თაობაზე.
იურისტმა თინათინ ლომჯარიამ განმარტა, რომ სიახლეა ცვლილება, რომელიც ეხება საფინანსო-საბიუჯეტო სამსახურის შემადგენლობას, რადგან მისი სტრუქტურა შეიცვალა და დაემატა ერთი განყოფილება. შესაბამისად კი, გამგეობის დებულება არის ის წესდება, სადაც ყველა სამსახურის ფუნქციაა განსაზღვრული. ამიტომაც გამგეობის დებულებაში ცვლილება ასეთი სახით შევიდა; _ საფინანსო-საბიუჯეტო სამსახურის შემადგენლობა, ანალიზის განყოფილება, სახაზინო მომსახურების განყოფილება, ბუღალტრული აღრიცხვა და ანგარიშის განყოფილება.
აღნიშნული ნორმატიული აქტის დამტკიცებასაც დეპუტატებმა ხმათა უმრავლესობით უყარეს კენჭი.
დღის წესრიგის მეცხრე საკითხი ერთადერთი იყო, რის დამტკიცებაზეც ლელა ნაცვალაძემ ხელი ასწია. ამ ფაქტმა სხდომა მხიარულ ნოტაზე დაასრულა.
