_ სანამდე სოფლის პრობლემის შესახებ მოგითხრობთ, მანამდე გეტყვით, რომ ტელევიზიით რასაც ვუყურებთ და ვიგებთ, პარლამენტიდან იქნება ეს თუ დედაქალაქიდან, ეს უმცირესობა დაგვცინის, გვაღიზიანებს. გთხოვთ, გაითვალისწინოთ და სრული ინფორმაცია მიაწოდოთ ბატონ ბიძინა ივანიშვილს. ჩვენ არ გვიბრძოლია იმისთვის, რომ ტელევიზიით ამ ხალხს ვუყუროთ. ნამდვილად გვეგონა, რომ ეს ხალხი, რომელიც 2012 წლის ოქტომბრამდე იყო ხელისუფლებაში, აღარ ვნახავდით და არც სურვილი გვაქვს ყოველთვის მაგათ კომენტარებს ვუსმინოთ. გამოდის, რომ ქვეყნის მტერი და დამაქცევარი მხოლოდ ბაჩო ახალაია გამოვიდა?! სხვებს არაფერი ეკითხება. თბილისის მერს მე ვეძახი იგულავას და არა უგულავას, მაგრამ ტელევიზიით ვიგებ, რომ თურმე ცამდე მართალი ყოფილა, სიმართლე უნდა მეფობდეს ქვეყანაში. დაიღალა ეს ხალხი ამდენი ცინიზმით, _ თქვა ნარი მუჯირმა.
მისივე თქმით, სოფელ კონჭკანთში პრობლემებია და ახლა ამ პრობლემის მოგვარების დროა.
_ ახლა, რაც შეეხება სოფელ კონჭკანთს. უკვე ახალი რწმუნებული გვყავს, მაგრამ სპეციალისტებს არ უნდათ წასვლა. ჩემთვის და ბევრი ჩემი ნაცნობისთვის მიუღებელია ე.წ. ყბადაღებული კოჰაბიტაცია, მიუღებელია ნამდვილად და მაღიზიანებს ეს სიტყვა. სადაც გავიხედავ ყველგან ეს სიტყვა მესმის. ზედმეტად ჰუმანურები ხომ არ გამოვდივართ? 2012 წლის 1 ოქტომბრის 12 საათისთვის, გამარჯვებულად “ნაცმოძრაობა” რომ გამოცხადებულიყო, ხუთი წუთიც არ გვაცლიდნენ და თავს ბუჩქებში გვიკრავდნენ. ჩემს სოფელში ნამყოფი ხართ, ბატონო ზვიად, როგორი გამგეობის შენობა გვაქვს კი გახსოვთ. იქ როგორ შეიძლება საქმიანობა. ჩემს სოფელში მაგალითად არაფერი გაკეთებულა, არ არის წყალი, გაზს თავი დავანებოთ, ქარის ამოვარდნის დროს შუქი ქრება, ავტობუსი მხოლოდ ერთხელ არის დილით. უკაცრავად, ხაშზე დაბარებულივით ადრე უნდა წამოყვე და დღის 2 საათზე უნდა წაყვე უკან, რადგან მერე არაფერი არ დადის. თან ერთი ადამიანის წასვლა-წამოსვლა ღირს სამი ლარი. აი, ამ კუთხით მინდა გამახვლიდეს ჩემს სოფელზე ყურადღება, _ განაცხადა თავისი გამოსვლის დროს ნარი მუჯირმა.
ოზურგეთის მაჟორიტარი დეპუტატის, ზვიად კვაჭანტირაძის თქმით, გზების პრობლემა 2013 წელს აუცილებლად მოგვარდება, რასაც მოყვება სხვა პრობლემების გადაჭრის გზები.
