პარტიის ჩოხატაურის ორგანიზაციის ხელმძღვანელი, დიმიტრი კორიფაძე ამბობს, რომ ეს ინფორმაცია სინამდვილეს არ შეესაბამება:
_ 19 აპრილამდე ჯერ დიდი დროა. დაზუსტებით არ ვიცი, რამდენი ადამიანი წამოვა. რაც შეეხება თანხის მიცემას, ეს მხოლოდ და მხოლოდ ჭორია.
_ ჩვენი ინფორმაციით, ზემოდან მიღებული გაქვთ დავალება, რომლის თანახმადაც აქციაზე 800 ადამიანი უნდა წაიყვანოთ.
_. 800 ადამიანის წაყვანა ძალიან დიდი ხარჯებთან არის დაკავშირებული. 50 მიკროავტობუსი მაინც დასჭირდება და ძნელი სათქმელია, მოხერხდება თუ არა ამ რაოდენობის ადამიანის წაყვანა.
_ ბატონო დიმიტრი, ჩოხატაურში “ნაციონალურმა მოძრაობამ არჩევნები წააგო… თუ თანხის მიცემით არა, როგორ აპირებთ ადამიანები წაიყვანოთ აქციაზე?
_ ვისაც სურვილი ექნება წამოსვლის, წამოვა.
_ ახლა რომ დაგჭირდეთ, რამდენი კაცის გამოყვანას შეძლებთ?
_ ახლა რომ შეხვედრა ჩატარდეს, ერთ დარბაზს გავავსებთ.
_ ნაციონალური მოძრაობის” რამდენი წევრია ჩოხატაურში?
_ 50 კაცამდე. მანდატიან წევრებს ვგულისხმობ. თუმცა, ახლა ხელახალი რეგისტრაცია მიმდინარეობს.
კორიფაძის თმით, ამ ეტაპზე საჯარო სამსახურებში “ნაციონალური მოძრაობის” არც ერთი წევრი არ მუშაობს.
_ ბატონო დიმიტრი, შეიძლება წევრი არა, მაგრამ გამგეობაში დღესაც მუშაობენ ის ადამიანები, რომლებიც წინასაარჩევნოდ აქტიურად გიჭერდნენ მხარს _ იყვნენ საარჩევნო უბნის დამკვირვებლები, აკონტროლებდნენ თქვენი მხარდამჭერების საარჩევნო ყუთებთან მისვლას. “გურია ნიუსს” ამის დამამტკიცებელი ბევრი ფოტო და ვიდეო მასალა აქვს…
_ მე ვფიქრობ და მგონია, რომ ვინც გამგეობაში მუშაობდა, ყველა იყო ჩვენი მხარდამჭერი, _ ამბობს კორიფაძე და დასძენს, რომ ამჟამად მიმდინარე გათავისუფლებებს პოლიტიკური ზეწოლის სახე აქვს: _ რწმუნებულებს, თანაშემწეებს ათავისუფლებენ. ისეთ ადამიანებს, რომლებსაც პოლიტიკასთან საერთოდ არაფერი ჰქონდათ. კი არ ათავისუფლებენ, განცხადებებს აწერინებენ. ეს სასაცილოა. ადამიანი რომ სოფელში წლების განმავლობაში მუშაობს, ის რატომ უნდა გაათავისუფლო?! _ დასძენს პარტიის რაიონული ორგანიზაციის ხელმძღვანელი, რომლის თქმით, მისი სამსახურიდან წამოსვლაც ზეწოლის შედეგი იყო.
_ თუმცა, თქვენ ამბობდით, რომ ზეწოლას ადგილი არ ჰქონია…
_ მე ვთქვი, რომ შეხვედრაზე, რომელსაც მაჟორიტარი დეპუტატი თემურ ჭკუასელი ესწრებოდა, შემოგვთავაზეს განცხადებების დაწერა. მაშინ ვკითხე ბატონ თემურს, ახლა დავწერო განცხადება თუ ხვალ,-მეთქი. ამ განცხადებას მან პროვოკაციული უწოდა, თუმცა, ვერ გავიგე, რატომ. სულ რაღაც 20 დღის წინ კი, ინტერნეტში წავიკითხე ჭკუასელთან ინტერვიუ, სადაც ის ამბობს, რომ თუ მე თანამდებობიდან არ წავიდოდი, შეისწავლიდნენ, რამდენად კრისტალური ნამუშევარი მქონდა. თქვენი აზრით, ეს ზეწოლას არ ნიშნავს?
_ ეს იმას ხომ არ ნიშნავს, რომ შეგეშინდათ და იმიტომ წამოხვედით?
_ არაფერი მქონდა შესაშინებელი. მე წამოსული ვარ და მათ შეუძლიათ ყველაფერი შეისწავლონ. ყველა დღე იბარებენ თანამდებობის პირებს დაკითხვაზე და რა პრობლემაა?!
