“თვითმმართველობის რეფორმის წამოწყება ყულფში თავის გაყოფაა, მაგრამ ვიღაცამ ხომ უნდა დაიწყოს?!”

ვებგვერდზე ატვირთულია ინფორმაცია თვითმმართველობის მიმდინარე რეფორმის შესახებ. პრეზენტაციას რეგიონული განვითარებისა და ინფრასტრუქტურის მინისტრი დავით ნარმანია, მინისტრის მოადგილე თენგიზ შერგელაშვილი და USAID/MSI-ის წარმომადგენელი საქართველოში უილიამ კარტიე, ასევე, რეგიონული მართვის სამსახურის ხელმძღვანელი ირაკლი მელაშვილი ესწრებოდნენ.

“თვითმმართველობის დროა!” _ ამ დევიზით შექმნილია მრჩეველთა საზოგადოებრივი საბჭოს სამდივნო, რომლის მიზანია თვითმმართველობის მიმდინარე რეფორმის ხელშეწყობა და რეფორმაში ჩართული მონაწილეების მუშობის კოორდინაცია. მრჩეველთა საზოგადოებრივი საბჭოს სამდივნო ამერიკის შეერთებული შტატების საერთაშორისო განვითარების სააგენტოს (USAID) და მართვის საერთაშორისო სისტემების (MSI- Management Systems International) მხარდაჭერით შეიქმნა. პროექტს ახორციელებს ფონდი “ღია საზოგადოება-საქართველო”.

როგორც შეხვედრაზე ითქვა, სამდივნოს ფუნქციაა, უზრუნველყოს ინფორმაციის დროული და ადეკვატური მიწოდება და გაცვლა თვითმმართველობის რეფორმის პროცესში ჩართულ მონაწილეებს შორის. რეგიონული თვითმმართველობისა და ინფრასტრუქტურის მინისტრის ბრძანებულების საფუძველზე უკვე შექმნილია დამოუკიდებელი ორგანო – ადგილობრივი თვითმმართველობის მრჩეველთა საბჭო და სამუშო ჯგუფები. სწორედ მათ შორის ინფორმაციის გაცვლა და რეკომენდაციების მიწოდება ევალება მრჩეველთა საზოგადოებრივი საბჭოს ახლადშექმნილ სამდივნოს. ამ ინფორმაციას სამდივნო, ასევე, გადასცემს რეფორმის პროცესში ჩართულ აღმასრულებელ და საკანონმდებლო ორგანოს წევრებს, რაც, საბოლოო ჯამში, რეფორმის გამჭვირვალე მიმდინარეობას უზრუნველყოფს.

რეგიონული განვითარებისა და ინფრასტრუქტურის მინისტრმა დავით ნარმანიამ, თავის გამოსვლაში ისაუბრა, თუ რამდენად მნიშვნელოვანია ამ რეფორმის დროულად და შედეგიანად გახორციელება:

_ თვითმმართველობის ყოვლისმომცველი რეფორმის წამოწყება ყულფში თავის გაყოფაა, მაგრამ ვიღაცამ ხომ უნდა დაიწყოს და ყულფში გაყოს თავი?! პროცესები არც ნაჩქარევად უნდა განვითარდეს და არც ზედმეტად დაყოვნებაა სასურველი, რადგან წინ ძალიან ბევრი, დაძაბული სამუშაო გველის – თვითმმართველობის არჩევნებამდე არც ისე ბევრი დრო რჩება და ამ პერიოდში მთავრობაც, საზოგადოებაც რეალური თვითმმართველობის მშენებლობისთვის უნდა იყოს მზად, _ თქვა დავით ნარმანიამ.