დაკავებულები არიან ტელეკომპანია მეცხრე არხის რეპორტიორი ზვიად ხუჯაძე და ჟურნალ ლიბერალის ჟურნალისტი ანი ჭანკოტაძე. ორივე მედიასაშუალება აცხადებს, რომ მათი თანამშრომლები რუსთაველის გამზირზე პროფესიულ საქმიანობას ახორციელებდნენ, და ორივე მათგანმა შინაგან საქმეთა სამინისტროს თანამშრომლებს დაკავებისას განუმარტა, რომ ისინი ჟურნალისტები იყვნენ. რუსთაველის გამზირზე ინციდენტის დროს მყოფი ჟურნალისტები სამართალდამცველების მხრიდან ჟურნალისტურ საქმიანობაში ხელის შეშლის ფაქტებზეც საუბრობენ.
ჟურნალისტური ეთიკის ქარტია მიმართავს სამართალდამცველ ორგანოებს, იმოქმედონ კანონის შესაბამისად, არ შეუშალონ ხელი მედიის წარმომადგენლებს საკუთარი საქმიანობის განხორციელებაში და დროულად განუმარტონ საზოგადოებას რა აუცილებლობას წარმოადგენდა მათი მხრიდან ჟურნალისტების დაკავება.
ქარტია იმედს გამოთქვამს, რომ შინაგან საქმეთა სამინისტრო დაუყოვნებლივ გაათავისუფლებს დაკავებულ ჟურნალისტებს და მოუწოდებს სამართალდამცველებს, შეისწავლონ პოლიციელთა მხრიდან მედიის წარმომადგენელთა უფლების დარღვევის შესაძლო ფაქტები.
