_ “გუშინ ვუყურებდი ტელევიზორს. ხუხაშვილთან ჰქონდათ ინტერვიუ და ვიღაც ახალგაზრდა კაცთან, ფარესაშვილთან, რომელზეც რაღაც უჩვენებიათ. ეს რომ არ არის ახალი გუნდის სტილი და ხელწერა, მე მგონი ჟურნალისტებისთვის გასაგებია. ძალიან ჰგავს “ნაციონალური მოძრაობის” ხელწერას ეს ყველაფერი. აგებული სქემაა. ჯერ კადრები ჩაუწერეს ოდესღაც, მერე სწორად მიაწოდეს და მერე ეს გვარებიც. კითხვა უნდა დაისვას სწორად. როდესაც ფარესაშვილი მოიხსენიებს ხვედელიძეს, ნაცვლიშვილს, ხუხაშვილს და აგინებს, ვის უნდა ეს. როგორ ფიქრობთ თქვენ, ვისი სურვილია, რომ ეს ასე მოხდეს და განვითარდეს?! მგონი მისი დაგეგმილი და გაკეთებულია ეს ყველაფერი და ეს პიროვნება, მსხვერპლია იმ ძალადობის, იმ იდეოლოგიის, რაც, რამდენიმე წლის განმავლობაში ხორციელდებოდა საქართველოში” _ აღნიშნა პრემიერმა.
ამ განცხადებიდან ზუსტად ერთი კვირის შემდეგ კი გაირკვა, რომ კადრები შინაგან საქმეთა მინისტრის პირველმა მოადგილემ, გელა ხვედელიძემ გაავრცელა.
ამის შესახებ განცხადება ირაკლი ღარიბაშვილმა სპეციალურ ბრიფინგზე გააკეთა.
_ მე არ ვაპირებ ვიყო შინაგან საქმეთა მინისტრი, რომელიც ხელს აფარებს თავისი ოჯახის წევრებს, მეგობრებს, ნათესავებს და ჩაგრავს ხელქვეითს. საქართველოში ეს ეპოქა დასრულდა და დარწმუნებული ვარ არასდროს აღარ დაბრუნდება, _ აღნიშნა ირკალი ღარიბაშვილმა.
მინისტრის განმარტებით ყოველთვის იქნება თითოეული ადამიანის, კოლეგის დამცველი, მაგრამ კანონის დარღვევა არავის ეპატიება.
_ “არავის არასდროს უნდა ეპატიოს დანაშაულის ჩადენა. სწორედ ეს არის ისტორიულ, ევროპულ ოჯახში დაბრუნების ერთადერთი გზა“, – განაცხადა ღარიბაშვილმა და დასძინა _ “მე ვარ შინაგან საქმეთა მინისტრი და მაქვს ჩვეულებრივ მოქალაქეზე მეტი თმენის, და რაც მთავარია, ყოველგვარი ემოციების გარეშე გადაწყვეტილებების მიღების ვალდებულება. ამიტომ, რაც მოხდა, არის კანონისა და სამართლიანობის აღსრულება”.
ღარიბაშვილის თქმით, კადრები წინა ხელისუფლებამ ფარესაშვილზე ზემოქმედების მიზნით გადაიღო.
_ “ახალი ხელისუფლების მოსვლის შემდეგ, ეს და სხვა კადრები მიკვლეული იქნა და დაილუქა დადგენილი წესით. თუმცა არ გვაქვს იმის გარანტია, რომ წინა ხელისუფლების ხელში არ არის მათი ასლები. ამ და სხვა უკანონო კადრების უსაფრთხოების უზურნველყოფა მინდობილი ჰქონდა სხვებთან ერთად ჩემს ყოფილ მოადგილეს, გელა ხვედელიძეს. ჩემთვის არასასიამოვნო ფაქტია, მაგრამ ჩემმა პირველმა მოადგილემ, გელა ხვედელიძემ სამწუხაროდ ჩაიდინა არა მხოლოდ დანაშაული, არამედ შსს-ს თანაშრომლისთვის შეუფერებელი საქციელი. მან არაადეკვატურად და მტკივნეულად მიიღო მის მიმართ მედიით გავრცელებული სრულიად უსაფუძვლო ცილისმწამებლური განცხადებები და ფარესიშვილზე შურისძიების მოტივით დამოუკიდებლად გაავრცელა. მისი ფიქრით, ამგვარი ხერხით, შეწყდებოდა მის მიმართ წარმოებული ეს ცილისმწამბელური კამპანია” _ განაცხადა ღარიბაშვილმა.
ხვედელიძე დაკავებულია და მას ბრალი სისხლის სამართლის კოდექსის 157-ე მუხლის მე-2 ნაწილით გათვალისწინებული დანაშაულის ჩადენისთვის ედება.
შინაგან საქმეთა მინისტრის პირველი მოადგილის დაკავებას გამოეხმაურა ჟურნალისტი გიორგი ფარესაშვილიც. ტელეკომპანია “რუსთავი 2”-ის ეთერში საუბრისას ფარესაშვილმა აღნიშნა, რომ ხვედელიძის მსგავსად, მთავარი პროკურორის მოადგილე ლაშა ნაცვლიშვილიც უნდა დააკავონ.
_ “გელა ხვედელიძის დაკავება, ესაა სამართლიანობის გამარჯვების დასაწყისი. დარწმუნებული ვარ, ყველაფერი გაირკვევა. მოვითხოვ ლაშა ნაცვლიშვილმა გაიაროს ნარკოლოგიური შემოწმება იმიტომ, რომ დარწმუნებული ვარ, ლაშა ნაცვლიშვილიც უნდა მიჰყვეს გელა ხვედელიძეს. ეს იქნება სამართლიანობის ზეიმის მეორე ეტაპი”, – აღნიშნავს ფარესაშვილი, რომელიც მასალებს, რომელიც მას გია ხუხაშვილის, გელა ხვედელიძისა და ლაშა ნაცვლიშვილის დანაშაულებრივი ქმედებების შესახებ გააჩნია, გამოძიებას გადასცემს.
ხვედელიძის დაკავებას უკვე მოჰყვა გამოხმაურებები. საპარლამენტო უმცირესობის წევრი, გიორგი კანდელაკი ამბობს, რომ დაკავება სწორი საქციელია, თუმცა, რიგ შეკითხვებზე პასუხია გასაცემი:
_ ხვედელიძის დაკავება სწორი საქციელია და შექებას იმსახურებს. მიუხედავად ამისა რჩება კითხვები. კერძოდ: რატომ გვატყუებდა ბიძინა ივანიშვილი როცა მას ხელს აფარებდა და ყველაფერი ნაციონალური მოძრაობის შეთითხნილად შერაცხა? (მგონი მორიგი გადათქმა დროულია); რა აძლევს ღარიბაშვილს იმის მტკიცების საფუძველს როდის მოხდა კადრების გადაღება – მგონი ფარესაშვილმა ნათლად მიანიშნა ამ კადრების გადაღების დრო; თუკი სანდოა ფარესაშვილის მიერ ხვედელიძის მხილება, რატომ არაა სანდო მის მიერვე გენ პროკურორის პირველი მოადგილის ლაშა ნაცვლიშვილისა და დიდი ხუხაშვილისთვის ხელის დადება? მნიშვნელოვანი დეტალი: ღია პუტინისტის, ვალერი ხაბურძანიას ყოფილი მოადგილე და ახლო მეგობარი, ლაშა ნაცვლიშვილი უშიშროების საბჭოს მდივანმა, ხვედელიძესთან ერთად, დანიშვნის წინ ივანიშვილს საეჭვო წარსულის მქონედ და ეროვნული უსაფრთხოებისთვის არასასურველ პიროვნებად დაუსახელა; მაინტერესებს რას აკეთებს შს მინისტრი თბილისის საქალაქო სასამართლოს თავმჯდომარის თანაშემწის შსს-ს თანამშრომლების მიერვე (საქმის ნამდვილობა გენ პროკურორმა პირდაპირ ეთერში დაადასტურა) პირადი ცხოვრების ამსახველი უკანონოდ მოპოვებული კადრებით შანტაჟის საქმეზე-მოსამართლეზე (რომლის სასამართლოს გადაწყვეტილებებს საჯაროდ აბუჩად იგდებს იუსტიციის მინისტრი)? ამდენი თვე გავიდა და არანაირი პროგრესი რაც თავისთავად უაღრესად საეჭვოა; ამხელა პრეს კონფერენციაზე ნუთუ შს მინისტრმა საჭიროდ არ ჩათვალა პოზიციის დაფიქსირება პარლამენტის წევრებზე ფიზიკური ძალადობის ფაქტზე? ძალადობისგან არ გამიჯვნა მის წახალისებას წარმოადგენს, _ აღნიშნავს გიორგი კანდელაკი.
ექსპერტი პაატა შეშელიძე ამბობს, რომ თუ ხვედელიძეს ხელი მიუწვდებოდა დალუქულ კადრებზე და ერთ-ერთის ასლიც ჰქონდა, შესაძლოა, სხვაც ჰქონდეს.
_ თუ ხვედელიძეს ხელი მიუწვდებოდა დალუქულ კადრებზე და ერთ-ერთის ასლიც ჰქონდა, შესაძლოა, სხვაც ჰქონდეს და სხვებსაც ჰქონდეს. თუ ხვედელიძის გარდა, ამ საქმეში ნაცვლიშვილისა და ხუხაშვილის ჩართულობის ფარესაშვილისეულ ბრალდებას გავითვალისწინებთ, მაშინ სავარაუდოდ, იკვეთება თუ ვინ აწვდიდა პროკურატურიდან ინფორმაციას ყველაფეროლოგს და რა შინაარსის იყო მასთან დაბარებულ საქმოსანთა აღსარებები. ისე, სახელმწიფო ხარჯზე ორგანიზებულ უკანონო გადაღებებზე არავის მოეთხოვება პასუხი? _ ამბობს შეშელიძე.
ხვედელიძის დაკავებას სპეციალური ბრიფინგით გამოეხმაურნენ პრეზიდენტის ადმინისტრაციაში. ადმინისტრაციის უფროსი, ანდო ბარნოვი მოუწოდებს მთავრობას, დეტალურად გამოიძიონ ის კორუფციული ბრალდებები, რამაც ხვედელიძეს კადრების გამოქვეყნებისაკენ უბიძგა.
_ გვინდა საზოგადოებას შევახსენოთ, რომ რამდენიმე დღის წინ, როდესაც ერთ-ერთი ჟურნალისტის პირადი ცხოვრების ამსახველი კადრები გამოქვეყნდა, პრემიერ მინისტრმა, ყოველგვარი აპელირების გარეშე, პირდაპირ ხელი დაადო ნაციონალურ მოძრაობას და განაცხადეს, რომ კადრები ნაციონალური მოძრაობის მთავრობის მიერ იყო ჩაწერილი და ნაციონალური მოძრაობის წარმომადგენელთა მიერვე იქნა გამოქვეყნებული. ალბათ გახსოვთ, რომ პრემიერი, ჩვეულ სტილში, დაცინვით პასუხუმდა ჟურნალისტს, რომელმაც კითხვის დასმა გაუბედა.
ბუნებრივია, საზოგადოებისთვის სრულიად მიუღებელი აღმოჩნდა პრემიერის ეს მიდგომა და სწორედ საზოგადოების ზეწოლა და ნაციონალური მოძრაობის აქტივობა გახდა ის ძირითადი მიზეზი, რის გამოც დღეს მთავრობას უწევს, რომ იმჯის შენარჩუნების მიზნით გარკვეული მსხვერპლი გაიღოს.
უნდა ითქვას, რომ პრემიერმა პირდაპირ იცრუა, როდესაც მტკიცებით ფორმაში დაადანაშაულა ნაციონალური მოძრაობა. მისი რეაქცია გვიჩენს ეჭვს, რომ ის პირადაც იყო ინფორმირებული აღნიშნული კადრების გავრცელების დეტალების შესახებ, და მეტიც, დაინტერესებულიც კი იყო რეალობის დაფარვაში.
ამ ეჭვს გვიძლიერებს ის გარემოება, რომ თავად ფარესაშვილი კორუფციის უმძიმესი ფაქტების შესახებ ამხელდა პრემიერთან განსაკუთრებით დახლოებულ ორ პირს, ლაშა ნაცვლიშვილს და გია ხუხაშვილს.
ხოლო ჟურნალისტ ელისო კილაძისგან ვიცით, რომ მას მოეპოვებოდა ჩანაწერი იმის შესახებ, თუ როგორ ემუქრებოდნენ მაღალჩინოსნები ფარესაშვილის მეგობარს ჩანაწერების გამოქვეყნებით და ბუნებრივად გვიჩნდება კითხვა:
ჩანაწერის გამოქვეყნების ბრალი მართლაც მხოლოდ ხვედელიძის კისერზე რომ იყოს, რა ვუყოთ ფარესაშვილის იმ ბრალდებებს, რის გამოც ხვედელიძემ ამ ნაბიჯის გადადგმა გადაწყვიტა?
ეს ბრალდებები რომ უსაფუძვლო ყოფილიყო, ალბათ არც ხვედელიძე გამოაქვეყნებდა კადრებს და მეორეს მხრივ ფაქტია, რომ ფარესაშვილის ბრალდებაში ხუხაშვილი და ნაცვლიშვილი პირველ რიგებში ფიგურირებდნენ.
ამიტომ, ჩვენ გვაქვს საფუძვლიანი ეჭვი, რომ ივანიშვილმა უბრალოდ გაწირა მისთვის ნაკლებად მნიშვნელოვანი კადრი, რომ დანარჩენების დანაშაული დაეფარა.
ასევე მწუხარებით უნდა აღვნიშნოთ, რომ პრემიერმა პირდაპირ იცრუა და სცადა, შეცდომაში შეეყვანა საზოგადოება. მან სცადა, სიცრუეში გვაცხოვროს, სწორედ ისე, როგორც ძალიან ხშირად თვითონ აბრალებს ხოლმე ოპონენტებს.
რომ შევაჯამოთ, ჩვენი აზრით, დღეს მთავრობა მხოლოდ სახის შენარჩუნებისათვის იჭერს ერთ-ერთ ჩინოვნიკს. თუ მთავრობის მიზანი ობიექტურობაა, მაშინ მოვუწოდებთ მათ, რომ გამჭვირვალედ აწარმოონ გამოძიების პროცესი და დაანახონ საზოგადოებას, თუ საიდან დაასკვნეს, რომ თუნდაც ჩანაწერების გამოქვეყნების ეპიზოდში, აწ უკვე პრემიერის მრჩეველი ხუხაშვილი და მინისტრის მოადგილე ნაცვლიშვილი უდანაშაულონი არიან.
ასევე მოვუწოდებთ მთავრობას, დეტალურად გამოიძიონ ის კორუფციული ბრალდებები, რამაც ხვედელიძეს კადრების გამოქვეყნებისაკენ უბიძგა.
კიდევ ერთხელ შეგახსენებთ, რომ ამ ბრალდებების მთავარი ფიგურანტები პრემიერთან განსაკუთრებით დაახლოებული პირები – ნაცვლიშვილი და ხუხაშვილი არიან. სამწუხაროდ, მათ შესახებ გამოძიებას დღემდე კითხვები არ დაუსვამს, _ განაცხადა საქართველოს პრეზიდენტის ადმინისტრაციის უფროსმა.
