როგორც მოსახლეობა აცხადებს, ეკონომიკის სამინისტრომ აღნიშნული მიწის ნაკვეთი პირდაპირი მიყიდვის წესით გაასხვისა სენაკის სააქციო საზოგადოება “ტყირზე”- მეცხოველეობის ფერმაზე, რომლის ხელმძღვანელები შვედებთან ერთად იყვნენ სენაკელი ძმები ალანიები. როგორც აქციის მონაწილეები ამბობენ, მეწარმემ სანდრა რულოვსის ფონდში მოპოვებული გრანტით ჩამოიყვანა ჰოლანდიური ძროხები. სააქციო საზოგადოების ხელმძღვანელებს 3 მილიონის ინვესტიცია უნდა განეხორციელებინათ, ასევე უნდა დაესაქმებინათ 30 ადგილობრივი მუშა-ხელი.
აღნიშნული მიწის ნაკვეთის 50 ჰექტარ მიწას მოსახლეობა საძოვრად იყენებდა. ამ საძოვარზეა დამოკიდებული 400 მეტი ოჯახი. მოსახლეობა მიწის გაყიდვაზე ინფორმირებული არ იყო. როგორც საპროტესტო აქციის მონაწილეები აცხადებენ, 190-ჰექტარი მიწა გაიყიდა 1000 ლარად. მოსახლეობის განცხადებით, ამ შესყიდვებს ლობირებს “ქართული ოცნების” სამეგრელოს რეგიონის კოორდინატორი გაიოზ მონიავა.
თეკლათის თემის მოსახლეობის განცხადებით, გუშინდელი საპროტესტო აქციის დროს მათ მიერ საძოვრად გამოყენებული ფართობის დაცვისას, ხალხი პოლიციას გამოაყრევინეს მონიავას მითითებით. სამართალდამცველებმა ორი ახaლგაზრდა, კახა ლაშქარავა და ბადრი ჯანაშია დააკავეს, მაგრამ უფლებადამცველების ჩარევის შემდეგ გაანთავისუფლეს.
“გურია ნიუსი” დაუკავშირდა გაიოზ მონიავას და აღნიშნულ ბრალდებასთან დაკავშირებით კომენტარი სთხოვა.
_ ბატონო გაიოზ, სენაკის რაიონის თეკლათის თემში საპროტესტო აქცია მიმდინარეობს, ხალხი საძოვრის დაბრუნებას ითხოვს. აქციის მონაწილეებმა განაცხადეს, რომ გუშინ თქვენი მითითებით ისინი პოლიციის ძალით გაიყვანეს აღნიშნული ფართობიდან, აქციის ორი მონაწილე კი დააკავეს.
_ მე რა შუაში ვარ, ინვესტორმა მიმართა სენაკის პოლიციის უფროსს და მან გამოუშვა სამართალდამცველები. მე არაფერ შუაში ვარ ამ საქმესთან არც ახლა და არც არასდროს არანაირი კავშირი არ მქონია. მხოლოდ ის ვიცი, რომ შემოვიდა ინვესტორი, რომელსაც უნდა მესაქონლეობა განავითაროს, შემოჰყავს საქონელი, უნდა ხალხი დაასაქმოს, სასწავლო ცენტრს აშენებს, მიწა შეიძინა,
მოსახლეობა კი არ აძლევს ამ მიწის დახვნის და ათვისების უფლებას. გუშინაც მოსახლეობა ამ ფართობში შევარდა და არ მისცეს დახვნის საშუალება, ამიტომაც ინვესტორმა უჩივლა. კიდევ ვიმეორებ, მე არაფერ შუაში ვარ, მოგონილი ჭორია, თითქოს ამ საქმესთან რაიმე კავშირი მქონდეს, ვიღაც ბინძურ ჭორებს მივრცელებს, მეტი არაფერი.
აქციაზე მოსახლეობასთან რაიონის და თემის ხელმძღვანელებიც მივიდნენ. თეკლათის თემის გამგებელმა ზურაბ ტყებუჩავამ განაცხადა, რომ ეს მიწა ეკონომიკის სამინისტროს მიერ პირდაპირი მიყიდვის წესით არის გასხვისებული და მოსახლეობა ნამდვილად არ იყო ინფორმირებული ამის თაობაზე.
აქციის მონაწილეები აცხადებენ, რომ საპროტესტო აქციებს ახლა უკვე ქუთაისში, პარლამენტის წინ გააგრძელებენ.ისინი მიმართვას ამზადებენ პრემიერ-მინისტრის ბიძინა ივანიშვილის სახელზე და დახმარებას სთხოვენ.
