თუმცა, აღნიშნავს, რომ პარტია არჩევნებში ყველა მიზეზგარეშე მიიღებს მონაწილეობას და პრემიერის ოცნებას, რომ “ნაციონალური მოძრაობა” აღიგავოს პირისაგან მიწისა, ასრულება არ უწერია. თევდორაძე მიიჩნევს, რომ პრაიმერი ქვეყნისთვის სიახლეა და ამ კულტურის დამკვიდრებას ქვეყანაში სწორედ “ნაციონალური მოძრაობა” შეუწყობს ხელს.
“მისასალმებელია ის ფაქტი, რომ ეს პროცესი იწყება ჩვენი მშობლიური ქალაქიდან _ ქუთაისიდან. მე არ მინდა წინასწარმეტყველება დავიწყო, მაგრამ, არ მგონია, პრემიერ-მინისტრის ტკბილ ოცნებას, რომ “ნაციონალური მოძრაობა” ვერ გადალახავს ბარიერს და ვერ მიიღებს მონაწილეობას არჩევნების მეორე ტურში, რომ ლამის უნდა, პირისაგან მიწისა აღიგავოს ჩვენი პოლიტიკური ორგანიზაცია, რა თქმა უნდა, აღსრულება არ უწერია. “ნაციონალური მოძრაობის” შანსები საპრეზიდენტო არჩევნებში იქნება და არის დამოკიდებული იმ პროცესებზე, რომელიც ქვეყანაში შეიძლება განვითარდეს. რა თქმა უნდა, თუ ხელისუფლებას ექნება შანსი, რომ წარმატებული ნაბიჯები გადადგას ქვეყნის განვითარების თვალსაზრისით, მაშინ ჩვენი მოსახლეობა და ელექტორატი ცალსახად სიმპათიით იქნება განმსჭვალული ქვეყნის ხელისუფლების მიმართ. სხვა შემთხვევაში, ოპოზიციურ სპექტრს ექნება გაცილებით მეტი გასაქანი. ამის შეფასება იმ ფონზე, როცა ქვეყანაში პოლიტიკური პროცესები დინამიურად მიმდინარეობს, 4 თვით ადრე ცოტა რთულია, მაგრამ ყოველ მიზეზგარეშე ჩვენ ვაპირებთ მონაწილეობას საპრეზიდენტო და ვფიქრობ, ეს მონაწილეობა არ იქნება ჩვენი პარტიის იმიჯის შემლახველი. რაც ყველაზე მთავარია და მნიშვნელოვანია, ვფიქრობთ რომ ეს პროცესები თანამედროვე სტანდარტებით ვაწარმოოთ, რისი დასტურიც დღევანდელი პრაიმერია. ამით ქართველ ამომრჩეველს აბსოლუტურად ახალ კულტურას მივაჩვევთ,” _ განაცხადა საპარლამენტო უმცირესობის წევრმა გია თევდორაძემ “გურია ნიუსთან” საუბრისას.
გია თევდორაძე აღიარებს, რომ დავით ბაქრაძე პრაიმერში მონაწილე დანარჩენ კანდიდატებს შორის უპირობო ლიდერია, რადგან, მისი თქმით, ის გაწონასწორებული პოლიტიკოსია და დიდი გამოცდილება აქვს მართვის კუთხით. თუმცა, ასევე მიიჩნევს რომ სხვა კანდიდატებსაც საკმაოდ ძლიერი მხარეები გააჩნიათ იმისთვის, რომ წარდგენილნი იყვნენ საპრეზიდენტო არჩევნებში. თევდორაძე არასწორად მიიჩნევს საზოგადოების დამოკიდებულებას შოთა მალაშხიას კანდიდიდატურასთან დაკავშირებით. მისი თქმით, მალაშხია საკმაოდ სერიოზული კადრია ქვეყნის დეოკუპაციის საკითხებში და მას შეუძლია მშვიდობიანი გზებით მოახერხოს ამ პრობლემის გადაჭრა. ასევე, ძლიერ კანდიდატებად მიიჩნევს ის ეკონომიკის საკითხებში ზურაბ ჯაფარიძეს და ქვეყნის დეკრიმინალიზაციის საკითხებში _ გია ბარამიძეს: “მე არ ვეთანხმები ამ ადამიანებს ვინც მიიჩნევენ, რომ შოთა მალაშხია არ უნდა ყოფილიყო პარტიის ერთ-ერთ კანდიდატი. თითოეულ ჩვენს კანდიდატს აქვთ თავისი ძლიერი მხარე. დავიწყებ შოთა მალაშხიათი _ იგი არის ჩვენი ოკუპირებული ტერიტორიიდან _ აფხაზეთიდან. კარგად იცნობს ამ პრობლემას და აქტიურად არის ჩართული დეოკუპაციის პროცესში. ამიტომ იმ ადამიანებისთვის, რომლებიც თვლიან, რომ საქართველოს პრეზიდენტის ერთ-ერთი მთავარი პრიორიტეტი დეოკუპაციის საკითხის მოგვარება უნდა იყოს და ეს მშვიდობიანი და ცივილური გზით იქნას მიღწეული, ვფიქრობ, შოთა მალაშხია საუკეთესო კანდიდატია. ზურაბ ჯაფარიძე ეკონომისტია და ერთ-ერთი სერიოზული პრობლემა, რომელიც დღეს ქვეყანას გააჩნია, არის ეკონომიკური განვითარების ტენდენციები. ზურას ცოდნა, გამოცდილება და მისი პროფესიონალიზმი არის ძალიან მნიშვნელოვანი პირობა, რისთვისაც იგი წარდგენილია საპრეზიდენტო კანდიდატად. გია ბარამიძე არის ადამიანი, რომელმაც პირველმა დაიწყო ბრძოლა მისი შინაგან საქმეთა მინისტრობის დროს კრიმინალის წინააღმდეგ. ბარამიძის დროს დაიწყო ის პროცესები, რამაც ქვეყანას საშუალება მისცა ეფექტური პოლიტიკა ეწარმოებინა ქვეყნის დეკრიმინალიზაციის მიმართულებით. გია ბარამიძე იყო ჩართული ნატოში ინტეგრაციის საკითხებში, როგორც ქვეყნის სახელმწიფო მინისტრი. რაც შეეხება დავით ბაქრაძეს, გულწრფელად მინდა ვთქვა, რომ სხვა კანდიდატებთან შედარებით უდავო ლიდერია. დათო არის ძალიან გაწონასწორებული პოლიტიკოსი, იყო პარლამენტის ყოფილი თავმჯდომარე. ამიტომ, ვფიქრობ, მას ძალიან დიდი გამოცდილება აქვს ქვეყნის მართვის კუთხით,” _განაცხადა “გურია ნიუსთან” საუბრისას გია თევდორაძემ.
