თუმცა, უკვე ერთი წელია აღარც ეს დაწესებულება ფუნქციონირებს. ბავშვთა სახლის ყოფილი დირექტორის როინ შენგელიას განცხადებით, სახლის დახურვის შემდეგ, აღსაზრდელების ნაწილი ბიოლოგიურ ოჯახებს დაუბრუნდა, ნაწილი კი ჩხოროწყუსა და წალენჯიხაში არსებულ საოჯახო ტიპის სახლებში გადაიყვანეს, შამგონის სკოლის შენობა კი ეკონომიკის სამინისტროს ბაზაზე დარეგისტრირდა.
ბავშვთა სახლის დახურვის შემდეგ, შენობა უპატრონოდ იქნა მიტოვებული, სწორედ ამიტომ ყოფილი თანამშრომლები უწევდნენ მეთვალყურეობას და გაპარტახებისგან გადარჩენას ცდილობდნენ.
სკოლა-ინტერნატის დახურვის შემდეგ, მოსწავლეებს შორ გზაზე უწევთ სიარული განათლების მისაღებად, რაც საკმაოდ რთულია, განსაკუთრებით, ზამთრის პერიოდში. პედაგოგებიც მიიჩნევენ, რომ შამგონაში საგანმანათლებლო დაწესებულების ფუნქციონირება მნიშვნელოვანია, რადგან საზღვრისპირა ტერიტორიაზე სკოლის გახსნის შემთხვევაში, ოთხი სოფლის მოსახლეობა განათლების მიღებას შეძლებს, სწორედ ამიტომ სოფლის მოსახლეობა გაუქმებული სკოლა-ინტერნატის აღდგენას და საპატრიარქოსთვის გადაცემას ითხოვს _ მათ გადაწყვიტეს, მიმართონ ეკონომიკისა და მდგრადი განვითარების სამინისტროს წერილით, რომელსაც მისახლეობასთან ერთად ხელს არასამთავრობო სექტორის წარმომადგენლებიც აწერენ.
აღსანიშნავია, რომ ანალოგიური მოთხოვნით, ერთი წლის წინ, ეკონომიკის სამინისტროს საპატრიარქომ უკვე მიმართა. წერილში, რომელიც ეკონომიკის და მდგრადი განვითარების მინისტრის და ვიცე-პრემიერის, გიორგი კვირიკაშვილის სახელზე იყო გაგზავნილი წერია: “ზუგდიდ-ცაიშის ეპარქიამ სურვილი გამოთქვა, რომ ყოფილი სკოლა-ინტერნატის ბაზაზე გახსნილიყო ახალი ტიპის სკოლა-პანსიონი, სადაც აღსაზრდელები არამარტო სასკოლო დისციპლინებს, არამედ ტრადიციულ ქართული ხალხური რეწვას, ხატვას, ხეზე და ქვაზე კვეთას დაეუფლებოდნენ. მსგავსი ტიპის სკოლა-პანსიონები საპატრიარქოს პატრონაჟით ქვეყნის თითქმის ყველა რეგიონშია გახსნილი. თანხმობის შემდეგ, საპატრიარქო მზად არის, თანამშრომელთა სახელფასო ანაზღაურება, კვების და აღსაზრდელების შესაბამისად უზრუნველყოფის თანხები საკუთარი ბიუჯეტიდან დაფაროს”.
წერილზე პასუხი ამ დრომდე არ არის. მიზეზად ეკონომიკის სამინისტროში აცხადებენ, რომ რამდენიმე თვის წინ შექმნილი კომისია, რომელსაც საპატრიარქოს მიერ მოწოდებული საკითხები უნდა განეხილა, ჯერ არ შეკრებილა. თუმცა, იმასაც ამბობენ, რომ თუკი საპატრიარქო აღნიშნულ საკითხს მინისტრის მოადგილესთან შეათანხმებს, შესაძლოა შენობის გადმოცემის თემა პირველივე შეკრებაზე განიხილონ, მიუხედავად იმისა, რომ საპატრიარქოდან მოწოდებულია უკვე 37 განსახილველი საკითხი.
მოსახლეობა იმედს არ კარგავს და ამ დღეებში წერილს ბიძინა ივანიშვილს გაუგზავნიან. არასრულწლოვანთა დაცვის და განვითარების ცენტრის” ხელმძღვანელი ირაკლი ნიშნიანიძე ამბობს, რომ იმედი აქვს ეს წერილი აუცილებლად მიაღწევს ბიძინა ივანიშვილამდე და პრემიერ-მინისტრი სათანადო რეაგირებას მოახდენს ამ საკითხზე.
არასამთავრობო ორგანიზაციის “ქალები მშვიდობისა და სამართლიანობისთვის” წარმომადგენელი ინგა ქარდავა ამბობს, რომ ბოლომდე იბრძოლებენ მიზნის მისაღწევად: “ეს სკოლა არის უნიკალური და უძველესი, ამიტომაც ჩვენ ყველაფერს გავაკეთებთ იმისთვის, რომ იქ სწავლა აღსდგეს. მთავარი ისაა, რომ სკოლას გააჩნია ბაზა მოსწავლეთა მისაღებად. გავერთიანდით სამეგრელოში მოქმედი ათი არასამთავრობო ორგანიზაცია, მოსახლეობა და ვითხოვთ სკოლის საპატრიარქოსთვის გადაცემას. ერთობით ამას აუცილებლად მივაღწევთ”.
სკოლა-ინტერნატის ყოფილი დირექტორი როინ შენგელია საკმაოდ იმედიანად არის განწყობილი, რადგან მისი განცხადებით, საზოგადოების დიდი მხარდაჭერაა, უკვე არსებობენ სპონსორებიც და მთავარი მხოლოდ პროექტის დაჩქარებაა: “პროექტი გამზადებული აქვს საქართველოს საპატრიარქოს, მოთხოვნა გადაგზავნილია ეკონომიკის სამინისტროში, საზოგადოება მზადაა მხარი დაუჭიროს ამ პროექტს, არიან სპონსორებიც. გვაქვს რამდენიმე საერთაშორისო ორგანიზაციის თანხმობა, რომ ახალ დაწესებულებას კვების ობიექტის გასაახლებლად თანამედროვე დანადგარებს გადმოსცემენ; გარდა ამისა, ველოდებით უცხოელი პარტნიორებისგან შენობის რეკონსტრუქციისთვის საჭირო თანხით დახმარებას. ჩვენ ვითხოვთ, დაჩქარდეს ამ პროექტის გახორციელება და ხელი შევუწყოთ მომავალი თაობების პირობების გაუმჯობესებას.”
სკოლის აღდგენის მოთხოვნა საქართველოს პრემიერ-მინისტრს, ბიძინა ივანიშვილს ამ დღეებში გადაეგზავნება.
