ზუსტად ოთხი თვის წინ, 24 ივნისს “ქართული ფოლადის” ოფისის აფეთქებას ორი ადამიანის სიცოცხლე შეეწირა. ალეკო მაისურაძე ადგილზე გარდაიცვალა, ზაზა ნინიძე კი ორი დღის შემდეგ – საავადმყოფოში.
“სამართლიანობა აღდგება და ნურავის ექნება პრეტენზია და ილუზია, რომ რაიმეს შეძლებს. ჩვენ რთულ და სამართლებრივად სწორ გზას დავადექით. მაქინაციებითა და ძალადობით წართმეულს სასამართლოსა და კანონის გზით ვიბრუნებთ. საზოგადოებამ უნდა გაიგოს რა ხელშეკრულებას მოაწერა ხელი ინა გუდავაძემ და მიხეილ სააკაშვილის ხელისუფლებამ 2011 წლის 6 ივლისს. როგორ და რა მაქინაციებით მოიპარეს ბიუჯეტიდან 39 მილიონი ლარი და უმთავრესი – ვინ დაგეგმა და განახორციელა მიმდინარე წლის 24 ივნისს “ქართული ფოლადის” ოფისის აფეთქება, რასაც ჩვენი მეგობრების, ალეკო მაისურაძისა და ზაზა ნინიძის სიცოცხლე შეეწირა”, – აცხადებს “ქართული ფოლადის” დირექტორი ნათია ჯაყელი.
მას შემდეგ, რაც “ქართულმა ფოლადმა” სასამართლო დავა მოიგო ვითარება კიდევ უფრო მეტად დაიძაბა. პატარკაციშვილის ოჯახმა სასამართლო ტენდენციურობაში დაადანაშაულა და განაცხადეს, რომ “რუსთავის ფოლადი” მათ უკანონოდ ჩამოართვეს.
პატარკაციშვილების ოჯახი მომხდარ აფეთქებასთან რაიმე კავშირს კატეგორიულად უარყოფს. გარდაცვლილი ბიზნესმენის, ბადრი პატარკაციშვილის ოჯახის ადვოკატი, ლაშა ბირკაია “ქართული ფოლადის” ოფისში მომხდარი აფეთქების ინა გუდავაძის ინტერესებთან დაკავშირებას “აბსურდს” უწოდებს.
გაცილებით მეტი, ვიდრე “უბედური შემთხვევა”…
ფაქტად რჩება ის, რომ ორივე დაღუპული ზაზა ნინიძეც და ალეკო მაისურაძეც აქტიურად იყვნენ ჩართულები “ქართული ფოლადის” დაბრუნების საქმეში და ტრაგედიამდე რამდენიმე საათით ადრე ისინი თანამშრომლებს დაუკავშირდნენ და ოფისში შეხვედრა სწორედ ამ თემაზე სასაუბროდ სთხოვეს. შეხვედრაზე უნდა მისულიყო “ქართული ფოლადის” დირექტორი ნათია ჯაყელიც, რომელსაც გაუთვალისწინებელი შემთხვევის გამო დააგვიანდა.
“უბედური შემთხვევა” _ ასე დაკვალიფიცირდა თავიდან მომხდარი ფაქტი. თუმცა, დეტალები, რომელსაც “გურია ნიუსი” ექსკლუზიურად წარმოგიდგენთ, გაცილებით მეტზე მეტყველებს, ვიდრე ერთი შეხედვით “უბრალო შემთხვევაზე”… ყველაზე საინტერესო დეტალი კი ის გახლავთ, რომ გაზი, რისი საშუალებითაც ოფისში აფეთქება მოხდა, შემთხვევის ადგილას საერთოდ არ იყო გაყვანილი.
ებრაელი ექსპერტები ზოჰარ გალპაზი და ავი შთაინფილდი, რომლებიც ასაფეთქებელი ნივთიერებებისა და ბომბის გაუვნებელყოფის სპეციალისტები არიან სპეციალურად მოიწვიეს იმისთვის, რომ დაედგინათ, როგორ აღმოჩნდა გაზი ოფისში.
27 ივნისიდან 1 ივლისამდე, ასაფეთქებელი ნივთიერებებისა და ბომბის გაუვნებელყოფის მთავარი ექსპერტების, ზოჰარ გალპაზისა და ავი შთაინფილდის ხელმძღვანელობით საგანგებო ჯგუფი იძიებდა უბედურ შემთხვევას იმის დასადგენად, თუ რა გარემოებებში და რა მიზეზით მოხდა აფეთქება.
ჯგუფმა დაასკვნა რომ: აფეთქება გამოიწვია შენობაში გაზის განზრახ გაშვებამ, რაც ჩადენილ იქნა ბოროტი განზრახვით, რომელიც მიზნად ისახავდა ზიანის მიყენებასა და მსხვერპლს.
საბოლოო დასკვნა ეფუძნება შემდეგ ინფორმაციას:
- ჯგუფმა ადგილზე ვერ აღმოაჩინა ასაფეთქებელი ნივთიერებები;
- ჯგუფმა გამორიცხა გაზის ტექნიკური მიზეზით გაჟონვა;
- პოლიციისგან მიღებული და სხვა ინფორმაციის მიხედვით ოთახში გაზი შევიდა უკანა ფანჯარაში შეყოფილი, გაზის ონკანთან მიერთებული მილით;
- ჩვენება მიუთითებს, რომ გარდაცვლილი თანამშრომლების მისვლამდე, უკანა ფანჯარა დაკეტილი იყო, ხოლო შემდეგ იგი გაიხსნა ოთახის გასანიავებლად;
- გაზი ოთახში შეუშვეს გარდაცვლილი თანამშრომლების იქ ყოფნისას.
ჯგუფის წევრები, რომლებსაც ასაფეთქებელი ნივთიერებებისა და იმპროვიზირებული ასაფეთქებელი ხელსაწყოების გაუვნებელყოფის 28 წლიანი გამოცდილება გააჩნიათ, თავიანთი დასკვნაში წერენ:
“შენობის უკანა ეზოში იყო თხრილში ჩადებული გაზის მთავარი მილი. თხრილი მთავარი შენობის გვერდითაა.
ცენტრალური მილის ბოლოს არის უფრო მცირე დიამეტრის ლითონის მილი ორი ონკანით. პირველ ონკანზე სტანდარტული მიერთებით არის მიერთებული ახალი ყვითელი მილი, რომელიც მიემართება მთავარი შენობისკენ. მეორე ონკანიდან მოხსნილია გაზის ჩამკეტი. მის გასახსნელად ან დასაკეტად საჭიროა შესაბამისი ხელსაწყო ან, თუნდაც მონეტა. ჩვენი გამოძიების დროს ამ ონკანთან მილი არ იყო მიერთებული.”
ჯგუფის მიერ ჩატარებული ექსპერტიზის მიხედვით, შემთხვევის ადგილზე სტანდარტული თუ ხელნაკეთი ასაფეთქებელი საშუალების გამოყენება არ შეინიშნებოდა.
“კარიდან მარცხნივ აღმოჩენილი დიდი, სისხლისმაგვარი ლაქების მიხედვით შეგვიძლია დავასკვნათ, რომ ერთ-ერთი მსხვერპლი, რომელიც აფეთქებამ კედელს მიანარცხა, კარის წინ დაეცა.
ძალზე სავარაუდოა, რომ ოთახში მყოფი მეორე პირი აფეთქების მომენტში სამზარეულოსთან ახლოს იყო. იატაკზე ნაპოვნი დანახშირებული ნაფეხურების მიხედვით, იგი დიდი ნაბიჯებით მიემართებოდა კარისკენ, რაც ნიშანია იმის რომ კაცი მირბოდა. ვინაიდან პირველი მსხვერპლის სხეულმა მას კარიდან გასვლის საშუალება არ მისცა, იგი ფანჯრიდან გადავიდა. ფანჯრის ძირში და კედელზე ხელის ნაკვალევი ჩანს.
იმ ადგილთან ახლოს, სადაც მსხვერპლს ცეცხლი წაეკიდა, აღმოჩენილია მისი პირადი დოკუმენტები. როგორც ჩანს, ეს ნივთები მას ამოუვარდა როცა იგი ცეცხლის ალმა მოიცვა”.
მოწმეთა ჩვენებები _ კუსტარული გაზის მილი
ჯგუფის წევრების მიერ გამოძიებისას დაიკითხნენ მოწმეები, რომლებიც აფეთქებისა და ხანძრის დროს შემთხვევის ადგილზე იმყოფებოდნენ.
ოფისის მფლობელის დაკითხვამ გამოამჟღავნა, რომ ოფისში გაზი არ იყო შეყვანილი, ვინაიდან უბედურ შემთხვევამდე დაახლოებით სამი კვირით ადრე გაზის სისტემა ჩახსნეს სრულიად ახალი სისტემის დასამონტაჟებლად.
ოფისის მფლობელის ქალიშვილმა, რომელიც შემთხვევის ადგილას აფეთქების შემდეგ პირველი მივიდა, თქვა, რომ ერთ-ერთი მსხვერპლი შენობიდან თვითონ გამოიქცა.
ოფისმენეჯერმა ცალსახად განაცხადა, რომ ფანჯარა მეორე სართულზე დაკეტილი იყო, როდესაც იგი გავიდა ოფისიდან და, რომ მეორე სართულზე მის გარდა არავინ არ ადიოდა.
ოფისმენეჯერის ჩვენებიდან ჩანს, რომ ზედა ფანჯარა, რომელშიც გზის მილი შეიყვანეს, ოფისიდან მისი გასვლისას დაკეტილი იყო. როდის და ვინ გააღო იგი? მსხვერპლთა სატელეფონო საუბრებიდან ჩანს, რომ ფანჯარა მათ გააღეს ოთახის გასანიავებლად.
“მტკიცებულებებზე და ჩვენებებზე დაყრდნობით დავასკვენით, რომ გაზი ოთახში ბოროტი განზრახვით ფანჯრიდან იყო შეყვანილი. მილის მიერთება ონკანთან, მისი გახსნა და გაზის შეყვანა ოთახში არ შეიძლება იყოს შემთხვევითობა ან დაუდევრობა. ძნელია ვინმემ გათვალოს თუ ზუსტად როდის აფეთქდება გაზი, მაგრამ ვინაიდან გაზი უსუნო და უფერულია, იგი განდევნის ჰაერს და იწვევს მსხვერპლთა მოწამვლასა და გაგუდვას.
ზუსტად ვერ განვსაზღვრეთ, თუ რამ წარმოქმნა აფეთქების გამომწვევი ნაპერწკალი ან ალი. შესაძლოა, ეს მოხდა შემთხვევის ადგილას განთავსებული ელექტროხელსაწყოების ჩართვის ან სიგარეტის მოკიდების შედეგად.
მაგრამ ვერ გამოვრიცხავთ, რომ ბოროტმოქმედმა შეაგროვა ინფორმაცია და დაგეგმა დანაშაული, ვინაიდან ამგვარი ქმედება გარემოს ცნობასა და სამზადისს საჭიროებს.” _ ასეთია მოწვეული და საკმაოდ მაღალი კვალიფიკაციის მქონე ექსპერტების დასკვნა, თუმცა საბოლოო პასუხი ქართველმა სამართალდამცველებმა უნდა დადონ.
გაჟღერდა ინფორმაცია იმის შესახებაც, რომ აფეთქებამდე ერთი დღით ადრე, შემთხვევის ადგილის გარშემო უცნობი კაცი დადიოდა.
რა გაკეთდა იმისთვის, რათა დადგენილიყო შეყვანილი მილის წარმომავლობა? არსებობს თუ არა მტკიცებულება, რომ ეჭვმიტანილი დადიოდა შემთხვევის ადგილას? ამოღებული იქნა თუ არა შემთხვევის ადგილთან ახლოს მდებარე ყველა სათვალთვალო კამერიდან ჩანაწერები? მოიძიეს თუ არა დეტალური ინფორმაცია იმ ადამიანზე, რომელმაც გამოიღო გაზის მილი და აგრეთვე იმაზე, რომელმაც აღმოაჩინა ეს მილი?
მთავარ პროკურატურის საზოგადოებასთან ურთიერთობის დეპარტამენტის ხელმძღვანელმა ხათუნა პაიჭაძემ გაგვიცხადა, რომ საქმეზე ინტენსიური გამოძიება მიმდინარეობს და ყველა შესაძლო ვერსია განიხილება. მისივე თქმით, გამოძიება ექსპერტიზის პასუხებს ელოდება, რის შემდეგაც კონკრეტული დასკვნების გაკეთების საშუალება იქნება.
მანამდე კი რჩება ერთი მთავარი კითხვა _ ვინ დგას ამ ტრაგედიის უკან? ტრაგედიის, რომლის “უბედურ შემთხვევად მონათვლა” შესაძლოა, სწორედ დამკვეთების ინტერესებში შედიოდეს.
“გურია ნიუსი” ამ თემას კიდევ ერთხელ მიუბრუნდება…
