“ახალი მთავრობის დროს ბევრმა პოლიტპატიმარმა დატოვა საპყრობილე და მინდა გითხრათ, არიან ისეთებიც, რომლებსაც ეს სტატუსი ნამდვილად არ მიესადაგებათ. არჩილ ბენიძის საქმე კი ერთი ნაბიჯითაც არ წაწეულა წინ. მას იტალიის მთავრობამ მიანიჭა პოლიტიკური დევნილის სტატუსი, ჩვენი ქვეყნის ხელისუფლება კი არაფერს აკეთებს საქმის გამოსაძიებლად და მისთვის ბრალდების მოსახსნელად. ახლა წინ გველოდება საკმაოდ მნიშვნელოვანი ვილნიუსის სამიტი, ამიტომ არ გვინდა რაიმე ვავნოთ ქვეყნის რეპუტაციას და თავს ვიკავებთ ყოველგვარი მოთხოვნებისა და მიმართვებისგან. ამ ეტაპზე მხოლოდ პროკურატურას მივმართავთ დაიწყოს ბენიძის საქმის შესწავლა. დღეს, როცა რუსეთიც კი აღარ ეწინააღმდეგება საქართველოს გაწევრიანებას ევროკავშირში, ჩნდება რეალური შანსები ევროპისკენ წაწევისა. ამიტომ, დაველოდებით სამიტს, შემდეგ კი თუ კიდევ არ იქნა მთავრობის მიერ რეაგირება ბენიძესთან დაკავშირებით, მივმართავთ სათანადო ზომებს,” _ აცხადებს შატბერაშვილი.
ამასთან, როგორც მან აღნიშნა, საპრეზიდენტო არჩევნებში მათ არ ჰყავდათ კანდიდატი და არც ერთი ძალისთვის არ დაუჭერიათ მხარი, სწორედ ეს იყო მიზეზი იმისა, რომ არ ჩანდნენ აქტიურად პოლიტიკურ ასპარეზზე. შატბერაშვილმა განაცხადა, რომ ადგილობრივი თვითმმართველობის არჩევნებზე გამარჯვების მოპოვებას ეცდებიან.
“ჩვენ გვაქვს უკვე მკაფიოდ ჩამოყალიბებული მიზანი – მივიღოთ ადგილობრივი თვითმმართველობის არჩევნებში მონაწილეობა და ხალხის გადაწყვეტილებით დავიკავოთ ადგილები საკრებულოებში, რათა ვიმუშავოთ ქვეყნის უკეთესი მომავლისთვის. ასე რომ, სანამ გამოცხადდება საარჩევნი კამპანია, ჩვენი პარტია იქამდე ჩაერთვება აქტიურად პოლიტიკურ ცხოვრებაში. კიდევ ერთი, ჩვენ ვითხოვთ რიგგარეშე საპარლამენტო არჩევნების დანიშვნას და ვემზადებით კიდეც მონაწილეობის მისაღებად,” _ აღნიშნავს შატბერაშვილი.
მისივე განცხადებით, საქართველოს უახლოეს ისტორიაში პირველად მოხდა 2012–2013 წლებში ხელისუფლების მშვიდობიანი ცვლა.
“ჩატარდა არჩევნები და ხელისუფლება შეიცვალა მშვიდობიანი გზით. იყო დარღვევები, არჩევნები ისევ ძველი, გაბერილი სიებით ჩატარდა, არ იყო შეცვლილი საარჩევნო სისტემა, მაგრამ ჯამში, ეს არჩევნები მიახლოებული იყო ევროპული სტანდარტების არჩევნებთან. კიდევ ერთი მნიშვნელოვანი მოვლენა იყო ის, რომ დამარცხებულთა უმრავლესობამ გამარჯვება მიულოცა მომავალ პრეზიდენტს,” _ აღნიშნა შატბერაშვილმა.
ბრიფინგის დასასრულს, “მემარცხენე ალიანსის” ლიდერი ხუდონჰესის თემასაც შეეხო და “ქართულ ოცნებას” წინასაარჩევნო დაპირების – ყველა გიგანტური ჰესის მშენებლობის შეჩერება, შესრულება კიდევ ერთხელ მოსთხოვა.
