დავით ნარმანიამ სტუმრებს სამინისტროს 2014-2017 წლების სამოქმედო გეგმა გააცნო. შეხვედრაზე ხაზი გაესვა მსოფლიო ბანკის აქტიური ჩართულობის მნიშვნელობას, როგორც საგზაო სექტორში, ასევე მუნიციპალური და რეგიონული პროექტების განხორციელებისას.
გამოიკვეთა სამომავლო პრიორიტეტებიც: რეგიონებში თანამედროვე ტექნოლოგიებისა და ინოვაციების დანერგვა; ინსტიტუციური განვითარება; სამინისტროს თანამშრომლების გადამზადება და მათი პროფესიული დონის ამაღლება.
“მსოფლიო ბანკი მუშაობს ქვეყნის პარტნიორობის მომდევნო 4 წლის სამოქმედო გეგმაზე და მნიშვნელოვანია, მასში ჩვენი სამინისტროს ძირითადი აქტივობები მოხვდეს, მითუმეტეს, რომ ჩვენი სამინისტრო მსოფლიო ბანკის პროგრამების ერთ-ერთი ყველაზე მსხვილი განმახორციელებელია”, _ განაცხადა დავით ნარმანიამ.
“ჩვენ მივაწოდეთ სტუმრებს დეტალური ინფორმაცია იმის თაობაზე, თუ რა პრიორიტეტები გვექნება მომდევნო 4 წლის განმავლობაში. ეს გაწერილია ჩვენი სამინისტროს 2014-2017 წლების სტრატეგიაში, რომელზეც მუშაობა ახლახანს დავასრულეთ. ჩვენთვის მთავარია, მსოფლიო ბანკის მხრიდან არ შეგვიმცირდეს ინფრასტრუქტურული პროექტების პორტფელი, პარალელურად, ვიმუშაოთ რეგიონულ განვითარებასთან დაკავშირებულ საკითხებზეც. ასევე მნიშვნელოვანია, თვითმმართველობის რეფორმის განხორციელების პროცესში მსოფლიო ბანკის ჩართულობაც; ჩვენ ვთხოვეთ მსოფლიო ბანკს, დაგვეხმაროს ინსტიტუციურ განვითარებაში როგორიცაა – ახალი სტანდარტების შემუშავება, პროექტების მართვის მოდულის შემუშავება და ა.შ.”
როგორც სამხრეთ კავკასიაში მსოფლიო ბანკის რეგიონულმა დირექტორმა აღნიშნა, შეხვედრამ შედეგიანად ჩაიარა.
“საქართველოს რეგიონული განვითარებისა და ინფრასტრუქტურის მინისტრთან დღეს საკმაოდ ნაყოფიერი შეხვედრა გვქონდა”, _ განაცხადა ჰენრი კერალმა.
“მსოფლიო ბანკი ამჟამად საქართველოსთან ურთიერთთანამშრომლობის სტრატეგიის განხილვის პროცესშია. ეს მოიცავს მსოფლიო ბანკის მხარდაჭერის პროგრამას 4 წლის განმავლობაში. ჩვენთვის საინტერესო იყო იმის გაგება, თუ რა სფეროებია პრიორიტეტული და რომელი საკითხებია ყველაზე მნიშვნელოვანი რეგიონული განვითარებისა და ინფრასტრუქტურის სამინისტროსთვის. მსოფლიო ბანკი მხარს დაუჭერს სამინისტროს იმ პროექტების განხორციელებაში, რომელიც რეგიონების განვითარებას შეუწყობს ხელს და საქართველოს სიღარიბის დაძლევაში დაეხმარება.”
შეხვედრა საქართველოს რეგიონული განვითარებისა და ინფრასტრუქტურის სამინისტროში გაიმართა.
