მისი თქმით, ნიშანდობრივია, რომ ზურაბ ჟვანიას 50 წლისთავისადმი მიძღვნილი კონფერენცია იმართება საქართველოს ევროკავშირთან ურთიერთობის თემაზე.
“ზურაბ ჟვანიას როლი და დამსახურება დამოუკიდებელი საქართველოს პოლიტიკურ ცხოვრებაში ძალიან დიდია. მან მნიშვნელოვანი კვალი დაატყო ქართულ პოლიტიკას, ქართული სახელმწიფოს დემოკრატიულ აღმშენებლობას. ზურაბ ჟვანია იმ პარლამენტს ჩაუდგა სათავეში, რომელიც მუშაობას შეუდგა დამოუკიდებელი საქართველოს ახალი კონსტიტუციის ამოქმედების შემდეგ. მისი თავმჯდომარეობით პარლამენტი დამოუკიდებელ და ძლიერ ინსტიტუტად იქცა და ამით ჩვენი ქვეყანა განვითარებული, თანამედროვე სახელმწიფოების რიგში ჩადგა,” _ აღნიშნა პრემიერმა.
მისივე თქმით, დღეს, როცა საქართველოს ევროპასთან დაახლოებასა და საქართველოს ევროპულ პერსპექტივებზეა საუბარი, რომლებიც ასე ახლობელი იყო ზურაბ ჟვანიასთვის, არ შეიძლება არ გავიხსენოთ მთელი მსოფლიოს გასაგონად სტრასბურგიდან ნათქვამი მისი ცნობილი სიტყვები.
“ეს იყო უაღრესად ამაღელვებელი სიტყვები ყველა ქართველისთვის და ამავე დროს გასათვალისწინებელი მთელი დასავლეთისთვის. ეს იყო პირველი ნაბიჯი ევროპისკენ, იმ ევროპისკენ, რომლის ბუნებრივ ნაწილად გრძნობდნენ თავს ჩვენი დიდი წინაპრები, რომლისკენაც მიისწრაფოდნენ ისინი, რომელზეც ოცნებობდნენ და რისი რეალურად განხორციელების ბედნიერებაც მხოლოდ ჩვენს თაობას ხვდა წილად. ახლა ჩვენი თაობაა პასუხისმგებელი იმისათვის, თუ როგორ ივლის საქართველო ევროპისკენ მიმავალ გზაზე. ჩვენ ვალდებული ვართ თანამიმდევრული და სწორი ნაბიჯებით ვიაროთ ამ გზაზე, რათა ჩვენმა ქვეყანამ დაიმკვიდროს ღირსეული ადგილი და გახდეს ევროპული ოჯახის სრულუფლებიანი წევრი,” _ განაცხადა ღარიბაშვილმა.
პრემიერის განმარტებით, ვილნიუსში “აღმოსავლეთ პარტნიორობის” სამიტზე ასოცირების ხელშეკრულების პარაფირება ისტორიული მნიშვნელობის მოვლენაა საქართველოსთვის.
“ამ ხელშეკრულებით ჩვენ ვუერთდებით ისეთ საერთო-ევროპულ ღირებულებებს, როგორიცაა დემოკრატია, კანონის უზენაესობა, ადამიანის უფლებებისა და ფუნდამენტური თავისუფლებების პატივისცემა. ჩვენთვის ასევე მნიშვნელოვანია ღრმა და ყოვლისმომცველი თავისუფალი სავაჭრო სივრცის კომპონენტიც, რომელიც ხელშეკრულების შემადგენელი ნაწილია. ვილნიუსში ჩვენ ხელი მოვაწერეთ ასევე ჩარჩო-შეთანხმებას, რითაც დავადასტურეთ, რომ საქართველო მზად არის ევროკავშირთან ერთად წვლილი შეიტანოს და ხელი შეუწყოს მსოფლიო უსაფრთხოებას. ამგვარად, საქართველო ევროკავშირის სანდო პარტნიორია მშვიდობისა და სტაბილურობის უზრუნველყოფის სფეროში,” _ აღნიშნავს ღარიბაშვილი.
მისი თქმით, მისასალმებელია, რომ ევროკომისიამ დადებითად შეაფასა და აღნიშნა, რომ საქართველომ ძალიან დიდ პროგრესს მიაღწია სავიზო რეჟიმის ლიბერალიზაციის სამოქმედო გეგმის პირველი ფაზის განხორციელების კუთხით, რაც საკმაოდ მოკლე ხანში სასურველ შედეგს გამოიღებს.
“მნიშვნელოვანია, რომ ვილნიუსის სამიტზე ჩვენ არა მარტო მიღწეული შედეგები წარმოვადგინეთ, არამედ საქართველო-ევროკავშირის ურთიერთობების ახალი ეტაპი დავიწყეთ. ახლა ჩვენ გადავდივართ რეალური მოქმედების ფაზაზე და მზად ვართ, ჩვენ მიერ აღებული ვალდებულებები ისეთ კონკრეტულ საქმეებად ვაქციოთ, რომელთა შედეგებსაც ჩვენი მოქალაქეები თავად იგძნობენ და ისარგებლებენ ყველა იმ სიკეთით, რომელსაც ევროპასთან დაახლოება მოგვიტანს. ვილნიუსის სამიტის შემდეგ ჩვენი უმთავრესი მიზანია 2014 წლის სექტემბრისთვის ხელი მოვაწეროთ ასოცირების შესახებ შეთანხმებას. ამ მხრივ ევროკავშირის მხარდაჭერის იმედი გვაქვს. ევროკავშირის ძლიერი პოლიტიკური მხარდაჭერა, უფრო მეტი ჩართულობა, აგრეთვე დიფერენციაციისა და “მეტი მეტისთვის” მთავარ პრინციპებზე დაფუძნებული დახმარება გადამწყვეტია ამ პროცესის წარმატებით დასრულებისათვის,” _ განაცხადა ღარიბაშვილმა.
ღარიბაშვილის თქმით, ერთობლივი ძალისხმევა უნდა მივმართოთ საზოგადოებებს შორის ორმხრივ და მრავალმხრივ ფორმატებში დარგობრივი თანამშრომლობის გაღრმავებისაკენ, კავშირების გაძლიერებისა და ბიზნესკონტაქტების გაფართოებისაკენ.
“ჩვენ უნდა გავაღრმაოთ თანამშრომლობა ისეთ პრიორიტეტულ დარგებში, როგორიცაა ენერგოუსაფრთხოება, ტრანსპორტი, სოფლის მეურნეობა, უნდა ვითანამშრომლოთ განათლებისა და ახალგაზრდობის ხელშეწყობის კუთხით, რაც გულისხმობს გაცვლით პროგრამებსა და სტიპენდიებს. ჩვენ გვჯერა, რომ დემოკრატიულ განვითარებაზე, ეკონომიკურ კეთილდღეობაზე, რეგიონში უსაფრთხოებასა და სტაბილურობაზე ორიენტირებული პარტნიორობა ყველასათვის მომგებიანი შედეგის მომტანი იქნება.
ჩვენ დიდად ვაფასებთ ევროკავშირის ძალისხმევას, წვლილსა და ჩართულობას რუსეთ-საქართველოს კონფლიქტთან დაკავშირებით, რაც გამოიხატება საერთაშორისოდ აღიარებულ საზღვრებში საქართველოს ტერიტორიული მთლიანობის მტკიცე მხარდაჭერით; ოკუპირებულ ტერიტორიებთან მიმართებით არაღიარების პოლიტიკის გატარებით; ევროკავშირის მონიტორინგის მისიის ფუნქციონირებით; სპეციალური წარმომადგენლის საქმიანობით; ჟენევის საერთაშორისო მოლაპარაკებებში მონაწილეობითა და ომით გაყოფილ საზოგადოებებს შორის ნდობის აღდგენის ხელშეწყობით. მინდა მადლობა გადავუხადო ევროკავშირს და მის წევრ ქვეყნებს ამ კუთხით მტკიცე და მხარდამჭერი განცხადებებისთვის,” _ აცხადებს პრემიერი.
იგი იმედოვნებს, რომ ევროკავშირი კიდევ უფრო მეტად ჩაერთვება და კიდევ უფრო მიზანმიმართული გახდება კონფლიქტის მშვიდობიანი მოგვარების პროცესში.
“ჩვენი მხრივ კი, მინდა გითხრათ, რომ საქართველოს სახით ევროკავშირს ჰყავს საიმედო პარტნიორი. ჩვენ მზად ვართ მხარი დავუჭიროთ საერთო ევროპულ ღირებულებებს, განუხრელად გავაგრძელოთ დემოკრატიული განვითარების კურსი, რათა მივაღწიოთ ჩვენი ქვეყნის ევროპულ და ევროატლანტიკურ სტრუქტურებში ინტეგრაციას. მინდა დავარწმუნო ყველა, რომ ჩვენი პოლიტიკური გუნდი ყველაფერს გააკეთებს იმისათვის, რომ ეს პროცესი საქართველოსთვის შეუქცევადი გახდეს და ვერავინ მოახერხოს ამ გზიდან გადახვევა. მინდა მადლობა გადავუხადო კონრად ადენაუერის ფონდს ამ კონფერენციის ორგანიზებისა და მხარდაჭერისთვის და წარმატებები გისურვოთ ყველას კონფერენციის მუშაობაში,” _ განაცხადა ღარიბაშვილმა.
