“ვისაუბრეთ იმ ადამიანების შესახებ, ვინც წინასაარჩევნო პერიოდში დანაშაული ჩაიდინა, როგორიც იყო ზეწოლა, ადამიანების დისკრიმინაცია, რომელიც შესანიშნავად მოიკვლია აუდიტის სამსახურმა. მინდა ვისარგებლო შემთხვევით და აუდიტის სამსახურს დიდი მადლობა გადავუხადო, ეს სამსახური დაკომპლექტებულია უაღრესად გონიერი და ობიექტური ადამიანებით, მაგრამ სამწუხაროდ, საქმეები, რომელიც ამ სამსახურის მიერ არის შესწავლილი, არის ტაბუ დადებული. მოვითხოვე, რომ ამ საქმეებზე მოეხდინათ რეაგირება. დავაკონკრეტე ირმა მგელაძე, რომელიც მიწევდა დისკრიმინაციას, სამსახურებრივ საათებში ახორციელებდა მუქარას, რომ სამსახურიდან დამითხოვდა, ეს ყველაფერი აუდიტმა შეისწავლა, საქმე გადაეცა საკრებულოს თავმჯდომარე ამირან გიგინეიშვილს განსახილველად, რომელსაც უნდა მიეღო გადაწყვეტილება მისი სამსახურიდან დათხოვნის შესახებ. გუბერნატორს ვამცნე, რომ საკრებულოს დღემდე არ მიუღია არანაირი ზომები ამის წინააღმდეგ და ვთხოვე შესაბამისმა სამსახურმა მიიღოს ობიექტური გადაწყვეტილება. მიპასუხა, რომ ობიექტური გადაწყვეტილება იქნება მიღებული მას შემდეგ, რაც ჩატარდება ადგილობრივი არჩევნები. მანამდე მოვითმინოთო.
ესე იგი რა გამოდის, პროკურორი შეუცვლელია, რომელმაც ბევრი საკითხი საერთოდ არ განიხილა, ამირან გიგინეიშვილი შეუცვლელია, რომლის სახითაც წარმოდგენილია სახეშეცვლილი “ნაციონალები”, ირმა მგელაძეს იცავენ საკრებულოში, ამ ეტაპზე გამოუვალ მდგომარეობაში ვართ. მე არ მაქვს მოთხოვნა ვინმე ციხის საკანში მოთავსდეს, ან დახვრიტონ, თუნდაც მისი საქციელი მოითხოვდეს ამას, მაგრამ როცა ასეთი სიტუაციაა, იქნებ სამსახურიდან მაინც იქნენ დათხოვნილი ასეთ ადამიანები, რაზედაც მიპასუხა, რომ მილიონ ნახევარ ადამიანს ვერ დავსჯითო, ესენი სისტემის მსხვერპლნი არიანო. სისტემის მსხვერპლად თუ განვიხილავთ ყველას, გარდა მთავარი ფიგურებისა, გამოდის, რომ ყველა ადამიანი დაუსჯელი უნდა დარჩეს, ამ პრინციპისა და ფორმულირების მიხედვით დაუსჯელი უნდა დარჩეს ყოფილი გამგებელი გია გოგუაძეც, თუ გათავისებული აქვთ, რომ ეს ხალხი სისტემის მსხვერპლნი არიან, გამოდის, რომ დაუსჯელობის სისტემა არ აღმოიფხვრება. შეიძლება ნებისმიერმა ადამიანმა საკუთარი ნებით ჩაიდინოს დანაშაული და მერე ეს ყველაფერი სისტემას დააბრალოს. ადგილობრივ არჩევნებში ხალხის მიერ არჩეული მთავრობა მოვა და ამის შემდეგ შეიძლება გადაიხედოს ეს ყველაფერიო.
ამ ეტაპზე შემექმნა შთაბეჭდილება, რომ არანაირ ბრძოლას აზრი არ აქვს. გუბერნატორი, როგორც მე შევნიშნე იმყოფება ყოფილი საკრებულოს თავმჯდომრის, რეზო ჩიტიძის გავლენის ქვეშ, ჩხაიძე როგორც პიროვნება არის კეთილშობილი ადამიანი, ამიტომ შეუძლებელია ის სწორად არ ხედავდეს ფაქტებს და უფრო მეტად არ უჭერდეს მხარს იმ პრინციპებს, რაც “ქართულ ოცნებას” გააჩნდა, მაგრამ ამ შემთხვევაში ეს ვერ იკვეთება. ვფიქრობ, რომ ის რეზო ჩიტიძის გავლენას განიცდის და შეცდომაში შეჰყავს. თვითონ ჩიტიძე დღეს ადგილზე არ ჩანდა , მაგრამ მისი გავლენა აშკარად იგრძნობოდა, ეს მარტო ჩემი აზრი არ არის, ვინც კი მხვდება გზად, ყველა ამას მიფიქსირებს. ვამჩნევ, რომ ის არ არის საქმის არსში კარგად გარკვეული, დამკვალიანებელი კი ისევ ჩიტიძეა, რომელიც “ნაციონალების” სასარგებლოდ აკეთებს საქმეს. თუ სხვის დაჯერებას გააგრძელებს, წააგებს, როგორც გუბერნატორი”, _ გვითხრა ჩხაიძემ.
თავად გუბერნატორი კი ჩიტიძის ზეგავლენას მასზე უარყოფს და ამბობს, რომ მაია ჩხაიძისა და მისი აზრები ერთმანეთს არ დაემთხვა:
_ როგორც გავიგე და მესმის, ადამიანები, ვინც მუშაობდნენ წინა ხელისუფლების პერიოდში, ყველამ უნდა დატოვოს სამსახური, რასაც მე არ ვიზიარებ. როდესაც არის საუბარი, რომ ადამიანი არ შეესაბამება იმ კონკრეტულ თანამდებობას, რაც მას აქვს დაკავებული, მისი ცოდნით და კვალიფიკაციით, ეს უკვე ცალკე თემაა. ჩვენი აზრები, ამ შემთხვევაში არ დაემთხვა ერთმანეთს. უბრალო მოსაზრება, რომ ადამიანი დამნაშავეა, ეს არ არის სწორი მიდგომა, ვერც იმას გავიზიარებ, რომ ადამიანის მოსაზრებით ვიღაც დამნაშავეა. თუ დამნაშავეა, არსებობს შესაბამისი ორგანოები, რომლებმაც უნდა დაადასტურონ. მანამდე ადამიანი არის უდანაშაულო.
_ არსებობს გამგეობის შიდა აუდიტის სამსახურის მიერ დადებული დასკვნა თუ ანგარიში, სადაც მათ მიერ ჩატარებული კვლევის შედეგად აღმოჩენილია დარღვევები…
_ გაქვთ თქვენ ეს დოკუმენტები ნანახი?
_ რა თქმა უნდა, მინახავს და თითქმის ყველა გამოვაქვეყნეთ კიდეც…
_ მე სამწუხაროდ არ მინახავს, რაც არ მაქვს ნანახი, მასზე კომენტარს ვერ გავაკეთებ, თუ ეს ფაქტები გამოვლენილია, მაშინ უნდა მიეცეს შესაბამისი რეაგირება, – გვითხრა გუბერნატორმა.
