საქართველოს განათლებისა და მეცნიერების მინისტრ თამარ სანიკიძის ზუგდიდში ვიზიტის დროს, გაირკვა, რომ აქ მასწავლებლის სახლის მშენებლობა დაიწყება.
აღნიშნული სახლი ზუგდიდის პირველი საჯარო სკოლის ტერიტორიაზე აშენდება, სადაც ადგილობრივების თქმით, ადრე ქალაქის საკათედრო ტაძარი და სასაფლაო იყო განთავსებული. სამოქალაქო სექტორი მიიჩნევს, რომ იმ ადგილას, სადაც ძველი ტაძრის საძირკველი და სასაფლაო იყო, დაუშვებელია საერო დაწესებულების აგება და მინისტრს მიმართვას უგზავნიან.
"ეს ტაძარი, როგორც სხვა მრავალი ეკლესია-მონასტერი დაინგრა ათეისტური პერიოდის დროს. მიგვაჩნია, რომ იმ ადგილზე, სადაც ძველი ტაძრის საძირკველი და წინაპართა საძვალეა, ყოვლად დაუშვებელია ნებისმიერი სახის საერო დაწესებულების განთავსება. ზუგდიდში შესაძლებელია ტერიტორიის მოძიება თქვენი კეთილშობილური იდეის განსახორციელებლად, საერო და სასულიერო წრეების ერთობლივი ძალისხმევა და აზრთა გაზიარება ყოველთვის იყო და არის ქართული სახელმწიფოს წარმატების, ამავე დროს, ნებისმიერი ახალი იდეისა თუ ინიციატივის განხორციელებისა და კეთილად დასრულების საწინდარი.
ღრმად გვწამს, რომ გულისხმიერებით მოეკიდებით ჩვენს მიმართვას და მასწავლებლის სახლის მშენებლობისთვის შეარჩევთ შესაფერის ადგილს, რათა პატივი მივაგოთ ჩვენს წარსულს და შევქმნათ ღირსეული მომავალი", _ ნათქვამია მიმართვაში, რომელსაც ხელს აწერენ: ზუგდიდისა და ცაიშის მიტროპოლიტი, საზოგადოება "ზუგდიდელის" თავმჯდომარე, ჩოხოსანთა საზოგადოების ზუგდიდის სადროშოს ხელმძღვანელი, ასოციაცია "ათინათის" გამგეობის თავმჯდომარე, მუსიკალურ-ქორეოგრაფიული ცენტრი "ოდიშის" დირექტორი, ახალგაზრდა ფსიქოლოგთა და ექიმთა ასოციაცია "ქსენონის" ხელმძღვანელი, ზუგდიდის განვითარების ფონდის "ერთსულოვნების" პრეზიდენტი, ზუგდიდის მოსწავლე-ახალგაზრდობის სასახლის დირექტორი, ცენტრალური ბიბლიოთეკის დირექტორი, ასოციაცია "გაენათის" დირექტორი, "განათლების სახლის" დირექტორი და სამართლებრივი დაცვის ინსტიტუტის ხელმძღვანელი.
