ოზურგეთს სასმელი წყლის პრობლემა, დიდი ხანია აქვს და მოსახლეობის არაერთი ხმაურისა თუ ღონისძიების მიუხედავად, დღემდე პრობლემად რჩება.
"როგორ გვექნება წყალი, ან ვართ კი ღირსი და ვიმსახურებთ გვქონდეს გამართული წყალსადენი სისტემა და ზოგადად, მოწესრიგებული ქვეყანა? აი, შეხედეთ, როგორ "მოჩუხჩუხებს წყარო" ჩვენი გულის გასახეთქად", _ გვეუბნებიან ჯორჯიაშვილის ქუჩის მცხოვრებლები და გვაჩვენებენ ქუჩის ერთ მხარეს მდებარე გამსკდარ წყალსადენ მილს, საიდანაც ძალუმად მოჩქეფს და მერე თავქვე მიედინება უქმად დაღვრისთვის გამეტებული და ოზურგეთელებისთვის სანატრელი წყალი.
აღნიშნულ ქუჩაზე, წყლის ცენტრალური მილი, რამდენიმე წელია გახეთქილია. როგორც აქ მცხოვრები აიასტა სიმონიანი ამბობს, რაც სათავე ნაგებობა გაკეთდა შემოქმედში, გახმაურებული პროექტის განხორციელების შემდეგ, აქ წყალი ასე უქმად იღვრება.
იქვე მდებარე კორპუსის მცხოვრებლებს კი, საკუთარ ბინებში ტუმბოს მეშვეობით უწევთ წყლის აქაჩვა.
"აქ იმდენი წყალი იღვრება, რამდენიმე ოჯახს 24 საათის განმავლობაში ეყოფა, მაგრამ ვინაა პატრონი?"
კითხვაზე, რატომ ეგუება თვითონ მოსახლეობა წლების მანძილზე ასეთ უპასუხისმგებლობას, ამბობენ, რომ არაერთხელ მიმართეს ხელისუფლებას, მაგრამ ყურად არავინ იღო.
კურიოზულია მეორე, საპირისპირო ფაქტი – ოზურგეთის ცენტრში, ფანტანს ვიღაცამ ონკანი მოარგო.
ანალოგიური ონკანი გურიის ქუჩაზეც მოარგეს ფანტანს, თუმცა, მოგვიანებით მოხსნეს.
როგორც "გურია ნიუსს" ოზურგეთის პრესსამსახურიდან უთხრეს, აღნიშნული პრობლემური და დაზიანებული წყალსადენი მილების შეკეთება, ჯორჯიაშვილის ქუჩაზე უახლოეს მომავალში მოხდება.
რაც შეეხება "ონკანმორგებულ" ფანტანებს, ამის შესახებ არავინ იცის.
