დღეს, ვებ-გვერდმა "Eurosport.com" საინტერესო ცნობა გაავრცელა.
გუშინ ევროპის მომავალი საფეხბურთო პირველობის მორიგ შესარჩევ შეხვედრაში, ბელორუსის ქალაქ ბორისოვოში, მასპინძლები უკრაინის ეროვნულ გუნდს დაუპირისპირდნენ.
შეხვედრა სტუმართა უპირატესობით წარიმართა. წინა საუკუნის 90-იან წლებში, ლანჩხუთის "გურიას" მთავარი მწვრთნელის, მიხეილ ფომენკოს შეგირდებმა ბატონი ლუკაშენკოს თანამემამულეები ანგარიშით – 2:0 დაამარცხეს.
ამ მატჩის მთავარი პერიპეტიები თამაშის დასრულების შემდეგ განვითარდა. წარმატებით გახარებულმა უკრაინის ნაკრების თაყვანისმცემლებმა რამდენიმე საზეიმო სიმღერა წამოიწყეს. საინტერესოა რომ ისინი ძირითადად რუსეთის პრეზიდენტი ვლადიმერ პუტინის მიმართ შეურაცხმყოფელი სიტყვებით იყო გაჯერებული.
"ეს თავხედობა“ ბელორუსმა სამართალდამცველებმა "ვერ აიტანეს“ და რამდენიმე ათეული ადგილობრივი წესრიგის დამცველი სტუმარ ფანებს დაერია.
ვებ-გვერდის მტიცებით, სტუმარი გუნდის თაყვანისმცემლების დიდმა ნაწილმა ღამე ქალაქ ბორისოვოს მილიციაში გაატარა. რასაკვირველია საქმეში უკრაინის საგარეო საქმეთა სამინისტროს წარმომადგენლები ჩაერივნენ და დღეს დილით ბელორუსებმა, "პუტინის მეგობარი" გულშემატკივრები, სპეციალური ბადრაგის დახმარებით სამშობლოში გაისტუმრეს.
