რა თანხა უჯდება ბიუჯეტს ოზურგეთის მუნიციპალიტეტის გამგეობასა და ქალაქ ოზურგეთის მერიას ოზურგეთში გამართული ღონისძიებები? ამასთან დაკავშირებით "გურია ნიუსმა" ოფიციალური განცხადებით მიმართა მერიას და გამგეობას. ოფიციალური დოკუმენტების თანახმად, ქალაქ ოზურგეთის მერიას 26-28 აგვისტოსა და 8 ნოემბერს ჩატარებული ღონისძიებები 34 111 ლარი დაუჯდა, ოზურგეთის მუნიციპალიტეტის ბიუჯეტს კი დაბა ურეკში 7 სექტემბერს და სოფელ ლიხაურში 17 ოქტომბერს გამართული ღონისძიებები _ 37 200 ლარი.
ქალაქ ოზურგეთის მერიამ, 2014 წლის 26-28 აგვისტოს, ქალაქ ოზურგეთის მუნიციპალიტეტის ტერიტორიაზე დაგეგმილი ღონისძიებების _ "ოზურგეთული ზაფხულის საღამოების" ჩატარებისთვის ბიუჯეტიდან 16 931 ლარი გამოყო,"ალეგრობისადმი" მიძღვნილი ღონისძიებისთვის კი _ 17 180 ლარი.
ქალაქ ოზურგეთის მერის #140 ბრძანებაში ვკითხულობთ:
"ქალაქ ოზურგეთის მუნიციპალიტეტის 2014 წლის ბიუჯეტით გათვალისწინებული კულტურული ღონისძიებების დაფინანსების პროგრამიდან თანხის გამოყოფის შესახებ" – " ქალაქ ოზურგეთის მუნიციპალიტეტის ტერიტორიაზე 26-28 აგვისტოს დაგეგმილი ღონისძიების _ "ოზურგეთული ზაფხულის საღამოების" ორგანიზებისთვის ქალაქ ოზურგეთის მუნიციპალიტეტის არასამეწარმეო (არაკომერციულ) იურიდულ პირს _ "ოზურგეთის მუნიციპალური კულტურის ცენტრს" კულტურული ღონისძიების დაფინანსების პროგრამიდან (პროგრამული კოდი 05 02 01) გამოეყოს 13 900 ლარი", _ ბრძანებას ქალაქ ოზურგეთის მუნიციპალიტეტის მერი ბეგლარ სიორიძე აწერს ხელს.
#142 ბრძანებაში აღნიშნულია: "ქალაქ ოზურგეთის ტერიტორიაზე 26-28 აგვისტოს დაგეგმილ ღონისძიებაში _ "ოზურგეთული ზაფხულის საღამოები" ქალაქ ოზურგეთის მუნიციპალიტეტის მერიის სპორტის, ახალგაზრდულ საქმეთა და ტურიზმის სამსახურს სპორტული ღონისძიების პროგრამიდან (პროგრამული კოდი 05 01 01) გამოეყოს 3031,5 ლარი. ღონისძიების გახორციელებისათვის თანხა ჩაერიცხოს ა(ა) იპ "სპორტის განვითარების ცენტრს," _ ბრძანებას ხელს ქალაქ ოზურგეთის მერი ბეგლარ სიორიძე აწერს.
2014 წელს დაბა ურეკში 7 სექტემბერსა და სოფელ ლიხაურში 17 ოქტომბერს გამართული ღონისძიებები ოზურგეთის მუნიციპალიტეტის ბიუჯეტს სულ 37 200 ლარი დაუჯდა.
ოზურგეთის მუნიციპალიტეტის გამგებლის მერაბ ჭანუყვაძის მიერ გამოცემული #170 ბრძანებაში აღნიშნულია:
"ოზურგეთის მუნიციპალიტეტის დაბა ურეკში საკურორტო სეზონის დასრულებასთან დაკავშირებული ღონისძიებისთვის _ "ჩვენ, მზე და ლურჯი ზღვა", ოზურგეთის მუნიციპალიტეტის 2014 წლის ბიუჯეტით გათვალისწინებული (პროგრამული კოდი 05 02 01) კულტურული ღონისძიებების დაფინანსების პროგრამიდან ერთჯერადად გამოიყოს 20 500 (ოცი ათას ხუთასი) ლარი".
ოზურგეთის მუნიციპალიტეტის გამგეობამ, 17 ოქტომბერს, სოფელ ლიხაურში ღია ცის ქვეშ გამართული წმინდა ექვთიმე ღვთისკაცის ხსენების დღისადმი მიძღვნილი ღონისძიებისთვის ბიუჯეტიდან 16 700 (თექვსმეტი ათას შვიდასი) ლარი გამოჰყო. "ექვმთიმეობის" ღონისძიების ორგანიზება ოზურგეთის მუნიციპალიტეტის გამგეობის კულტურის, სპორტისა და ტურიზმის განვითარების სამსახურის უფროსმა ნატალია ხომერიკმა და დაბა ურეკის კულტურის სახლმა უზრუნველყო.
ქალაქ ოზურგეთის მერის მიერ გამოცემული #263 ბრძანების თანახმად, "ქალაქ ოზურგეთის ტერიტორიაზე 8 ნოემბერს დაგეგმილი ღონისძიების "ალეგრობა-ოზურგეთობის" ორგანიზებისთვის ქალაქ ოზურგეთის მუნიციპალიტეტის არასამეწარმეო (არაკომერციულ) იურიდიულ პირებს კულტურული ღონისძიების პროგრამიდან (პროგრამული კოდი 05 02 01) გამოეყოს 14 980 (თოთხმეტი ათას ცხრაას ოთხმოცი) ლარი".
კიდევ ერთი ღონისძიება ოზურგეთის მუნიციპალიტეტის მერიის სპორტის, ახალგაზრდობისა და ტურიზმის სამსახურის მიერ ალეგრობის დღესასწაულისადმი ორგანიზებული ღონისძიება _ "ოზურგეთი გელოდება შენ!» გაიმართა, რომელთან დაკავშირებით მერიის პრესსამსახურში ასეთ კომენტარს აკეთებენ:
_ 26 სექტემბერს შპს "გურია თრეველის" ანგარიშზე, რომელიც ამ ღონისძიების უშუალო ორგანიზატორი გახლდათ, ჩაირიცხა 2 200 ლარი. გამომდინარე იქიდან, რომ სტიქიის შედეგად, ოზურგეთს მნიშვნელოვანი ზარალი მიადგა, აღნიშნული ღონისძიების ჩატარება გადაიდო და 8 ნოემბერს "ალეგრობის" ღონისძიების ერთ-ერთ პროგრამულ სახედ წარმოგვიდგა, _ აღნიშნავს ქალაქ ოზურგეთის მერიის პრესსამსახურის უფროსი იზა დარჩია.
