ფინანსთა სამინისტროს სახაზინო სამსახურში განხორციელებული ცვლილებების გამო, ლანჩხუთის მუნიციპალიტეტის საფინანსო სამსახური საბიუჯეტო თანხების მოძრაობის ახალ სისტემაზე გადავიდა, რამაც ფაქტობრივად ფინანსური უმოძრაობა გამოიწვია და მონაცემთა ბაზის არასრულფასოვნების გამო ფინანსური ოპერაციები მთლიანად შეჩერებულია.
აღნიშნულიდან გამომდინარე, ჩნდება რეალური საშიშროება სხვადასხვა ფინანსური ვალდებულებების შეუსრულებლობის გამო საჯარიმო სანქციები განხორციელდეს.
მუნიციპალიტეტის გამგეობის საფინანსო და შესყიდვების სამსახურის უფროსის, როლანდ ლაშხიას ინფორმაციით, სიტუაციის დალაგება მალე უნდა მოხდეს:
"გვპირდებიან, რომ უახლოეს დღეებში ეს პრობლემა აღმოიფხვრება, მანამდე ჯარიმებიდნ თავის ასარიდებლად ყველა საჭირო ზომებს მივმართავთ და ორგანიზაციებთან, რომლებთანაც გარკვეული ფინანსური ვალდებულებები გაგვაჩნია, მოლაპარაკებებს ვაწარმოებთ. ვნახოთ რა შედეგს მივიღებთ", – განაცხადა ლაშხიამ.
ამასობაში, როგორც მოსალოდნელი იყო შეფერხდა სასწავლო პროცესის განახლება საბავშვო ბაღებში. "მუნიციპალიტეტის "სკოლამდელი სააღმზრდელო ცენტრის" დირექტორი დავით დობორჯგინიძე ვერ აკონკრეტებს, თუ როდის აღდგება სასწავლო პროცესი.
"მესმის იმ ადამიანების, ვისაც ბავშვები საბავშვო ბაღში დაყავთ. დღესდღეობით მიჭირს კონკრეტული თარიღის დასახელება, ოღონდ ერთია, სახაზინო ხარვეზის გამოსწორების მეორე დღესვე ჩვენ მზად ვართ ბავშვების მისაღებად", – ამბობს ბატონი დავითი.
თავის მხრივ აღნიშნულ ცენტრს კომუნალური ვალდებულებების ვერ შესრულებით გამოწვეული პრობლემები აწუხებს და ბუნებრივია, ამ ეტაპზე სასწავლო პროცესის დაწყებაზე საუბარიც კი ზედმეტია.
ბაღებში სასწავლო პროცესის შეფერხების გამო წყენას ვერ მალავენ მშობლები.
"გაუგებარია რატომ ხდება საქართველოში ყველაფერი უკუღმა, ჯერ გადაწყვეტილებას იღებენ, შემდეგ კი ეძებენ ამ გადაწყვეტილების აღსრულების გზებს", – აცხადებენ ისინი.
