"შეშა არ გვაქვს, წამლებს ვერ ვყიდულობ, ამ საახალწლოდ ჩვენთვის, სოციალურად შეჭირვებული ოჯახისთვის არაფერი არ უნდა დაერიგებინათ? თითქმის შიმშილში და სიცივეში გვხვდება სული", – ქალაქ ოზურგეთში ნინოშვილის #26-ში მცხოვრები არჩილ და თინა მგელაძეები უაღრესად გაჭირვებულ მდგომარეობაში ცხოვრობენ.
მათ დახმარებისთვის "გურია ნიუსს" არაერთხელ მიმართეს.
"პატარა ფიჩხები მაქვს და მუყაო, რომელიც მაღაზიამ და აფთიაქმა მოგვცა, ასეთ მზიან ამინდში როგორ დავანთებ ღუმელს? რომ მოთოვს, მაშინ უნდა გამოვიზოგო, ხელები კი მაქვს ახლა გაყინული, მაგრამ ვუძლებ, – საჭმელი? არაფერი არ მქონია ახალ წელს, მეზობელმა მოგვიტანა საცივი და ღომი და იმით ვიყავით _ იქნებ თქვენ იცით გვეკუთვნოდა თუ არა შეშით დახმარება და საახალწლოდ პატარა ტკბილეულის მოტანა ხელისუფლებისგან? იქნებ დაგვეხმარონ?
რა ვქნა, რა მეშველება, ძალიან მძიმე მდგომარეობაში ვარ, უაღრესად გაჭირვებულები ვართ. ჩემს ძმას ინსულტი აქვს გადატანილი. ხელს ვერ ამოძრავებს, ფიზიკურად შრომისუუნაროა, ასევე ვარ მეც, ვერ დავდივარ, ფეხები ისე მტკივა, სახლი ავარიულ მდგომარეობაშია, საძირკველი გამოშლილი აქვს, კედლები გაბზარულია.
გაზი ჩემი სახლის წინ არის გამოყვანილი და გაჭირვების გამო, სახლში ვერ შემოვიყვანე. რამდენი პრობლემა მაქვს, ვერ ჩამოგითვლით. პენსია 150 ლარი, ესაა ჩვენი შემოსავალი, რომელიც წამალში და გადასახადებში არ გვყოფნის. პურს ძლივს ვყიდულობთ. ფორთხვა-ფორთხვით დავდივარ ოთახიდან ოთახში", – ამბობს " გურია ნიუსთან" თინა მგელაძე და დასძენს, რომ ერთხელ, როცა"გურია ნიუსში" მათი გაჭირვების შესახებ დავწერეთ, ქალაქ ოზურგეთის მერი წამლებითა და ეტლით დაეხმარა.
"გურია ნიუსთან" ქალაქ ოზურგეთის მერიის პრესსამსახურის წარმომადგენელი ანა მდინარაძე ამბობს:
"ქ.ოზურგეთის მუნიციპალიტეტის მერიაში, 2014 წლის მდგომარეობით, შეშის დახმარების მოთხოვნით, შემოსულია 70 განცხადება, აქედან დაკმაყოფილდა 40 ოჯახი, ხოლო, 2015 წელს – 13 განცხადება, დაკმაყოფილდა 2. სამწუხაროდ ჩვენ არ გვაქვს საშეშე მერქნის ის მარაგი, რომელიც სრულად დააკმაყოფილებს განმცხადებლებს, ამიტომ ხდება მათი ეტაპობრივი დაკმაყოფილება. რაც შეეხება, საახალწლოდ დარიგებულ სასურსათო პაკეტებს – უპირატესობა მიენიჭათ იმ ოჯახებს, რომელთა სარეიტინგო ქულა შეადგენდა 1000-ს და მათი ოჯახის წევრი განსაკუთრებული საჭიროების მქონე პირი გახლდათ" .
