ვაზაგაშვილების ადვოკატი ირმა ჭკადუა აცხადებს, რომ “ვაზაგაშვილის აფეთქების საფუძველი პროკურატურიდან გაჟონილი ინფორმაცია გახდა,” – ამის შესახებ განცხადება რამდენიმე წუთის წინ ვაზაგაშვილების ადვოკატმა ირმა ჭკადუამ გააკეთა.
როგორც დღეს ირმა ჭკადუა აღნიშნავს, ზურაბ ვაზაგაშვილის საქმეში ახალი მტკიცებულებები და 4 მოწმე გამოჩნდა და გამოძიების წინაშე სერიოზული პირების პასუხისმგებლობის საკითხი დადგა .
ჭკადუას განცხადებით, სწორედ ამ გარემოებების შემდეგ დაიწყო მუქარის შემცველი ზარები იური ვაზაგაშვილის ტელეფონზე.
“გამოძიების ინტერესებიდან გამომდინარე დეტალებს ვერ გეტყვით. თუმცა შემიძლია, გითხრათ, რომ ზურაბ ვაზაგაშვილის საქმეში 4 ახალი მოწმეა, რომელთა ჩვენებების მიხედვით, სერიოზული პირების პასუხისმგებლობის საკითხი დადგა. მოწმეების ნაწილი საქართველოში არ იმყოფება. სწორედ ამის შემდეგ დაიწყო მუქარები ბატონი იურის მისამართით,” _ აცხადებს ჭკადუა და დასძენს, რომ “იური ვაზაგაშვილს ბოლო დროს ემუქრებოდნენ".
ადვოკატი ასევე ამბობს, რომ ზურაბ ვაზაგაშვილის ბიზნეს-საქმიანობის კუთხით მტერი არ ჰყოლია.
ადვოკატი შალვა ხაჭაპურიძე კი ფიქრობს, რომ გარკვეულმა პირებმა იცოდნენ რომ იური ვაზაგაშვილი იმ დღეს საფლავზე მივიდნენ. ადვოკატი და გარდაცვლილის მეგობარი აცხადებს რომ იური ვაზაგაშვილს უთვალთვალებდნენ და უსმენდნენ.
საქართველოს მთავარი პროკურატურის მოადგილე ირაკლი შოთაძე ზურაბ ვაზაგაშვილის საქმეზე პროკურატურიდან ინფორმაციის გაჟონვას გამორიცხავს. როგორც შოთაძემ ტელეკომპანია “იმედის” საინფორმაციო გამოშვება “ქრონიკაში” გუშინ განაცხადა, სიტუაციაში ბოლომდე გაერკვევა, თუმცა გამორიცხავს, რომ ინფორმაცია პროკურატურიდან გასულიყო.
“პროკურატურიდან რომ რაღაც ინფორმაცია გასულიყო, გაცილებით მეტი ინფორმაცია გამჟღავნდებოდა, რადგან საქმეში არ არის ერთ მოწმეზე საუბარი, გაცილებით მეტ მოწმეზე და მეტ მტკიცებულებებზეა საუბარი. მე გამოვრიცხავ, რომ რაიმე ინფორმაცია პროკურატურიდან არის გასული”, – აღნიშნა ირაკლი შოთაძემ.
მთავარი პროკურორის მოადგილის ინფორმაციით, ზურაბ ვაზაგაშვილის საქმეზე მოპოვებულია არაერთი ახალი მტკიცებულება, რომელიც ცვლის საქმის ფაქტობრივ გარემოებებს, რაც წინა გამოძიების დროს იყო დადგენილი. მისი თქმით, განახლებული გამოძიების მიმდინარეობის შესახებ სრულად იყვნენ ინფორმირებული იური ვაზაგაშვილი და ადვოკატები.
პროკურორის განმარტებით, პირველადი გამოძიება, რაც თავის დროზე ჩატარდა, სრულიად გაყალბებულია. შოთაძის განცხადებით, წლების განმავლობაში საქმეზე გაკეთდა ყველაფერი, რათა, ყველა მტკიცებულება ფალსიფიცირებული ყოფილიყო, რომ საზოგადოება შეცდომაში შეეყვანათ და “საქმე შეეკერათ”.
“ჩატარებულია საკმაოდ დიდი მოცულობის სამუშაოები, მოპოვებულია არაერთი ახალი მტკიცებულება, რომელიც ცვლის საქმის ფაქტობრივ გარემოებებს, რაც წინა გამოძიების დროს იყო დადგენილი. ჩატარებულია არაერთი ექსპერტიზა. აქ არის მთელი რიგი ჩვენებები, აქ არის არა მარტო ბუთურიძის ჩვენებები, აქ არის მთელი რიგი ჩვენებები, რომლებმაც წარმოაჩინა საქმეში ახალი რეალური ფაქტობრივი გარემოებები, რომელიც მთლიანად ცვლის საქმის არსს და რომელიც შესაძლებლობას იძლევა, რომ საქმეზე პროკურატურამ წარმოადგინოს რეალური ფაქტები, თუ რეალურად რა მოხდა 2006 წელს”, – აღნიშნა ირაკლი შოთაძემ.
მისივე ინფორმაციით, საქმე დასკვნით ფაზაშია შესული.
“ამ ეტაპზე შემიძლია განვაცხადო, რომ ვფლობთ, საკმაოდ მყარ მტკიცებულებებს. თუმცა დარჩენილია რაღაც საგამოძიებო მოქმედებები, რომელიც საჭიროა ამ საქმეზე სრული სურათის დასადგნად. ვფიქრობთ ამ საგამოძიებო მოქმედებებს უახლოეს მომავალში ამოვწურავთ და საქმეზე მივიღებთ შესაბამის გადაწყვეტილებას, რის შესახებაც საზოგადოებას აუცილებლად ვაცნობებთ”, – განაცხადა ირაკლი შოთაძემ.
