ფინანსთა სამინისტროს მტკიცებით "ამ ეტაპზე, გადარიცხვების განხორციელება შეუძლია 62 მუნიციპალიტეტს“.
ჩვენს მიერ გამოქვეყნებულ სტატიას "26-ე დღეა თვითმმართველობების ბიუჯეტები პარალიზებულია“ სამინისტრომ წერილობით უპასუხა, რომელშიც აღნიშნულია, რომ ბევრმა მუნიციპალიტეტმა ხელფასები უკვე გასცა:
_ გაცნობებთ, რომ ამჟამად, გურიის რეგიონის სამივე მუნიციპალიტეტი ჩართულია პროგრამაში და მათ შეუძლიათ განახორციელონ ტრანზაქციები. ოზურგეთს, მაგალითად, უკვე განხორციელებული აქვს გადახდები და გაცემული აქვს ხელფასები.
აღსანიშნავია, რომ რეფორმის პროცესში გამოიკვეთნენ მუნიციპალიტეტები, რომლებმაც ტრენინგებზე მიღებული ცოდნა წარმატებით გამოიყენეს და პირველი გადარიცხვები განახორციელეს წლის პირველივე სამუშაო დღეებში. ამჟამად, 25 მუნიციპალიტეტს ხარჯები უკვე გაწეული აქვს. ეს ნიშნავს, რომ სწორად შევსებული დოკუმენტაციის პირობებში, ყველას ჰქონდა შესაძლებლობა ხაზინის პროგრამაში ემუშავა შეუფერხებლად.
ამ ეტაპზე, გადარიცხვების განხორციელება შეუძლია 62 მუნიციპალიტეტს. ორშაბათს, 26 იანვარს, უკვე ყველა მუნიციპალიტეტს ექნება გადარიცხვების განხორციელების საშუალება, ვინაიდან 23 იანვარს, დღის ბოლოს, პრაქტიკულად უკვე მიღებულია ხაზინის პროგრამაში ჩართვისთვის საჭირო სწორი მონაცემები, _ მოგვწერეს ფინანსთა სამინისტროდან.
თუმცა, ინფორმაციის გადამოწმებისას გაირკვა, რომ სამინისტროს განცხადებაში ტყუილი წერია. ოზურგეთის მუნიციპალიტეტის გამგებლის მერაბ ჭანუყვაძის თქმით, დღეს ოზურგეთის მუნიციპალიტეტში ხელფასები არ დარიგებულა. ანალოგიური სიტუაცია აღმოჩნდა სხვა მუნიციპალიტეტებშიც. მაგალითად გორში, ზესტაფონში, ხაშურში.
შეგახსენებთ, რომ 1 იანვრიდან ყველა დონის ბიუჯეტი, გარდა საგანმანათლებლო დაწესებულებებისა, სახაზინო მომსახურებაზე გადავიდა.
ფინანსთა მინისტრმა, ნოდარ ხადურმა ამ ინფორმაციის გაჟღერებისას აღნიშნა, რომ "ეს სამინისტროს საშუალებას მისცემს სტატისტიკურად და ინფორმაციულად ჰქონდეს წვდომა, თუ რა ხდება საჯარო ფინანსების მართვის კუთხით“
_ აქამდე ზოგიერთს ჰქონდა კომერციულ ბანკებში, ზოგს ხაზინაში, ახლა მოხდება კონსოლიდაცია, რაც ჩვენ საშუალებას მოგვცემს სტატისტიკურად და ინფორმაციულად გვქონდეს ონლაინ წვდომა, რა მდგომარეობაა საჯარო ფინანსების მართვის თვალსაზრისით. სრულად დაინერგება საჯარო ფინანსების მართვის ევროპული სისტემა. ეს იქნება არაკონტროლი, არამედ აღრიცხვიანობა. თავისთავად ცხადია, რომ ითოეული თვითმმართველობის ბიუჯეტს ადგილობრივი თვითმმართველობის არჩეული ორგანო,საკრებულო აკონტროლებს – განაცხადა ხადურმა.
იხილეთ სტატია: 23-ე დღეა თვითმმართველობების ბიუჯეტები პარალიზებულია
