"ოთარ მირზოევი გინდა, დალაქიშვილი, ქალაქის სამმართველოს უფროსი, რომელიც რამდენიმე დღის წინ სამსახურიდან მოხსენეს, როგორც ამბობენ, პირადი განცხადების საფუძველზე გაუშვეს. მაგრამ მოადგილე, იგივე სამარღანიშვილი, იგივე ჩემი შვილის მკვლელობის მონაწილე, მირზოევი, ჭანუყვაძე გინდა, გლდანი-ნაძალადევის დეპარტამენტის უფროსები, ანტიტერორისტული დეპარტამენტის უფროსის მოადგილეები. პროკურატურა სავსეა ამ დამნაშავეებით", _ ეს კომენტარი იური ვაზაგაშვილს ეკუთვნის, რომელიც მან გარდაცვალებამდე სამი დღით ადრე, „რეპორტიორის“ პრესკლუბში გააკეთა.
იმავე პრესკონფერენციაზე ვაზაგაშვილმა ყველა ჩამოთვლილი პიროვნების დასჯა მოითხოვა და ხელისუფლებას წინასაარჩევნო დაპირება კიდევ ერთხელ შეახსენა.
მირზოევი თანამდებობიდან უკვე წავიდა, თუმცა, ჩამოთვლილთაგან ბევრი დღემდე თანამდებობაზე რჩება. მათ შორისაა შოთა ჭანუყვაძე, რომელიც ამჟამად ანტიტერორისტული დეპარტამენტს უფროსის მოადგილეა:
„გურია ნიუსთან“ საუბრისას შოთა ჭანუყვაძე ამბობს, რომ მისი გვარი ჩამონათვალში შეცდომით მოხვდა:
_ ჩემი გვარი შეცდომითაა. იმ დროს, როცა სპეცოპერაცია ჩატარდა, მე გურიაში ვიყავი გასვენებაში, _ გვითხრა ჭანუყვაძემ, რომლის განმარტებით, მას კორტების სპეცოპერაციასთან კავშირი არ აქვს.
ჭანუყვაძემ ასევე უარყო გავრცელებული ინფორმაცია, რომ ის თანამდებობიდან გაათავისუფლეს:
_ არავის გავუთავისუფლებივარ. ვრჩები იგივე თანამდებობაზე, _ დაგვიზუსტა ჭანუყვაძემ.
პროკურატურაში ზურა ვაზაგაშვილის საქმის დეტალებზე არ საუბრობენ და მხოლოდ იმას განმარტავენ, რომ საქმის გამოძიება დასკვნით ფაზაშია.
ჩვენი წყარო ამბობს, რომ საქმეში ბევრი მაღალჩინოსნის გვარი ფიგურირებს, რომელთა გარკვეული ნაწილი ანიტერორისტულ დეპარტამენტში მუშაობს.
მათი ვინაობა ყოფილ პრემიერ-მინისტრს, ბიძინა ივანიშვილს იური ვაზაგაშვილმა სიკვდილამდე რამდენიმე დღით ადრე პირადად გაანდო:
"ჩვენ გვქონდა გეგმა, რომ სანამ არ დასრულდებოდა გამოძიება, მის გვერდში მაქსიმალურად დავმდგარიყავი, რომ გაქარწყლებულიყო ეჭვი იმის შესახებ, რომ დამნაშავეები არ დაისჯებოდნენ. მისგან ვიცი, რომ დასკვნით ფაზაში შედიოდა გამოძიება. გახარებული იყო უკრაინიდან ახალი მოწმეების გამოჩენით, რომლებიც ადასტურებენ გამოძიების ეჭვებს და პრაქტიკულად ვიზეც ეჭვი ჰქონდა პროკურატურას, ყველანი ხვდებოდნენ პასუხისმგებლობის ქვეშ. მან გვარებიც ბევრი დაასახელა" _ განაცხადა ივანიშვილმა.
მისივე თქმით, ვაზაგაშვილმა ბევრი მნიშვნელოვანი დეტალი გაუმხილა:
_ ისეთი დეტალები მითხრა და აქეთ მამშვიდებდა. რამდენიმე დღეში კიდევ უნდა შევხვედროდი, _ დასძინა ივანიშვილმა.
