ოზურგეთის მუნიციპალიტეტის სოფელ შემოქმედის მცხოვრებლები ხელისუფლებისგან სტიქიით მოყენებული ზარალის ანაზღაურებას ითხოვენ.მარტოხელა პენსიონერი შორენა სიმონიშვილი "გურია ნიუსის" რედაქციაში მოვიდა და დახმარება გვთხოვა. მისი თქმით, მან არა ერთხელ მიმართა ხელისუფლებას განცხადებით, თუმცა, უშედეგოდ.
როგორც შორენა სიმონიშვილი აღნიშნავს, მის ეზოს, რამდენიმე წელია, საფრთხე ექმნება სტიქიის გამო. ყოველ გაწვიმებაზე არის იმის საშიშროება, რომ მდინარე ბჟუჟი ადიდდეს და კარმიდამო დაიტბოროს. სიმონიშვილის თქმით, ერთი წლის წინ, მდინარეს კალაპოტი ხელოვნურად, მასთან შეთანხმების გარეშე შეუცვალეს:
"თვითნებურად მოხდა მდინარისთვის კალაპოტის შეცვლა და ჩვენს ტერიტორიაზე წყლის ნაკადის გამოშვება. აღნიშნულ სამუშაოებში გამოყენებული იყო ტექნიკა _ მდინარის კალაპოტი ტრაქტორების დახმარებით შეცვალეს. მხოლოდ აღნიშნული სამუშაოების დასრულების შემდეგ გახდა ჩვენთვის ცნობილი ეს ფაქტი", _ ამბობს შორენა სიმონიშვილი. ამის შესახებ მან განცხადებით სოფლის წარმომადგენელს და მუნიციპალიტეტის ყოფილ გამგებელს კოტე შარაშენიძეს არა ერთხელ მიმართა:
"ბოლო წყალდიდობისას, რომელიც 2014 წლის 24 სექტემბერს მოხდა, მდინარე ბჟუჟი გადმოვიდა კალაპოტიდან და შემოაღწია ჩვენს ნაკვეთებამდე, რამაც სერიოზული ზარალი მოგვაყენა _ წაგვართვა საშეშე და საშენი მასალა, ჩვენს საცხოვრებელს საფუძველი გამოაცალა და მიწის გარკვეული ნაწილი მიიტაცა, საფრთხე შეექმნა თხილისა და ხეხილის ბაღს. კვლავ არსებობს იმის დიდი რისკი, რომ ისევ დაიტბოროს ჩვენი მიწის ნაკვეთები და ჩვენს ერთადერთ საარსებო წყაროდ ქცეულ თხილის ბაღებს სერიოზული საფრთხე დაემუქროს, _ აღნიშნავს შორენა სიმონიშვილი, _ განცხადებით არაერთხელ მივმართე წინა ხელისუფლებას. ვთხოვდი, მომხდარიყო ასეთი საფრთხეების პრევენცია, თავიდან აგვეცილებინა დატბორვა, თუმცა, როგორც გითხარით, ყურადღება არავინ მოგვაქცია. როგორც ვიცი, გადმორიცხულია 6 მილიონი ლარი, მაგრამ ჩვენთვის არაფერი არაა. სადაა მთავრობა?! ვითხოვ, ამინაზღაურონ ზარალი. ამის მეტად მარტოხელა მოხუცს არ უნდა მიაქციონ ყურადღება?"
ხელისუფლებისგან დახმარებას ითხოვს შემოქმედში მცხოვრები ლევან სარჯველაძეც:
"რამდენიმე წელია, ვიტბორებით. ყოველ გაწვიმებაზე უმძიმეს პირობებში ვართ. გასამაგრებელია ჯებირები. აკეთებენ მხოლოდ ცენტრში. საშინლად დავზარალდით. რამდენჯერ დავწერე განცხადება, მაგრამ… ჩვენი სოფლის რწმუნებულმა არ უნდა მოგვაქციოს ყურადღება?"
"გურია ნიუსი" კომენტარისთვის სოფელ შემოქმედში მუნიციპალიტეტის გამგებლის წარმომადგენელს ბესიკ ლომინაძეს დაუკავშირდა. ლომინაძე რამდენიმე წელია, აღნიშნული 
სოფლის რწმუნებულად მუშაობს.
ბესო ლომინაძე: _ ვიცნობ შორენა სიმონიშვილს. ის არის წესიერი ადამიანი, ძალიან დიდ პატივს ვცემ. წყალდიდობამ წაართვა მცენარეები. იგი იყო ჩემთან მოსული, მაგრამ კონკრეტულად დახმარებაზე არაფერი უთქვამს. შეგხვდებით და აგიხსნით ყველაფერს. არ ვიცი, ვის მიმართა ან ადრე, ან ახლაც, ეს ოჯახი სტიქიით დაზარალებული არაა, ნამდვილად არაა…
_ ბატონო ბესო, ლევან სარჯველაძეს იცნობთ? არც ის არ არის სტიქიით დაზარალებული?
_ ლევან სარჯველაძეს ვერ ვიხსენებ. ჩასმულია პროექტში ეს ყველაფერი. შემოქმედში მიდის მდინარე ბჟუჟის გასწორხაზოვნება. ეს მარტო მაგათი პრობლემა კი არაა, მთელი სოფლის პრობლემაა. კეთდება, დაწყებულია პროექტი, თუ ვინმეს არ აწუხებს პირადად რამე და სხვა ინტერესი არ აქვს, მოგვმართოს ჩვენ. რა უნდათ, რომ დადიან ასე და ლაპარაკობენ?! მიდის აგი მშენებლობა, წყალდიდობამ შემოგვიტია, შორენას რაღაც სამი ხე მოუთხარა, სხვა კი უფრო მეტად დაზარალდა. იქვე წყალსაცავს ვაკეთებ ჩემი ხარჯებით. ყველაფერს ხომ ვერ იტყვი, არა?! ეს ისეთი თემა არაა, რომ რაღაცა ააგოთ, გეფიცებით ადამიანობას, რა! იცნობენ შორენასაც და მეც, კეთდება პროექტი და ვაცალოთ! ნახევარი ჰექტარი სათხილე წამართვა წყალმა, მაგრამ გინახავთ ჩემი საჩივარი სადმე დაწერილი?! _ გვითხრა ლომინაძემ.
