საქართველოს პრეზიდენტი გიორგი მარგველაშვილი მიიჩნევს, რომ ხელისუფლების მიერ მისი "ნაციონალურ მოძრაობასთან" დაკავშირება "ქართულ ოცნებას" სერიოზულ ზიანს მიაყენებს.
"თუ მოახერხებენ და აგიტაციას ეფექტურად განახორციელებენ და საზოგადოებას დააჯერებენ, რომ მე "ნაციონალურ მოძრაობასთან“ შეკრული ვარ, ამით სერიოზულ ზიანს მიაყენებენ საკუთარ თავს და სერიოზულად გააძლიერებენ "ნაციონალურ მოძრაობას“.
ვერ ვხვდები ამას რატომ აკეთებენ?“ _ განაცხადა მარგველაშვილმა "მაესტროს ცხრიანში" საუბრისას.
პრეზიდენტმა პრემიერის განცხადება, რომელიც აკაკი ბობოხიძის ძმის შეწყალებას ეხებოდა ემოციურად შეაფასა:
"მე ვფიქრობ, რომ არის ხოლმე ნაჩქარევი, ემოციური განცხადებები, რომლის პოლიტიკურ შედეგებს ჩვენ ვერ ვიაზრებთ. პრეზიდენტი თავისი უფლებებამოსილების ამ ნაწილში – შეწყალების ნაწილში უნდა იყოს აბსოლუტურად ზეპარტიული.
არ უნდა იყოს ის აქცენტი, თუ ვინ ვისი ძმაა. ჩვენ რაზე ვსაუბრობთ? ჩვენ ვართ საზოგადოება, რომლის წევრებს ჯერ კიდევ ახსოვთ, კანონები, რომლებიც იყო მიღებული მოტივით "Член семьи врага народа". ძალიან ფაქიზად უნდა მოვეპყრათ ამ თემებს", _ აღნიშნა მარგველაშვილმა და დასძინა, რომ შეწყალება ჰუმანური აქტია და მას, როგორც ყველაზე ლეგიტიმურ პოლიტიკურ ფიგურას ქვეყნაში, არა აქვს უფლება ეს "გამოყენებულ იქნას პარტიული და პოლიტიკური ნიშნით"
მარგველაშვილმა არასერიოზული უწოდა ღარიბაშვილის იმ განცხადებას, რომლის თანახმადაც პრემიერი იმედოვნებს, რომ პრეზიდენტი ახალაიას, მერაბიშვილსა და სააკაშვილსაც შეიწყალებს.
პრეზიდენტმა "მაესტროს ცხრიანში" სტუმრობისას საბანკო ზედამხედველობის ეროვნული ბანკიდან გამოყოფის კანონპროექტზე ვეტოს დადებაზეც ისაუბრა და აღნიშნა, რომ ის ქვეყნის ფუნდამენტურ ინტერესებს იცავს.
"მოტივირებული შენიშვნების კანონპროექტის სახით წარდგენა ჩემი ვალდებულებაა. ის ვალდებულებაა, რომელიც მე ავიღე, რომ ამას განვახორციელებ. როდესაც მე დავინახავ, რომ რამე ტიპის კანონპროექტი ეწინააღმდეგება ქვეყნის ფუნდამენტურ ინტერესებს, მე არ შევშინდები, არ გავალ ბუჩქებში და არ ვიტყვი, მოდით, ჩვენ ხომ ერთი გუნდი ვართ და მე სიმართლეს არ ვიტყვი.
მიუხედავად იმისა, რომ ამას პოლიტიკური კამპანიები და შეურაცხყოფა მოჰყვება, მაინც ღიად ვიტყვი სიმართლეს, რადგანაც მიმაჩნია, რომ ეს კარგი არის საქართველოსთვის.
შეიძლება ეს არ იყოს კომფორტული მმართველი გუნდისთვის, მაგრამ მე ვარ საქართველის მოსახლეობის მიერ არჩეული პრეზიდენტი, რომელმაც ფიცი დადო არა "ქართული ოცნების“ წინაშე, არამედ, საქართველოს მოსახლეობის წინაშე და სახელმწიფოს წინაშე, რომ ემსახურებოდა არა პოლიტიკურ პარტიას, არამედ ემსახურებოდა ქვეყანას“, – განაცხადა მარგველაშვილმა.
