საქართველოს პრეზიდენტმა გიორგი მარგველაშვილმა, დღეს, თბილისის საერთაშორისო კონფერენცია „ევროპის ახალი გეოპოლიტიკური ლანდშაფტი: უსაფრთხოება, ეკონომიკური შესაძლებლობები, თავისუფლება და ადამიანური ღირსება ფრონტისპირა ქვეყნებში“ გახსნა, რომელიც საქართველოში მაკკეინის ინსტიტუტის საერთაშორისო ლიდერობისათვის და ეკონომიკური პოლიტიკის კვლევის ცენტრის (EPRC) ორგანიზებით ტარდება.
ღონისძიებაზე დამსწრე საზოგადოებას საქართველოს პრეზიდენტმა და პრემიერ-მინისტრმა სიტყვით მიმართეს.
სახელმწიფოს მეთაურმა ყურადღება ერთიანი, თავისუფალი და მშვიდობიანი ევროპის მნიშვნელობასა და რეგიონალური უსაფრთხოების საკითხებზე გაამახვილა და რუსეთის საგარეო პოლიტიკის საფრთხეებზე ისაუბრა.
გიორგი მარგველაშვილმა 2008 წლის აგვისტოს ომის შედეგების განხილვისას აღნიშნა, რომ უკრაინაში განვითარებული ტრაგედია, სწორედ, შვიდი წლის წინ, რუსეთის მიერ საქართველოს მიმართ განხორციელებულ აგრესიაზე საერთაშორისო საზოგადოების მხრიდან არასათანადო რეაგირების ლოგიკური გაგრძელებაა.
"მე მჯერა, რომ ფორმულა, რომელიც ევროპის უსაფრთხოებასა და სტაბილურობას ასახავს, ნამდვილად ვერ განიხილება, თუ არ იქნება საქართველოს და უკრაინის ფაქტები გათვალისწინებული.
ასევე, თუ არ იქნება გათვალისწინებული პასუხგაუცემელი შეკითხვა, როგორ უნდა გავუმკლავდეთ პრივილეგირებული ზომების ინტერესის პოლიტიკას.
ეს არის გამოხატული, მკაფიოდ ჩამოყალიბებული საგარეო პოლიტიკა და მესიჯი რუსეთიდან – რუსეთის მეზობლები ქვეყნები არიან რუსეთის ფედერაციის ინტერესის ზონა და ყველა მოვლენა, რაც ხდება ამ ტერიტორიაზე, რუსეთის პოლიტიკოსების მიერ განხილულია, როგორც სფერო, სადაც მათ შეუძლიათ გადაწყვეტილების მიღება ნებისმიერი ფორმით, მათ შორს სამხედრო ფორმითაც.
რომ ვისაუბროთ ცალკე შემთხვევებზე, რა ხდება საქართველოში, რა ხდება უკრაინაში, რა ხდება მაგალითად ყირიმში, ცხინვალში, ასე ცალ-ცალკე, ეს შეიძლება არ იყოს სწორი მიდგომა. ჩვენ გვაქვს კონკრეტული საგარეო პოლიტიკური მესიჯი და ხედვა რუსეთისგან, ჩვენ ამას არ უნდა გავექცეთ, აუცილებლად უნდა მოვამზადოთ პასუხი ამ დამოკიდებულებაზე.
მე ჯერ კიდევ ვერ ვხედავ ამ ჩამოყალიბებულ პასუხს იმ ქვეყნებს შორის, იმ სახელმწიფოებს შორის, რომელთა ჯგუფსაც ჩვენ მივეკუთვნებით", – განაცხადა გიორგი მარგველაშვილმა.
კონფერენციის ფარგლებში საქართველოს პრეზიდენტსა და მაკკეინის ინსტიტუტის აღმასრულებელ დირექტორს, NATO-ში აშშ-ის ყოფილ ელჩს კურტ ვოლკერს შორის დისკუსია გაიმართა.
დისკუსია საქართველოში დემოკრატიის განვითარებას, ქვეყნის წინაშე არსებულ პოლიტიკურ, ეკონომიკურ, საგარეო და უსაფრთხოების მიმართულებით არსებულ გამოწვევებს და ქვეყნის სამომავლო სტრატეგიას შეეხო.
როგორც გიორგი მარგველაშვილმა აღნიშნა, საქართველომ დამოუკიდებლობის აღდგენის შემდეგ მკაცრი საგარეო ზეწოლისა და ქვეყანაში ეკონომიკური კრიზისის ფონზე, შეძლო დემოკრატიული რეფორმების განხორციელება და განვითარება; მიუხედავად ქვეყნის წინაშე არსებული გამოწვევებისა, დღეს საქართველო მსოფლიო გეოპოლიტიკური სისტემის მნიშვნელოვანი ნაწილია.
საქართველოს პრეზიდენტმა დამსწრე საზოგადოების კითხვებსაც უპასუხა.
თბილისის საერთაშორისო კონფერენციას მაღალი რანგის პირები, ხელისუფლების, პოლიტიკური პარტიების, აშშ-ის, დასავლეთ და აღმოსავლეთ ევროპის პოლიტიკური, დიპლომატიური, აკადემიური და ექსპერტული წრეების და სამოქალაქო საზოგადოების წარმომადგენლები ესწრებოდნენ.
2015 წლის თბილისის საერთაშორისო კონფერენციის დასრულების შემდეგ შემუშავდება და გამოქვეყნდება სამოქმედო გეგმა, რომელსაც სარეკომენდაციო სახე ექნება და შესაძლებელს გახდის განვითარებადი დემოკრატიების უფრო ქმედით მხარდაჭერას.
