იმედა დვალიძე: „დოკუმენტის სიყალბეს ვერ გადაფარავს ვანო ჩხარტიშვილის დისკრედიტაციის მცდელობები“

საქმეს თბილისის საქალაქო სასამართლოს მოსამართლე გიორგი სულაკაძემ განიხილავს, რომელმაც საბოლოო გადაწყვეტილება 3 თებერვალს უნდა გამოიტანოს.

გუშინ, ვანო ჩხატრიშვილის ადვოკატმა იმედა დვალაძემ განცხადება გაავრცელა, რომელიც "ტრანსფორდის" განცხადების საპასუხო იყო. დვალაძეს განცხადებით გუშნვე უპასუხეს კომპანია "ტრანსფორდის" წარმომადგენლებმა.

 "ბატონი ივანე ჩხარტიშვილის წარმომადგენლების მიერ დღეს გაკეთებული განცხადების საპასუხოდ გვსურს, განვაცხადოთ შემდეგი: ჩვენ არ ვთვლით საჭიროდ მსგავს პროვოკაციულ, არაკომპეტენტურ განცხადებებზე რეაგირება მოვახდინოთ. რადგან ოპონენტის გეგმის ნაწილია საზოგადოების შეცდომაში შეყვანა, მხოლოდ იმის გამო ვპასუხობთ აღნიშნულ განცხადებას.

ჩხარტიშვილის ადვოკატის მიერ გაკეთებული დღევანდელი განცხადება კვლავ ემსახურება კონკრეტულ გეგმას, მოხდეს ჩვენი, როგორც მოპასუხე მხარის განეიტრალება და საზოგადოებაში ბატონი ჩხარტიშვილის იმიჯის კარგად წარმოჩინება.

ჩვენი გუშინდელი განცხადება ცხადყოფდა, რომ გვაქვს საფუძვლიანი ეჭვი მოსამართლე გიორგი სულაკაძისა და ვანო ჩხარტიშვილის შესაძლო გარიგების თაობაზე, დღევანდელი თავდასხმის საფუძველი სწორედ ეს განცხადება გახდა.

საზოგადოებამ კარგად იცის ვანო ჩხარტიშვილის წარსული, მისი შემოქმედება ქართველი ხალხის "ძარცვის შესახებ", აქედან გამომდინარე, ჩვენ კანონის ფარგლებში ვაგრძელებთ დავას და დაველოდებით შედეგებს, რომელსაც გამოიტანს სასამართლო და ასევე კანონიერად დამდგარი შედეგების მიხედვით გავაგრძელებთ დავას.

ნიშანდობლივია, რომ კანონის უზენაესობის მქონე ქვეყანაში, დიდ ბრიტანეთში ვანო ჩხარტიშვილმა უკვე წააგო საქმე, სადაც იგი ინგლისელმა მოსამართლემ ქონების მიმთვისებლად სცნო. შესაბამისად, ვანო ჩხარტიშვილის მცდელობა თავი მსხვერპლად წარმოაჩონოს, ნებისმიერ სამართლებრივ დავაში, უბრალოდ კომიკურია",  _ ნათქვამია კომპანია "ტრანსფორდის" მიერ გავრცელებულ განცხადებაში, რომელიც სააგენტო "ინტერპრესნიუსმა" გამოაქვეყნა.

კომპანიის ამ განცხადებას ჩხარტიშვილის ადვოკატის პასუხი მოჰყვა.

"28 იანვარს გავრცელდა კომპანია „ტრანსფორდის“ მორიგი განცხადება ბიზნესმენ ვანო ჩხარტიშვილის კომპანიების მიერ აღძრულ სარჩელთან დაკავშირებით. წინა განცხადებებისაგან განსხვავებით, რომლებშიც  ძირითადი აქცენტი გამიზნულად საქმის განმხილველი მოსამართლის   დასაშანტაჟებლად კეთდებოდა, ამჯერად, მცდელობაა აბსურდული  ბრალდებებით ბიზნესმენ ვანო ჩხარტიშვილის დისკრედიტაცია მოხდეს.

ყოველივე ამან უკვე კომიკური სახე მიიღო და ადასტურებს მოწინააღმდეგეების აგონიაში ყოფნას.  ადამიანურად გვესმის კიდეც მათი, რადგან  არ გააჩნიათ არანაირი არგუმენტი, რომელიც ჩვენს სიმართლეს უარყოფდა. ყველაზე უკეთ სწორედ მათ იციან, რომ ბიზნესმენ ვანო ჩხარტიშვილის კომპანიებისთვის ნავმისადგომების იჯარის უფლების შეწყვეტა მოხდა შეითითხნილი დოკუმენტის საფუძველზე.  დანაშაულებრივი სქემის მონაწილეებს იმდენად სჯეროდათ დაუსჯელობის, რომ ყალბი დოკუმენტიც  ერთობ ზერელედ შექმნეს – იმაზეც კი არ იზრუნეს, რომ ყალბი დასკვნის ხელმომწერი უკრაინელი „ექსპერტებისთვის“ საზღვარგარეთული პასპორტები აეღოთ და საქართველოში ჩამოეყვანათ.

ეს ყოველივე მათ კარგად იციან, ხედავენ იმასაც, რომ დამარცხება გარდუვალია და უმწეობისგან სახე ბოლომდე დაკარგეს.  დავის ეთიკის ელემენტარული ნორმების დარღვევაა, როცა  სიყალბის გადაფარვას ბიზნესმენ ვანო ჩხარტიშვილის დისკრედტაციით ცდილობ . ერთი მხრივ, ნაციონალების სიცრუის  სკივრიდან ხალხის „ძარცვის“ ყავლგასული თემის  ამოქექვა და, მეორე მხრივ, სხვა ქვეყანაში სხვა მხარეების მონაწილეობით მიმდინარე, ჯერაც დაუსრულებელი სამართალწარმოების ჩხარტიშვილის იმიჯის შესალახად გამოყენება იმას ჰგავს, ერთმანეთს რომ  სრულიად განსხვავებული ორი საგანი შეადარო, რომელთაგან ერთი ლურჯია, ხოლო მეორე თბილი.

აქაც ღრმად ცდებით. თქვენს შეფასებას თუ გამოვიყენებთ „ნიშანდობლივია, რომ კანონის უზენაესობის მქონე, დიდ ბრიტანეთში“ პატარკაციშვილებთან დასრულებულია  ერთი სასამართლო პროცესი და , თქვენდა სამწუხაროდ, იგი ვანო ჩხარტიშვილმა მოიგო. კერძოდ, ოჯახმა აღიარა, რომ ყველაზე ღირებული სადაო აქტივი- ყულევის ტერმინალი, ვანო ჩხარტიშვილის საკუთრებაა.

ლონდონში მიმდინარე მეორე პროცესის პირველი ინსტანცია წავაგეთ, მაგრამ მას მეორე ინსტანციაში ვასაჩივრებთ. ამავე თემაზე დავა მიმდინარეობს ქართულ სასამართლოშიც და აქ ჩვენ  პირველი  ინსტანცია მოგებული გვაქვს. თუმცა,ყოველივე ამას არანაირი მიმართება არ აქვს თქვენთან  დავასთან, მაგრამ  სწორედ იმიტომ სცადეთ სრულიად სხვა საქმეზე უმწეო გადამისამართება, რომ ჩხარტიშვილის რეპუტაციის შელახვის მცდელობით, იქნებ როგორმე საქმის განმხილველ მოსამართლეზე იქონიოთ ზეგავლენა. სულ ტყუილად, რადგან საზოგადოებაც და სასამართლო კორპუსიც კარგად ხედავს სიცრუეს და სიყალბეს თქვენს ქმედებებსა და სიტყვებში" _ აღნიშნულია იმედა დვალაძის განცხადებაში.