ლანჩხუთის მუნიციპალიტეტის სოფელ შუხუთში "საქართველოს განვითარების ფონდის" დამფუძნებელი, პაატა ბურჭულაძე თავის გუნდთან ერთად ლელობურთს დაესწრო. ანსამბლ "ხელხვავთან" ერთად ბურჭულაძემ "ხასანბეგურა" შეასრულა, რის შემდეგ ის ადგილობრივებს გაესაუბრა.
ლანჩხუთში მუნიციპალიტეტის მკვიდრმა და ა.(ა).ი.პ-ის "კულტურის დაწესებულებათა გაერთიანების" თანამშრომელმა მაია ჩხაიძემ პაატა ბურჭულაძეს კითხა, რომ რატომ არიან მის გვერდით "ნაცმოძრაობის" ყოფილი სახეები.
"თქვენ ხელოვნებას ვეთაყვანები, მაგრამ პოლიტიკაში ხომ არ მოხდება ისე, რომ ყოფილი "ნაცმოძრაობის" წევრებს შემოიკრებთ გვერდით. ასევე ვხედავ თქვენს გვერდით ისეთს პირებს, რომლებიც "ნაცმოძრაობის" აქტიური სახეები იყვნენ. მათ ბევრი აქვთ ცოდვა ჩადენილი."-თქვა მაია ჩხაიძემ.
პაატა ბურჭულაძემ თხოვა მაია ჩხაიძეს დაეკონკრეტებინა, ვის გულისხმობდა "ნაციონალურ მოძრაობის" სახეებში.
"ქართულ ოცნებას" უნდა, რომ დამაკავშირონ "ნაცმოძრაობასთან." მინდა გითხრათ, რომ მე ვარ საქართველოს წარმომადგენელი. მე არ ვიცი ვის რა ცოდვა აქვს, ღმერთმა აპატიოს. საქართველოს, როდესაც ჭირდება, უნდა ვიყოთ ერთად." – უპასუხა ჩახვაძეს პაატა ბურჭულაძემ.
"გურია ნიუსთან" საუბრის დროს პაატა ბურჭულაძე სამომავლო გეგმების შესახებ ვრცლად არ საუბრობს, თუმცა ადასტურებს იმ ფაქტს, რომ პოლიტიკაში წასვლაზე ფიქრობს.
"ჯერჯერობით ვერაფერს გეტყვით. მე დავპირდი მოსახლეობას, რომ მაისში ჩემს გუნდთან ერთად გავაჟღერებ ჩემს გეგმებს. პასუხი იქნება დადებითი, რადგან ხალხისგან მოდის დიდი მოთხოვნა და ხალხს უარს ვერ ვეტყვი. თუ მოვედით პოლიტიკაში, ყველაზე წარმატებული ჩვენი ვიქნებით. იმიტომ, რომ პოლიტიკა არ არსებობს დღეს საქართველოში." – გვითხრა პაატა ბურჭულაძემ.
