ლანჩხუთის მუნიციპალიტეტის სხვადასხვა ადმინისტრაციულ ერთეულში მცხოვრებ სოციალურად შეჭირვებულებსა და შეზღუდული შესაძლებლობის მქონე 40 ადამიანის, რომლებსაც გადაადგილება უჭირთ, მუნიციპალიტეტი უფასო საკვებით უზრუნველყოფას გეგმავს.
აღნიშნული გადაწყვეტილების შესახებ, ლანჩხუთის მუნიციპალიტეტის გამგებელმა ზაზა ურუშაძემ ადმინისტრაციულ ერთეულებში თავის წარმომადგენლებთან შეხვედრისას განაცხადა:
"ჩვენ უამრავი სოციალურად დაუცველი ადამიანი გვყავს, მათ შორის, ისეთებიც, რომლებსაც არა მხოლოდ ეკონომიკურად უჭირთ, არამედ შეზღუდული შესაძლებლობების მქონე პირებიც არიან და გადაადგილება მათთვის პრობლემას წარმოადგენს. მე დავავალე ჩემს თანაშემწეს, რომ თითოეულ ადმინისტრაციულ ერთეულში ასეთი ადამიანების სია შეადგინოს. გადავწყვიტეთ, რომ მათ კვირაში ორ დღეს მივაწოდოთ უფასო ერთჯერადი სადილი", _ გამგეობის ოფიციალურ გვერდზე ციტირებულია გამგებლის სიტყვები.
სოფლებში ბენეფიციართა უფასო საკვებით უზრუნველყოფა კვირაში ორჯერ იგეგმება ა(ა)იპ "უფასო სასადილო მზრუნველობამოკლებულთათვის" მიერ განსაზღვრული მენიუს შესაბამისად, რომელიც ამ ეტაპამდე მხოლოდ ქალაქის ტერიტორიაზე მცხოვრებ 60 ბენეფიციარს უწევს კვებით უზრუნველყოფას.
როგორც "უფასო სასადილო მზრუნველობამოკლებულთათვის" მენეჯერმა ანზორ როყვამ გვითხრა, ზემონახსენები გეგმის გახორციელება იმ არსებული ფინანსების ფარგლებში მოხდება, რომელიც უფასო სასადილოს გააჩნია:
"ვაპირებთ, კვირაში ორჯერ სოფლებშიც მივაწოდოთ უფასო საკვები გარკვეულ კატეგორიას, რის დაფინანსებაც არსებული ბიუჯეტიდან მოხდება, ჯერჯერობით, თანხა საკმარისი გვაქვს საამისოდ", _ გვითხრა როყვამ.
2016 წლის მუნიციპალიტეტის მთავარი საფინანსო დოკუმენტის თანახმად, ა(ა)იპ "უფასო სასადილო მზრუნველობამოკლებულთათვის" ბიუჯეტი წელს 77 ათასი ლარითაა განსაზღვრული. ცნობისთვის, მუნიციპალიტეტის საკრებულოში დაწყებულია ადმინისტრაციული წარმოება, რომ ა(ა)იპ-ში არაფინანსური აქტივების მუხლი, სუბსიდიის მუხლის შემცირების ხარჯზე, 200 ლარით გაიზარდოს.
