საკონსტიტუციო სასამართლოს მოსამართლე მერაბ ტურავა დღეს "რუსთავი 2"-ის საქმეზე გადაწყვეტილების გამოცხადების თაობაზე ინფორმირებული არ არის.
როგორც მერაბ ტურავამ ჟურნალისტებს განუცხადა, "რუსთავი 2"-ის საქმესთან დაკავშირებით სამუშაო შეხვედრა, რომელიც გადაწყვეტილების გამოცხადებამდე უნდა შედგეს, არ ყოფილა. მისი თქმით, გუშინ საორგანიზაციო სამსახურთან კონტაქტის დროს მხოლოდ სამ საქმესთან დაკავშირებით გადაწყვეტილების გამოცხადებაზე მიიღო ინფორმაცია და მათ შორის "რუსთავი 2"-ის საქმე არ ყოფილა.
"გუშინ, საორგანიზაციო სამსახურთან კონტაქტის დროს საუბარი იყო მხოლოდ სამ სარჩელზე გადაწყვეტილების გამოცხადების შესახებ და მათ შორის არ ყოფილა "რუსთავი 2"-ის საქმე. ამ საქმეზე გუშინ არ გვქონია მსჯელობა, არც ელექტრონული ფოსტით არ მიმიღია შეტყობინება, რომ დღეს ამ საკითხზე ცხადდებოდა გადაწყვეტილება. სამუშაო ფორმატში გავარკვევ. ძალიან ცუდია, რომ ჟურნალისტებზე გვიან ვიგებ, 14:00-დან 15:00 საათამდე გამოცხადების შესახებ. მე ვიცი და მაქვს შეტყობინება, რომ 15:00 საათიდან 17:00 საათამდე იქნება სამ საქმეზე გადაწყვეტილების გამოცხადება", _ აღნიშნა მერაბ ტურავამ.
საკონსტიტუციო სასამართლოს ინფორმაციით, დღეს 14:00 საათიდან 15:00 საათამდე საქართველოს საკონსტიტუციო სასამართლოს პირველი კოლეგია გამოაცხადებს გადაწყვეტილებებს ხუთ კონსტიტუციურ სარჩელზე, მათ შორის "რუსთავი 2"-ის საქმეზე.
ამ შემთხვევაში, საქმე ეხება მოსამართლე თამაზ ურთმელიძის გადაწყვეტილებას, რომლის თანახმადაც "რუსთავი 2"-ში დაინიშნა დროებითი მმართველები. საკონსტიტუციო სასამართლომ ნორმა 2015 წლის 13 ნოემბერს შეაჩერა, რის შემდეგაც იყო არსებითი განხილვა და დღეს გამოცხადდება გადაწყვეტილება.
საკონსტიტუციო სასამართლომ ინფორმაცია გადაწყვეტილებების გამოცხადების თაობაზე ოფიციალურ ვებ გვერდზე განათავსა.
