თბილისის პოლიციის დეპარტამენტის დიდუბე-ჩუღურეთის სამმართველოს თანამშრომლებმა, ჯგუფურად ჩადენილი ყაჩაღობის ფაქტზე 1971 წელს დაბადებული ი.ნ., 1971 წელს დაბადებული კ.გ, 1988 წელს დაბადებული ი.ტ. და 1984 წელს დაბადებული მ.გ. დააკავეს.
როგორც "გურია ნიუსს" შსს-ს პრესსამსახურიდან ატყობინებენ, გამოძიებამ დაადგინა, რომ დაკავებულებმა წინასწარ შეიმუშავეს თბილისში, ცოტნე დადიანის ქუჩაზე მდებარე ერთ-ერთი ბანკის ექსპრეს ფილიალის დაყაჩაღების გეგმა. მიმდინარე წლის 29 სექტემბერს, ი.ნ.-მ, ამავე ბანკის ინკასაციის თანამშრომელის, კ.გ-ს დახმარებით, პისტოლეტის ფორმის სანთებელას მუქარით, ბანკის მორიგე მოლარე-ოპერატორს დიდი ოდენობით თანხა გასტაცა და შემთხვევის ადგილიდან მიიმალა. ყაჩაღობის ორგანიზებაში ასევე მონაწილეობდნენ ი.ტ. და მ.გ. სამართალდამცველებმა ბრალდებულები მომხდარიდან რამდენიმე საათში თბილისში დაააკავეს.
უწყების ცნობით, პოლიციამ ბანკიდან წაღებული თანხის დიდი ნაწილი და დანაშაულის ჩადენის იარაღი- პისტოლეტ-სანთებელა ნივთმტკიცებად ამოიღო.
ოთხივე დაკავებული ჩადენილ დანაშაულს აღიარებს.
გამოძიება ჯგუფურად ჩადენილი ყაჩაღობის ფაქტზე მიმდინარეობს (საქართველოს სისხლის სამართლის კოდექსის 179-ე მუხლის მე-2 ნაწილის „ა“, „ბ“ ქვეპუნქტებით და მე-3 ნაწილის „გ“ ქვეპუნქტით).
