შსს-ს მაშველებმა, ღამის განმავლობაში, დახმარება 8 ტურისტს აღმოუჩინეს, _ ინფორმაციას საგანგებო სიტუაციების მართვის სააგენტო ავრცელებს.
როგორც სააგენტო იტყობინება, გადაუდებელი დახმარების ოპერატიული მართვის ცენტრ „112“-დან 19:23 საათზე შევიდა SOS-შეტყობინება იმის შესახებ, რომ მცხეთა-მთიანეთის რეგიონში მყოფ პოლონელ ტურისტებს გზა აებნათ და დახმარებას ითხოვდნენ.
“შეტყობინების მიღებისთანავე, ოპერატიულად დადგინდა მათი ადგილსამყოფელი და დუშეთის სახანძრო-სამაშველო ჯგუფმა, 4-კაციანი შემადგენლობით, დაუყოვნებლივ დაიწყო საძიებო სამუშაოების წარმოება.
რთული რელიეფური პირობებისა და შეზღუდული ხილვადობის მიუხედავად, პოლონეთის 2 მოქალაქეს მაშველებმა რამდენიმე საათში მიაკვლიეს. ისინი სოფლების – ჯუთასა და როშკას მოსაზღვრე ტერიტორიაზე იმყოფებოდნენ. გზააბნეული 2 ტურისტის გადაყვანა უსაფრთხო ადგილზე მაშველებმა ოპერატიულად შეძლეს.
ამავე ტერიტორიის სიახლოვეს, შსს-ს საგანგებო სიტუაციების მართვის სააგენტოს მაშველებმა სხვა გზააბნეულ ტურისტებსაც მიაკვლიეს (საფრანგეთის 3 და უკრაინის 3 მოქალაქე). მათ დაუყოვნებლივ გაეწიათ შესაბამისი დახმარება და მას შემდეგ, რაც უსაფრთხოდ იგრძნეს თავი, მაშველების დახმარებით, როშკაში, ერთ-ერთ სასტუმროში დაბინავდნენ.
შსს-ს საგანგებო სიტუაციების მართვის სააგენტოს მაშველებმა სამაშველო ოპერაცია 02:40 საათზე დაასრულეს”, _ ნათქვამია სააგენტოს ოფიციალურ გვერდზე გამოქვეყნებულ ინფორმაციაში.
