ქალაქ ოზურგეთში, ჩოხატაურის ქუჩაზე, ქარსაფარი ნაძვი მოჭრეს. “გურია ნიუსის” წყაროს ინფორმაციით, ნაძვის მოჭრის მიზეზი იქ მცხოვრები ერთ-ერთი ამომრჩევლის თხოვნა გახდა.
როგორც “გურია ნიუსს” უთხრეს, როცა მაჟორიტარი დეპუტატობის კანდიდატებთან შეხვედრები მიმდინარეობს, მოსახლეობას ეკითხებიან, რა პრობლემები აწუხებთ და რა სურთ, რომ ხელისუფლებამ გაუკეთოს.
მოსახლეობის სურვილების გათვალისწინების ერთერთი დამადასტურებელი ფაქტი ნაძვის მოჭრა, რასაც თავად ჩოხატაურის ქუჩაზე მცხოვრები, ქალაქ ოზურგეთის მუნიციპალიტეტის მერიის ა(ა)ი.პ. “ოზურგეთის სერვისცენტრის” ხელმძღვანელი ვლადიმერ სალუქვაძეც ადასტურებს.
“გურია ნიუსთან” ჩოხატაურის ქუჩის მცხოვრებლები ამბობენ, რომ მათთვის გაუგებარია, ვინ მოჭრა ნაძვები და რატომ, თუმცა, ფლობენ ინფორმაციას, რომ ეს წინასაარჩევნოდ მოხდა, რადგან ერთ-ერთმა ამომრჩეველმა უთხრა მმართველი გუნდის წარმომადგენელს, რომ ხელისუფლებას იმ შემთხვევაში მისცემდა ხმას, თუ ამ ნაძვს მოჭრიდნენ. ეს სურვილი, მათივე თქმით, ხელისუფლებამ მოქალაქეს შეუსრულა.
_ მოვიდნენ და მოჭრეს. ვინ მოჭრა, არ ვიცით, ჩვენ რომ მოვჭრათ, დაგვიჭერენ, არჩევნებში ხმის მისაცემად მოჭრესო, ასე თქვეს. მე არ ვყოფილვარ და ზუსტად ვერ გეტყვი, ვინ მოჭრა, _ გვითხრა ადგილზე მისულს ერთერთმა ადგილობრივმა.
“გურია ნიუსი” შეეცადა, კონკრეტული ინფორმაცია იმ ოჯახთან გადაემოწებინა, რომლის წევრებმაც ნაძვის მოჭრა სთხოვა ხელსიუფლებას.
მარინა ტარიელაძე: _ არ ვიცი ზუსტად, რომელმა სამსახურმა მოჭრა. ჩვენს გარაჟს უქმნიდა პრობლემას ქარში. განცხადებით მივმართეთ ადგილობრივ ხელისუფლებას. კერძოდ, არ ვიცი ვის მიმართეს ჩემმა დედამთილმა და მამამთილმა.
“გურია ნიუსი” დაუკავშირდა პარტია “ქართული ოცნების” მაჟორიტარი დეპუტატობის კანდიდატს მამუკა გოგუაძეს, რომელიც ამ უბანში იყრის კენჭს.
მამუკა გოგუაძე: _ პირველად მესმის. ტარიელაძე ვინ არის საერთოდ, არ ვიცი. სად მოვჭერი, რომელი ხე მოვჭერი?! ერთადერთი შემთხვევა იყო, მეორე ჩაის ფაბრიკის წინ მოსახლეობას როცა ვხდებოდი, მითხრეს, რომ ეს ხეები არის მოსაჭრელიო. არ შეიძლება ხეების მოჭრა, მოსხეპეო და არ მომიჭრია. ვის მივუთითე, კაცო?! სიცრუეა! ფიზიკურად არ ვიცნობ მაგ ქუჩაზე არავის. უბნის უფროსს, ჯონის დაურეკეთ _ იქნებ, მან იცის რამე.
ქალაქ ოზურგეთის მუნიციპალიტეტის ა(ა)ი.პ. ოზურგეთის სერვისცენტრის უფროსი ვლადიმერ სალუქვაძე “გურია ნიუსთან” ადასტურებს, რომ მისმა თანამშრომლებმა გუშინ აღნიშნულ უბანში ნაძვის ხე მართლაც მოჭრეს:
_ ერთი ნაძვი კი წააქციეს ჩემებმა. ეს იყო მოსახლეობის მოთხოვნა _ გარაჟს უქმნიდა პრობლემას სტიქიის შემდეგ.
_ ბატონო ვლადიმერ, იქ მცხოვრებლები ამბობენ, რომ ნაძვი წინასაარჩევნოდ ამომრჩევლის მოსყიდვის მიზნით მოიჭრა.
_ მარტო მანდ არ მოიჭრა _ კოსტავას ქუჩის ბოლოშიც მოიჭრა, სადაც იყო კიდევ ხის წაქცევის საშიშროება. საშიში კრიტიკული წერტილების შესწავლა მიდის და რეაგირებას ვახდენთ, ზომებს ვიღებთ, _ ამბობს სალუქვაძე.
“გურია ნიუსი” დაუკავშირდა “ქართული ოცნების” საარჩევნო შტაბის ზონის უფროსს ჯონი კალანდაძეს, რომელმაც თქვა, რომ აღნიშნულ ფაქტთან მაჟორიტარი დეპუტატობის კანდიდატს საერთო არაფერი აქვს:
_ მმართველი გუნდი არაფერ შუაშია. მე ვცხოვრობ მაქ ახლოს, მოვიდა ჩემთან იქ მცხოვრები ერთ-ერთი ოჯახის თხოვნით _ ნაძვს ფესვები ჰქონდა მათი გარაჟის ძირში გადგმული. მე მივმართე თხოვნით ადგილობრივ ხელისუფლებას, თუ შეიძლებოდა ამ ნაძვის მოჭრა, რადგან გარაჟს ემუქრებოდა დანგრევა. მაქ მამუკა არაფერ შუაში არ არის, საერთოდ არ ყოფილა ის ჩოხატაურის ქუჩაზე მაგ ფაქტის დროს, _ გვითხრა კალანდაძემ.
