პოლიტოლოგმა სოსო ცინცაძემ პრემიერსა და ,,ნაციონალური მოძრაობის“ წევრ ნიკა მელიას შორის მომხდარი დაპირისპირების შესახებ “გურია ნიუსთან” ისაუბრა და აღნიშნა, გუშინ პრემიერ-მინისტრი არ მოქცეულა ისე, როგორც ქვეყნის მთავარ ჩინოვნიკს შეეფერება. ცინცაძის თქმით, კვირიკაშვილმა კარგად იცოდა, რომ ,,ნაციონალური მოძრაობა“ მას თაიგულებითა და კომპლიმენტებით არ დახვდებოდა.
,,ნაციონალური მოძრაობის“ პარლამენტში ყოფნა ამომრჩეველმა გადაწყვიტა. ესე იგი, მათ უნდათ, რომ პარლამენტში იყვნენ. პრემიერ-მინისტრი არ მოქცეულა ისე, როგორც პოლიტიკოსი და სახელმწიფოს პირველი ჩინოვნიკი მოიქცეოდა. გუშინ დავინახეთ ილუსტრაცია იმის, რომ ჩვენს პარლამენტში ძალზე ცოტაა პოლიტიკოსი, ამ ტერმინის კლასიკური გაგებით. ოპოზიციის მხრიდან ისეთი არაფერი მომხდარა, რაც სხვა ქვეყნებში არ ხდება. გამართლება იმასთან დაკავშირებით, რომ ჩვენ თმენის ვალდებულება გვაქვს და ჩვეულებრივი ადამიანები ვართ _ ხალხს უკვე ყელში ამოუვიდა. მთავრობაში და პარლამენტში უნდა იყოს ისეთი ხალხი, რომ ისეთი ჯოჯოხეთური ტვირთი ზიდონ, რასაც ჰქვია ქვეყნის მართვა. როდესაც ჩვენ მიერ დაქირავებული ქვეყნის ჩინოვნიკი, ჩვეულებრივ მეეტლესავით იგინება, მიუღებელია. ჩვენ გვყავს ისეთი მთავრობა, როგორსაც ვიმსახურებთ! ჩვენ გვყავდა დედაქალაქის ისეთი მერი, როგორსაც ვიმსახურებდით! ნარმანია ილანძღებოდა და მერე ბოდიშს უხდიდა საზოგადოებას. მსოფლიოში არსად მომხდარა ასეთი რამე და საქართველოში ხდება, რომ ერთმა ადამიანმა მეორეს საჯაროდ ხულიგნურად შეურაცხყოფა მიაყენოს და მერე საზოგადოებას ბოდიში მოუხადოს. პრემიერის ამ ბილწსიტყვაობას არანაირი გამართლება აქვს. პრემიერ-მინისტრმა გუშინ კარგად იცოდა, სად მიდიოდა, ვისთან მიდიოდა, ისიც იცოდა, როგორ შეხვედრას უმზადებდნენ ოპონენტები და რას ელოდა, _ მაინტერესებს. კვირიკაშვილი რას ელოდა მელიასგან და ,,ნაციონალებისგან“? თაიგულებითა და კომპლიმენტებით დახვდებოდნენ, რა კარგი თაობა ხართ და მოსპეთ უმუშევრობა, ლარი გაამყარეთ, ყველა კარგად ცხოვრობს, მედია კარგად არსი, ყველა კმაყოფილია თქვენიო? ასეთ ამბებს ელოდა? უბრალოდ, კვირიკაშვილმა დაამტკიცა ის, რაც ყველამ იცოდა, ჩვენს მთავრობაში ძალიან ცოტა არის ნამდვილი პროფესიონალი პოლიტიკოსი. რაკი კვირიკაშვილმა პოლიტიკურ თავშეკავებულობას ძველბიჭური ჟანრი ამჯობინა, ბოლომდე უნდა მიჰყვეს ამ ჟანრს და რასაც შეჰპირდა მელიას, შენს კეთილებს ამას ვუზამ, იმას ვუზამო, უნდა შეუსრულოს. თორემ მაშინ აღარც ძველი ბიჭი გამოვა მისგან და აღარც პოლიტიკოსი. სხვა შემთხვევაში გამოვა ფუმფლო, რომელიც დაჰპირდა და აღარ შეუსრულა“, _ განაცხადა სოსო ცინცაძემ „გურია ნიუსთან საუბრისას“.
შეგახსენებთ, რომ პრემიერ-მინისტრობის კანდიდატმა გიორგი კვირიკაშვილმა „ნაციონალური მოძრაობის“ ერთ-ერთ ლიდერს, ნიკა მელიას უცენზურო და შეურაცხმყოფელი სიტყვებით მიმართა.
დაპირისპირება გუშინ, ფრაქცია „ნაციონალური მოძრაობის“ სხდომაზე მოხდა, სადაც გიორგი კვირიკაშვილსა და მინისტრობის კანდიდატებს უსმენდნენ. კვირიკაშვილის მიერ მელიას მისამართით გაჟღერებულ უცენზურო მიმართვას, ოპოზიციონერი დეპუტატის მხრიდან საპასუხო რეპლიკები მოჰყვა. მელიამ კვირიკაშვილს „უნამუსო“ და „კორუმპირებული“ უწოდა.
