თბილისში, ავლაბარში, დმანისის 4 ნომერში, საცხოვრებელი კორპუსის, სადემონტაჟო სამუშაოები, უსაფრთხოების ნორმების დარღვევით მიმდინარეობს.
„გურია ნიუსის“ კორესპონდენტი თვითონ შეესწრო ფაქტს და შეძლო გადაეღო, თუ როგორ ისროდნენ მუშები მუშაობის პროცესში ქვებს, რაც შესაძლო იყო, ქვემოთ მომუშავე რომელიმე მუშას, რომელიც გაწმენდით სამუშაოებს აწარმოებენ მოხვედროდა და რომელიმე მათგანისთვის დაზიანება მიეყენებინა.
გარდა ამისა, ობიექტი ნახევრად შეღობილია, რაც ფეხით მოსიარულე ადამიანებისთვისაც საფრთხეს წარმოადგენს.
„ქუჩაზე გავლა ცოტა არ იყოს საშიშია, რადგან ნორმალურად არ არის შეღობილი ტერიტორია. ზემოდან გადმოყრილი აგურის ნამსხვრევები კი იფანტება, შეიძლება ვინმეს მოხვდეს და დააზიანოს“, _ ამბობს ერთ-ერთი ადგილობრივი მაცხოვრებელი „გურია ნიუსთან“ საუბრისას.
„საქმის მწარმოებელი ადგილზე არ იმყოფება. ის ობიექტზე 12 საათის მერე მოდის. აღნიშნულ სადემონტაჟო სამუშაოებს კი მერიის სამსახური ასრულებს“, _ ამბობს სადემონტაჟო სამუშაოზე დასაქმებული ერთ-ერთი მუშა.
ობიექტზე მომუშავე კომპანიის ერთ-ერთი წარმომადგენელი, ვინმე დავითი, კი „გურია ნიუსის“ დასმულმა კითხვამ გააღიზიანა და ინტრიგნობაში დაგვადანაშაულა.
სამწუხაროდ, კომპანიის სახელი, რომელიც დმანისის 4 ნომერში სადემონტაჟო სამუშაოებს აწარმოებს, არც ობიექტზეა მითითებული და მისი სახელის დადგენა ვერც ისანის გამგეობასთან და ვერც თბილისის მერიასთან დაკავშირების შედეგად ვერ შევძელით.
როგორც „გურია ნიუსს“ ისანის გამგეობაში განუცხადეს, გამგეობა აღნიშნულ დემონტაჟში არ მონაწილეობს და მათ მხოლოდ კომპანიას გაუწიეს რეკომენდაცია შესარჩევად.
„მოგვმართა კერძო მესაკუთრემ, რომ შენობა იყო ავარიული, საჭიროებდა დემონტაჟს და ვალდებული იყო, შეეტყობინებინა აღნიშნულის შესახებ. მესაკუთრეს ნებაა რას იზამს _ უნდა დაანგრევს, უნდა ააშენებს. ჩვენ მას გავუწიეთ კონსულტაცია, რომ რომელიმე კომპანიასთან ეთანამშრომლა. შევთავაზეთ კომპანია, რომელთანაც მოხდა გარიგება. სადემონტაჟო სამუშაოებს ასრულებს კერძო კომპანია, რაც შეეხება უსაფრთხოების ნორმების დარღვევას, ეს უკვე კომპანიის ვალდებულებაა, ამასთან გამგეობა არანაირ კავშირში არ არის“ _ განაცხადეს ისნის გამგეობაში
ვის ევალება სამშენებლო ობიექტზე უსაფრთხოების წესების დაცვა, ისჯება თუ არა კომპანია, რომელიც უსაფრთხოების ნორმებით გათვალისწინებულ წესებს არღვევს _ ამ საკითხზე „გურია ნიუსს“ ახალგაზრდა იურისტთა ასოციაციის იურისტი, გიორგი ანთაძე ესაუბრა.
,,მოქმედებს მთავრობის დადგენილება N62, რომელიც განსაზღვრავს მშენებლობის უსაფრთხოების წესებს. აღნიშნული წესის მიხედვით, აუცილებელია, არსებობდეს პასუხისმგებელი ინჟინერი, რომელიც პასუხს აგებს უსაფრთხოების წესების დაცვაზე. სამშენებლო წარმოების უბანი უნდა იყოს სათანადოდო შემოსაზღვრული, რათა თავიდან იყოს აცილებული ყოველგვარი ტრავმის დადგომის შესაძლებლობა. ობიექტი უნდა იყოს ასევე შემოღობილი, უნდა არსებობდეს სპეციალური დამცავი საფარი, რომელიც ფეხით მოსიარულეთა, უსაფრთხოებას და უსაფრთხო გადაადგილებას უზრუნველყოფს. თუ, კომპანია არღვევს აღნიშნულ უსაფრთხოების წესებს, ამ შემთხვევაში ქალაქ თბილისის მერია და ზედამხედველობის სამსახური ვალდებულია, დარღვევაზე მოახდინოს რეაგირება და კონკრეტულ სამშენებლო კომპანიას მისცეს რეკომენდაცია, რომ გამოასწოროს დარღვევა. ასევე უფლება მოსილია დააჯარიმოს კონკრეტული კომპანია, რომლისთვისაც არის განსაზღვრული სპეციალური ჯარიმები. ხოლო იმ შემთხვევაში, თუ უსაფრთხოების წესების დარღვევას მოყვება ადამიანის სიცოცხლის მოსპობა ან ჯანმრთელობის დაზიანება, უკვე წარმოადგენს სისხლის სამართლის კოდექსის დასჯად ქმედებას. კომპანიის ხელმძღვანელობა იქნება სისხლის სამართლებრივ პასუხისმგებლობაში მიცემული“, _ ამბობს ანთაძე.
მისივე თქმით, თბილისის მერიის ზედამხედველობის სამსახურია პასუხისმგებელი, რომ სამშენებლო კომპანიამ უსაფრთხოების წესები არ დაარღვიოს.
„ზედამხედველობის სამსახურის დებულების მიხედვით, ისინი არიან პასუხისმგებელი, რომ სამშენებლო კომპანიისგან არ მოხდეს არანაირი უსაფრთხოების წესების დარღვევა. თუ მოხდება დარღვევა, ვალდებულები არიან, დააჯარიმონ კონკრეტული კომპანია“, _ ამბობს ანთაძე.
როგორც „გურია ნიუსს“ თბილისის მერიის, ზედამხედველობის სამსახურში განუცხადეს, დმანისის 4 ნომერში მიმდინარე სადემონტაჟო სამუშაოებზე რეაგირება იმ შემთხვევაში მოხდება, თუ მათ რომელიმე მაცხოვრებელი მიმართავს.
,,თუ ვინმე მიმართავს ზედამხედველობის სამსახურს, ალბათ, მოხდება შესაბამისი რეაგირება. ზუსტად ვერ მოგახსენებთ კანონს. ყოველ შემთხვევაში, ეს არის კერძო საკუთრება და მერიას არ ეხება“, _ ამბობენ თბილისის მერიის ზედამხედველობის სამსახურში.
