18 დეკემბერი მნიშვნელოვანი თარიღია ჩრდილოეთ ამერიკაში მცხოვრები თითოეული მართლმადიდებელი ქართველისთვის, რადგან ეკლესია ამ დღეს აღასრულებს ხსენებას წმიდა საბა განწმედილისა, რომელიც არის ჩვენი ეპარქიის მმართველი მღვდელმთავრის მეუფე საბას (ინწკირველი) წმიდანის სახელობის დღე.
როცა სამღვდელმთავრო მსახურებისას მღვდლმთავარს მიაწვდიან ანთებულ სანთლებს, დიაკონი წარმოსთქვამს სახარებისეულ სიტყვებს: ,,ესრეთ ბრწყინავდი ნათელი შენი წინაშე კაცთა, რათა იხილონ საქმენი შენნი კეთილი და ადიდებდნენ მამასა შენსა ზეცათასა”. დიახ, ჩვენ მიგვაჩნია, რომ მეუფე საბა სწორედ ასეთი მღვდელმთავარია, რომლის ნათელი ბრწყინავს წინაშე კაცთა. ნათლით გაბრწყინვებული მისი საქმეები მეტყველებს ყოველივე ზემოთქმულზე. ჩვენ რომ დავდუმდეთ და დავფაროთ ყოველივე მისი ნამოღვაწარი და ნაკეთები საქმეები, შეუძლებელია დაიფაროს მისი ის ბუნებითი თვისებები, რომელიც სამაგალითოა ყოველი ჩვენგანისთვის. თავმდაბლობა, სიყვარული, სიმშვიდე და ეს ყოველივე იმდენად გადამდები ხასიათისაა, რომ შეუძლებელია მის გვერდით დგომითაც არ შეიგრძნო საღმრთო მადლის ეს ნიჭები. წმიდა იოანე ოქროპირი, თავის ერთ-ერთ ქადაგებაში ბრძანებს. წმიდანისათვის პატივისცემა ნიშნავს, მისდამი მიბაძვას. დიახ, მეუფე საბამ ნამდვილად განადიდა თავისი ღვაწლით და მიბაძა მისი მოსახელე წმიდანს. მიბაძა საქმით და მიემსგავსა მას. მეუფე საბა უპირველესად მაგალითია ჩვენთვის საღმრთო მსახურებებისადმი დამოკიდებულებით. როგორ გვკრებს და გვანახებს მისი მსახურება ქრისტეს მუდმივმყოფობას. მასზე ნამდვილად შეიძლება ითქვას, რომ იგი არის მწყემსი კეთილი, რომელიც თავს დებს თითოეული ცხვრისთვის მისი კეთილგონიერებითა და მაღალგანსწავლულობით. მეუფე საბა, ასევე, მაგალითია ჩვენთვის საეკლესიო სამართლის დაცვაში. იგი ჭეშმარიტი მღვდელმთავარია, რომლის ხელშიც სწორად და მართებულად, გადაუხრელად ხდება სჯულის კანონის დაცვა და აღსრულება. განა მოციქულიც ამასვე არ შეგვაგონებს: ,,კეთილ არს სჯული, უკეთუ ვინმემ წესიერად იპყრას იგი” დიახ, აი, ასე წესიერად და სამართლიანად უპყრია სჯულის ყოველი მცნება მის ყოვლადუსამღვდელოესობას.
მეუფე საბა, გაცხადებული მაგალითია მოყვასისადმი თავდადების და ამის არაერთი მაგალითია ეპარქიის ყოველ სამრევლოში. მრავალგზის მოუცია პირადი მაგალითით სწავლება იმის შესახებ, როგორ უნდა ვზრუნავდეთ ჩვენ ერთმანეთისთვის. გვინახავს, განსაცდელსა და ცოდვებისგან თავდასახსნელად, როგორ ზრუნავდა ადამიანებზე, როგორ აჭმევდა საკუთარი ხელით და უვლიდა მრავალ მათგანს. მეუფე საბა, მაგალითია შრომისა და თავდადების. ყოველდღიურ ცხოვრებაში ვისაც უნახავს, მან იცის მისი მუხლჩაუხრელი შრომის შესახებ და მრავალი კეთილი ნაყოფიც გვიხილავს ამ შრომისა. მეუფე საბაზეა აღსრულებული მაცხოვრის ის სახარებისეული სიტყვები, სადაც უფალი ამბობს _ სასუფეველი ცათა ყრმათათვისაა. იგი სწორედ ყრმაა ცოდვათა მიმართებებში, როგორც ყრმა, ისე უცხოა მისთვის ამ სოფლიური სიამებისადი ლტოლვა, იგი ბავშვური გულწრფელობით და მადლიერებითაა აღვსილი ყოველივესთვის, რასაც უფალი მოიღებს მასზე. ამას მოწმობს, მისი მოკრძალებული და უბრალო საცხოვრებელი გარემო. იგი ნამდვილად ერთი ჩვენგანია, მამა, მწყემსი და მასწავლებელი და არა ჩინოვნიკი, დირექტორი ან ადმინისტრაციული მმართველი. ყოველივე აღწერილი სრულად ვერ გამოხატავს მეუფე საბას ღვაწლსა და დამსახურებას. ამიტომ უკეთუ რაიმე დავაკელით, შეგვინდოს უფალმა. ხოლო ყოველივე რომ ჭეშმარიტებაა, ამას ყოველი მისი კეთილადმცნობელი დაგვიდასტურებს. მეუფე საბაზე დაუსრულებლად შეგვიძლია ვისაუბროთ, დაუსრულებლად, მოუკლებლად და მოუწყენლად. ასე მცირედით შემოვიფარგლებით მისი პიროვნული თვისებების გადმოსაცემად.
მეუფე საბა, ჩვენო ნუგეშო უცხოეთის ცის ქვეშ! მეუფე საბა, ჩვენი შვილების უკეთესო ხვალინდელო დღევ! მეუფე საბა, ჩვენო მამავ და მასწავლებელო, მრავალჟამიერ იყოს თქვენი სიცოცხლე! მრავალჟამიერ იყოს თქვენი ლოცვა-კურთხევა ჩვენზე და სრულიად თქვენს სამწყსოზე. მრავალჟამიერ იყოს თქვენი გამარჯვება ხილულ და უხილავ მტერზე უფლის სადიდებლად. კიდევ ერთხელ გილოცავთ თქვენი წმიდანის სახელობის დღეს და შევთხოვთ უფალს, ორთავ სოფელში არ მოგვაკლოს თქვენთან ერთად ჩვენი უფლის_იესო ქრისტეს დიდება და მისი დაუსრულებელი სუფევის ნეტარება. ამინ!
(R)
