ინდივიდუალური ხედვა, ანალიტიკური აზროვნება _ რა წერია ოზურგეთის მერის CV-ში

საჯარო ინფორმაციის მოუწოდებლობით კანონის დარღვევის და „გურია ნიუსის“ ვებ გვერდზე გამოქვეყნებული შესაბამისი სტატიის შემდეგ, ოზურგეთის მუნიციპალიტეტის მერიამ ჩვენ მიერ მოთხოვნილი საჯარო ინფორმაციის ნაწილი მოგვაწოდა.

უფრო კონკრეტულად კი მობილობის წესით დანიშნული საჯარო მოხელეების ჩამონათვალი თანამდებობების და ხელფასების მითითებით. მერიამ უარი გვითხრა დანიშნული პირების CV-ებისა და დიპლომების ასლების მოწოდებაზე:

„რაც შეეხება დანიშნული პირების CV-ების და დიპლომის ასლების მოწოდებას, გაცნობებთ, რომ „პერსონალურ მონაცემთა დაცვის შესახებ“ საქართველოს კანონის შესაბამისად, მოთხოვნილი მასალები შეიცავს პერსონალურ მონაცემებს და მონაცემთა სუბიექტის თანხმობის გარეშე მათი გაცემა შეუძლებელია”, _ აღნიშნულია წერილში, რომელსაც ხელს ოზურგეთის მუნიციპალიტეტის მერის მოადგილე ირაკლი სირაძე აწერს.

კითხვაზე, რატომ თქვეს უარი დანიშნულმა პირებმა CV-ების და დიპლომის ასლების მოწოდებაზე, ამის შესახებ არსებობს თუ არა შესაბამისი წერილობითი დოკუმენტი, რომელსაც კანონი ითვალისწინებს, პასუხი ვერ მივიღეთ. მუნიციპალიტეტის გამგეობის საზოგადოებასთან ურთიერთობის განყოფილების უფროსმა ეკატერინე მგელაძემ ვერც ის გვითხრა, კონკრეტულად რომელმა მოხელემ თქვა უარი, თუმცა, ამ კითხვების საპასუხოდ ოზურგეთის მუნიციპალიტეტის მერის და მისი მოადგილეების მხოლოდ CV-ები გამოგვიგზავნა.

ოზურგეთის მერს კონსტანტინე შარაშენიძეს საკმაოდ ვრცელი და განსხვავებული CV აქვს: მენეჯერული გამოცდილება; ანალიტიკური აზროვნება; საქმისადმი მაღალი პასუხისმგებლობა; დისციპლინა; კოლექტიური აზრის გათვალისწინების უნარი; ინდივიდუალური ხედვა, _ აღნიშნულია შარაშენიძის CV-ის გრაფაში, რომელიც ასეა დასათაურებული: „ჩვევები, ხასიათი“.

გრაფა _ „უნარები და კომპეტენცია“, ცარიელია.

რაც შეეხება განათლებას: 1990-1995 წლებში დაამთავრა თბილისის ბიზნესისა და მარკეტინგის უმაღლესი სკოლა/ინსტიტუტი/; საერთაშორისო ეკონომიკური ურთიერთობების ფაკულტეტი; მინიჭებული ხარისხი/კვალიფიკაცია: ეკონომისტი – მენეჯერი.

1990-1991 წლები _ საქართველოს მეცნიერებათა აკადემია; სამეცნიერო-კვლევითი და სასწავლო-საკონსულტაციო ცენტრი; მენეჯმენტის ფაკულტეტი; მინიჭებული ხარისხი/კვალიფიკაცია: მენეჯერი.

საკმაოდ ვრცელია სამუშაო გამოცდილების გრაფა, რომელსაც უცვლელად გთავაზობთ:

პერიოდი _ 2017 წლიდან დღემდე: დამსაქმებელი _ ოზურგეთის მუნიციპალიტეტის მერია, დაკავებული თანამდებობა _ ოზურგეთის მუნიციპალიტეტის მერი; მოვალეობები _ მუნიციპალიტეტის აღმასრულებელი საქმიანობის გახორციელება;

პერიოდი _ 2015-2017: დამსაქმებელი _ „ქართუ ჯგუფი“; დაკავებული თანამდებობა _ დასავლეთ საქართველოს მშენებლობების კოორდინატორი; მოვალეობები _ ჯგუფის საქმიანობების კოორდინაცია და კონტროლი.

პერიოდი _ 2012-2014: დამსაქმებელი_ ოზურგეთის მუნიციპალიტეტის გამგეობა; დაკავებული თანამდებობა _ ოზურგეთის მუნიციპალიტეტის გამგებელი; მოვალეობები _ მუნიციპალიტეტის აღმასრულებელი საქმიანობის გახორციელება.

პერიოდი _ 2008-2010: დამსაქმებელი _ სს “ვისოლ პეტროლიუმ ჯორჯია”; დაკავებული თანამდებობა  _ „ვისოლ პეტროლიუმ ჯორჯიას“ წარმომადგენელი ოზურგეთში _ მენეჯერი; მოვალეობები _ ავტოგასამართი სადგურის ორგანიზაციულ-ტექნიკური საქმიანობის ხელმძღვანელობა და კონტროლი.

პერიოდი _ 2002-2006: დამსაქმებელი _ გურიის აგრობიზნესცენტრი; დაკავებული თანამდებობა_ ფერმერულ ასოციაციებთან ურთიერთობის მენეჯერი; მოვალეობები _ ფერმერთა და მეწარმეთათვის საკონსულტაციო და საინფორმაციო უზრუნველყოფა.

პერიოდი _ 2000-2002: დამსაქმებელი _ საქართველოს ანტიმონოპოლიური სამსახური; დაკავებული თანამდებობა_  კონკურენციის განვითარების განყოფილების მთავარი სპეციალისტი; მოვალეობები _ გურიის რეგიონში კონკურენციის განვითარების ხელშეწყობა.

პერიოდი _ 1998-1999: დამსაქმებელი _ გურიის მხარეში საქართველოს პრეზიდენტის სახელმწიფო რწმუნებულის აპარატი; დაკავებული თანამდებობა _ წამყვანი მრჩეველი; მოვალეობები _ სახელმწიფო რწმუნებულის აპარატის მმართველობის ადგილობრივი ორგანოების კოორდინაციის სამსახურის საქმიანობის კონსულტირება და სამრჩევლო საქმიანობის განხორციელება;

პერიოდი _ 1997-1998: დამსაქმებელი _ გურიის მხარეში საქართველოს პრეზიდენტის სახელმწიფო რწმუნებულის აპარატი; დაკავებული თანამდებობა _ სამდივნოს უფროსი; მოვალეობები _ სამუშაო გეგმის მომზადება, მოქალაქეთა მიღება და წარმოშობილი პრობლემების გადაწყვეტა, ადმინისტრაციული სხდომების ორგანიზება და რეგიონის სოციალურ-ეკონომიკურ გეგმაზე მუშაობა.

პერიოდი _ 1996-1997: დამსაქმებელი _ სოფელ დვაბზუს გამგეობა; დაკავებული თანამდებობა_ გამგებელი; მოვალეობები _ სოფლის მოსახლეობის სოციალური პრობლემის მოგვარება, სოფლის წინაშე მდგარი სხვა პრობლემების გადაწყვეტა.

ამავე თემაზე: ოზურგეთის მერი ჟურნალისტს: “ე, ბიჯო, რა სასამართლო!”