პოლიტიკურ მეცნიერებათა დოქტორმა, დემოკრატიული აუდიტის ცენტრის ხელმძღვანელმა, „ქართული ოცნების“ ყოფილმა აღმასრულებელმა მდივანმა, არმაზ ახვლედიანმა ,,გურია ნიუსთან“ ,,ქართულ ოცნებაში“ არსებულ დაპირისპირებაზე ისაუბრა. მისი თქმით, მმართველ გუნდში დეპუტატებს შორის დავა, გავლენის სფეროების განმტკიცების მიზნით მიმდინარეობს. როგორც ახვლედიანი აცხადებს, იმ შემთხვევაში თუ ,,ქართული ოცნება“ გაჯანსაღების მიზნით ამ, ბოლო შანსს არ გამოიყენებს, ისე გაქრება, როგორც „მოქალაქეთა კავშირი“.
,,ქართულო ცნებაში“ ხდება ის, რაზეც წლების განმავლობაში ვსაუბრობდი. არადემოკრატიულმა სივრცემ და არაფორმალურმა მმართველობამ გამოიწვია ,,ოცნების“ ღრმა კრიზისი. ,,ქართულ ოცნებას“ არ აქვს მკაფიო იდეოლოგია, ქვეყნის განვითარების ხედვა.რა მნიშვნელობა აქვს გუნდში არსებულ ამ გაუგებარ დაპირისპირებას და კინკლაობას?! დავა ,,ქართული ოცნების“ დემოკრატიული რეფორმირების და პოლიტიკური სისტემის გაჯანსაღების საკითხებზე კი არაა ,არამედ იმაზე, ვინ იქნება უფრო გავლენიანი პოლიტიკურ სივრცეში, ვინ მოიპოვებს ბიძინა ივანიშვილის ნდობას და მხარდაჭერას.
,,ქართულ ოცნებაში“ არსებულ კრიზისზე საუბარი 2013 წლის გაზაფხულზე დავიწყე, მას შემდეგ საჯაროდ ვამბობ, რომ არადემოკრატიული გარემო განაპირობებს მმართველი ძალის გადაგვარებას. ასე რომ, ახლა, მეოცნებეთა განცხადებები დაგვიანებულად მეჩვენება, მით უფრო, როცა ამ დავის მიზანი არ არის ,,ქართული ოცნების“ ხალხის სამსახურში ჩაყენების მცდელობა.
,,ქართულ ოცნებას“ ერთადერთი, რამაც შეიძლება უშველოს,გადაუდებელი, ძირეული დემოკრატიული რეფორმირებაა, რომლის მიზანი პარტიის დასავლური ტიპის, დემოკრატიული შინაარსის მქონე ძალად გადაქცევა უნდა იყოს, რომელიც სანიმუშო გახდება სხვა პარტიებისთვის დღეს და მმართველი პოლიტიკური ძალებისთვის მომავალში.რაც შეეხება ბიძინა ივანიშვილს, ჩემთვის მნიშვნელობა არ აქვს, იქნება თუ არა ის საპრეზიდენტო კანდიდატი. თუ ბატონი ივანიშვილი მოახერხებს ,,ქართულ ოცნებაში“ მიმდინარე დაჭაობების პროცესი შეაჩერებას და აღიარებს, რომ ,,ოცნებამ“ დაუშვა არაერთი საბედისწერო შეცდომა, ამ შემთხვევაში, მმართველი გუნდი და მასთან ერთად, მთელი პოლიტიკური სივრცე, გაჯანსაღების გზაზე დადგება.
ამ ბოლო ორი ათეული წლის განმავლობაში ქვეყანა ტრიალებს პოლიტიკურად ჩაკეტილ წრეზე, რომლის გარღვევა ვერ ხერხდება, იმიტომ, რომ ერთი მხრივ, საზოგადოებაში არ არსებობს საკმარისი ნება, მეორე მხრივ, კი ავად თუ კარგად არჩეული პოლიტიკოსები, თავად არიან ამ წრის შემოქმედნიც და მძევალნიც. შესაბამისად, ჩაკეტილი წრის გარღვევა შეუძლებელი ხდება! წრე რომ გაირღვეს,აუცილებელია საზოგადოების გამოფხიზლება, ხელისუფლების გააზრებულად არჩევა და მუდმივი,გონივრული კონტროლი.
,,ქართული ოცნება“ თუ ამ ბოლო შანსის გამოყენებასაც ვერ შეძლებს, იმ ბედს გაიზიარებს, რაც წარსულში „მოქალაქეთა კავშირს“ და სხვა მმართველ პოლიტიკურ ძალებს ერგო. ის უკვალოდ გაქრება თანამედროვე საქართველოს პოლიტიკური სივრციდან“, _ განაცხადა ახვლედიანმა.
