ჩვენ ვხედავთ კულისებიდან ოლიგარქიულ გავლენას ეკონომიკაზე, ვხედავთ ზოგიერთი მოსამართლის გადაწყვეტილებას, რომლებიც, სავარაუდოდ, გარედანაა ნაკარნახევი და პოლიტიზირებულად გამოიყურება, _ ამის შესახებ ,,პენ-ბაიდენის ცენტრის“ მმართველმა დირექტორმა და რუსეთის, უკრაინის, ევრაზიისა და ბალკანეთის მიმართულებით, თავდაცვის მდივნის ყოფილმა მოადგილემ, მაიკლ კარპენტერმა ,,ამერიკის ხმის“ ქართულ რედაქციასთან მიცემულ ინტერვიუში განაცხადა.
კარპენტერმა, ასევე, განაცხადა, რომ ლოგიკურია, ამერიკელი გადასახადის გადამხდელების თანხები გამოკვეთილად იმ ქვეყნებზე გაიცეს, რომლებიც ,,სწორი მიმართულებით ვითარდებიან“.
,,ჩვენ ვნახეთ ზოგიერთი შემაშფოთებელი ტენდეცია და კონგრესის წევრებმა ეს ნახეს, როგორც – ყველა სხვამ. არ ვიტყოდი, რომ ეს ოპოზიციური პარტიების თუ ბიზნეს ინტერესების გამტარებელი ლობისტების საქმიანობასთანაა დაკავშირებული. ვფიქრობ, ჩვენ ვხედავთ კულისებიდან ოლიგარქიულ გავლენას ეკონომიკაზე. ვხედავთ ზოგიერთი მოსამართლის გადაწვეტილებას, რომლებიც, სავარაუდოდ, გარედანაა ნაკარნახევი და პოლიტიზებულად გამოიყურება. ასევე, ვხედავთ ზოგჯერ ზედმეტად მკაცრ რეაგირებას სამოქალაქო პროტესტზე“, _ აცხადებს კარპენტერი და დასძენს, რომ 15%-ის შეკავება მართალია, არსებულ შეშფოთებას უკავშირდება, მაგრამ არ ნიშნავს, რომ კანონმდებლები საქართველოს მიმართ პესიმისტურად არიან განწყობილნი.
,,ვფიქრობ, მთლიანობაში, თუკი საქართველოს მხარდამჭერთა ჯგუფის წევრებს თუ სხვა კონგრესმენებს გამოიკითხავთ, მათი უმეტესობა საქართველოს კვლავ დემოკრატიად მიიჩნევს, მათ აქვთ ოპტიმიზმის მიზეზი, რომ არჩევნები თავისუფლად და სამართლიანად ჩატარდება. ვიმედოვნებ, რომ ქვეყანა წინ წავა ამ რთულ დროსაც კი რუსეთთან და მის აგრესიულ ქმედებებთან დაკავშირებული გამოწვევების, ისევე როგორც კორონავირუსის პანდემიისა თუ ეკონომიკური რეცესიის პირობებში“, _ აცხადებს კარპენტერი.
ანალიტიკოსის თქმით, ამერიკისა და საქართველოს მრავალწლიანი სტრატეგიული პარტნიორობა საერთო ღირებულებებს ეფუძნება და ქვეყანა ამ ორმხრივი თანამშრომლობით წლების განმავლობაში მნიშვნელოვან დახმარებას იღებდა სწორედ იმიტომ, რომ იმედს აჩენდა და დემოკრატიის განვითარების კუთხით გამუდმებით წინ მიდიოდა.
,,ჩვენ გვინდა ვნახოთ, რომ ეს გრძელდება. თუკი ეს ასე მოხდება, ურთიერთობაც განაგრძობს აყვავებას, ვიმედოვნებ შევძლებთ პარტნიორობის განაგრძობს აყვავებას. ვიმედოვნებ შევძლებთ პარტნიორობის გაღრმავებას, განსაკუთრებით კი ეკონომიკური კუთხით, სადაც კვლავ გრძელი გზაა გვაქვს“, _ ამბობს ანალიტიკოსი და იმედოვნებს, რომ სენატის მიერ დამტკიცებულ და შემდეგ უკვე კანონადქცეულ დოკუმენტში ახლა არსებული ფორმულირება შენარჩუნდება.
როგორც ანალიტიკოსი აღნიშნავს, სასამართლო რეფორმის, მედიის თავისუფლების და ეკონომიკის გამჭირვალობის კუთხით ქვეყანაზე დაკვირვება გრძელდება.
უნდა ვნახოთ, რომ ის საკითხები, რომელზეც სამოქალაქო საზოგადოება ან ოპოზიცია წუხს, არის აღქმული და მათ გამოსასწორებლად არის ძალისხმევა და რეფორმები“, _ აღნიშნა კარპენტერმა.
ანალიტიკოსი მაიკ კარპენტერი მიიჩნევს, რომ საკონსტიტუციო ცვლილებების მიღების შემდეგ პოლიტიკური მდგომარეობა უკეთესია, ვიდრე მანამდე იყო, მაგრამ კვლავ ღიად რჩება გიორგი რურუას გათავისუფლების საკითხი, თუმცა, მთლიანობაში, დარწმუნებულია, რომ კონგრესი პოზიტიურ ცვლილებებს ასახავს.
ის ასევე, აღნიშნავს, რომ ვაშინგტონიდან საქართველოში დემოკრატიულ პროცესებს წლებია აკვირდებიან, ახლა კი უმთავრესია არჩევნების თავისუფალ და სამართლიან გარემოში ჩატარებაა, დემოკრატიულ გზაზე დარჩენა და იმის ჩვენება, რომ ქვეყნის მომავალი დასავლეთშია.
როგორც ცნობილია, საქართველომ აშშ-ისგან 28 წლის განმავლობაში (1992 წლიდან 2020 წლის ჩათვლით) ფინანსური დახმარების სახით 4 348 400 00$ მიიღო.
ცნობისთვის, 224 ხმით 189 ხმის წინააღმდეგ _ აშშ-ის წარმომადგენელთა პალატამ 2021 წლის საგარეო ფინანსური დახმარების შესახებ კანონპროექტი დაამტკიცა. საქართველოსთვის დახმარების სახით 132 025 000 აშშ დოლარია გამოყოფილი, თუმცა, წინა წლებისგან განსხვავებით, ამჯერად ერთი დათქმითა და წინაპირობით“ საქართველოს ცენტრალური ხელისუფლების პირდაპირი დახმარებისთვის გამოყოფილი თანხის 15% მხოლოდ იმ შემთხვევაში გაიცემა, თუკი სახელმწიფო დეპარტამენტის შეფასებით, დადასტურდება, რომ ქვეყნის მთავრობა ეფექტურ ნაბიჯებს დგამს ქვეყანაში დემოკრატიული ინსტიტუტების გასაძლიერებლად.
