დღეს პარტიამ „ჩვენი საქართველო-სოლიდარობის ალიანსი“ გურიის მაჟორიტარობის კანდიდატად წარადგინა აგრარულ მეცნიერებათა დოქტორი, ნინო შეწირული-გობრონიძე.
როგორც პარტიაში აღნიშნეს, ქალბატონი ნინო პირველი ქალი-კანდიდატია, რომელიც „ჩვენი საქართველო-სოლიდარობის ალიანსის” სახელით იბრძოლებს მაჟორიტარობისათვის.
გურიის მაჟორიტარობის კანდიდატის წარდგენას ესწრებოდნენ პარტიის თავმჯდომარე ბექა ნაცვლიშვილი, გენერალური მდივანი მარიამ ჯაში და პარტიის პოლიტსაბჭოს თავმჯდომარე ზვიად კვაჭანტირაძე.
პარტიის თავმჯდომარის შეფასებით ნინო შეწირული-გობრონიძე კარგად იცნობს გურიის პრობლემებს ოზურგეთის, ლანჩხუთისა და ჩოხატაურის მასშტაბით, განსაკუთრებით სოფლის მეურნეობის მიმართულებით.
„ნინოს ხედვა არის გურიაში და ქვეყნის მასშტაბით სიღარიბის დაძლევა სწორედ სოფლის მეურნეობის გაძლიერებით. ნინოსთან ერთად ჩვენ არამხოლოდ გავაძლიერებთ აგრარულ სფეროს გურიაში, არამედ შევქმნით უფრო მაღალი ხარისხის სამედიცინო მომსახურებას მაღალკვალიფიციური კადრების მოზიდვით რეგიონში, შევქმნით უკეთეს და უსაფრთხო გარემოს საბავშვო ბაღებსა და სკოლებში, უფრო ხელმისაწვდომს გავხდით საზოგადოებრივ ტრანსპორტს და განვახორციელებთ გურიის სამივე რაიონისათვის მნიშვნელოვან სხვა პროექტებს – აცხადებს ბექა ნაცვლიშვილი.
პარტიის გენერალური მდივანი მარიამ ჯაში მიიჩნევს, რომ ნინო შეწირული-გობრონიძე გამორჩეულად ძლიერი კანდიდატია.
„გურიის მაჟორიტარად ჩვენ ვაყენებთ გამორჩეულად ძლიერ ქალ კანდიდატს, რომელიც ღირსეულ კონკურენციას გაუწევს ყველა სხვა პოლიტიკური პარტიის მიერ წარდგენილ ნომინანტებს. ჩვენ დარწმუნებული ვართ ნინოს წარმატებაში, რადგან მას აქვს პროფესიული ცოდნა, გამოცდილება და გულწრფელი სურვილი, რომ გურიაში უკეთესობისაკენ შეიცვალოს თითოეული ოჯახის სოციალურ-ეკონომიკური მდგომარეობა და ახალგაზრდებს უკეთესი გარემო შეექმნათ სწავლისა და მომავალი წარმატებებისათვის“ – განაცხადა ჯაშმა.
პარტიის პოლიტსაბჭოს თავმჯდომარის, ზვიად კვაჭანტირაძის განცხადებით, ნინო შეწირული-გობრონიძის გამარჯვების შემთხვევაში ჩოხატაურის, ლანჩხუთისა და ოზურგეთის მასშტაბით განხორცილდეს ეფექტური რეფორმები და პროგრამები გახორციელდება.
„როგორც ოზურგეთის ყოფილი მაჟორიტარი დეპუტატი, ჩვენი პარტიის სახელით დღეს გურიაში სიამაყით ვასახელებთ ნინო შეწირული-გობრონიძის კანდიდატურას. საკუთარი პროფესიული საქმიანობით ნინომ არამხოლოდ შეისწავლა გურიის პრობლემები, არამედ მას აქვს კონკრეტული გეგმა, თუ როგორ შეიძლება ჩოხატაურის, ლანჩხუთისა და ოზურგეთის მასშტაბით განხორცილდეს ეფექტური რეფორმები და პროგრამები. ნინოსთან ერთად „ჩვენი საქართველო-სოლიდარობის ალიანსი“ გურიაში იბრძოლებს გამარჯვებისათვის“ – განაცხადა ზვიად კვაჭანტირაძემ.
ცნობისთვის, ნინო შეწირული-გობრონიძე არის სოფლის მეურნეობისა და სურსათის ტექნოლოგიების დოქტორი 12-წლიანი გამოცდილებით აგრარულ სფეროში. ქალბატონმა ნინომ თბილისში, აგრარულ უნივერსიტეტში აკადემიური ხარისხების მოპოვების შემდეგ პროფესიული საქმიანობა განაგრძო გურიაში. 6 წელია ნინო მეუღლესთან, წარმატებულ სპორტსმენ ბიძინა გობრონიძესთან და შვილთან გიგასთან ერთად ოზურგეთში ცხოვრობს და ემსახურება სოფლის მეურნეობის საკითხებს რეგიონში. 4 წლის მანძილზე ნინო შეწირული-გობრონიძე იყო სოფლის მეურნეობის სააგენტოს უფროსი ლანჩხუთის, ჩოხატაურისა და ოზურგეთის მასშტაბით, რომლის დროსაც განხორციელდა მასშტაბური სასოფლო-სამეურნეო პროექტები.
