დღეს, როცა ასე დიდი მოთხოვნააა მსოფლიოში ღია სივრცეების მოწყობაზე, ასევე იწყება რეგიონების განახლების პროექტი, რის შესახებაც პრემიერ-მინისტრმა გააკეთა განცხადება, საინტერესოა, რა ხდება ოზურგეთში ამ კუთხით.
მით უფრო, ცნობილია, რომ სამი წილის წინ მოხდა საპროექტო წინადადებების წარდგენა, ოზურგეთის კულტურის დასვენების პარკის, ასევე თეატრის მიმდებარე პარკის და 9 აპრილის სკვერის მოსაწყობად, რაც შემდეგ ნაწილობრივ დამუხრუჭდა და ამის შესახებ ჩვენ ვწერდით.
როგორც ოზურგეთის კულტურის ცენტრის განყოფილების უფროსი ინგა დუმბაძე გვეუბნება, კერ კიდევ სამი წილის წინ, მუნიციპალური განვითარების ფონდს ჰქონდა იდეა, ოზურგეთში აღმაშენებლის ქუჩის ე. წ. სიღნაღიზაცია განეხორციელებინა.
_მაშინ სოფელ ბახვში მყოფ ინფრასტრუქტურის მინისტრს, მაია ცქიტიშვილს შევხვდი და გავაცანი ახალგაზრდების მოთხოვნა, რომ პირველ რიგში ქალაქში უნდა მოწესრიგებულიყო ღია სივრცეები. ქალბატონი მაიასაგან საუბრის დამთავრებისთანავე მივიღე თანხმობა და დაგვევალა საპროექტო წინადადებების შეგროვება, რომელშიც აქტიურად ჩაერთო კულტურის ცენტრის ხელმძღვანელი, თამარ ნადირიძე და პარკის ადმინისტრაცია. ახალგაზრდული განყოფილების ჩართულობით მოხდა ხელმოწერების შეგროვება და ინფორმაცია მიეწოდა მაჟორიტარი დეპუტატის ბიუროს. გახსოვთ, ალბათ, ბატონი არჩილ თალაკვაძე, საზოგადოების დიდი ინტერესიდან გამომდინარე , გახდა ამ პროექტის ლობი ცენტრალურ ხელისუფლებაში. გამოცხადდა ტენდერი პროექტის შესყიდვაზე, რომლის ჯამური ღირებულება არის 3 მილიონი ლარი. თუმცა, პანდემიიდან გამომდინარე, ვერ მოხერხდა სამივე პარკის ერთდროული რეაბილიტირება. ამიტომ პროექტი დაიყო ეტაპებად და ამჟამად დაიწყო თეატრის გარე სივრცის კეთილმოწყობა. ვიმედოვნებთ, რომ მალე მოხდება 9 აპრილის და კულტურისა და დასვენების პარკის განახლება, რომელსაც სულმოუთქმელად ელიან ოზურგეთელები, _ გვითხრა ქალბატონმა ინგამ და განმარტა, რომ მოწესრიგებული გარე სივრცეები განსაზღვრავს ქალაქის განვითარების ხარისხს.
მან ასევე გვითხრა მეორე დიდი პროექტის შესახებ, რომელზეც ახლახან დაიწყეს მუშაობა.
_ეს არის ონლაინ ტიპის ღონისძიებები საქართველოს საელჩოებისთვის და საზღვარგარეთ არსებული საკვირაო სკოლებისთვის. პროექტში ჩაერთვებიან სახელოვნებო სფეროს წარმომადგენლები, ჩვენი კუთხის ისტორიის მოყვარულები, ტურისტულ სფეროში დასაქმებულები და სხვა. კულტურის, ტურისტული მარშრუტების, ინტელექტუალური პოტენციალის წარმოჩენა, ქართველი დიპლომატების ჩართულობითა და მხარდაჭერით ძალიან მნიშვნელოვანია. ვფიქრობ, რომ პროექტი
ხელს შეუწყობს ჩვენი რეგიონის კულტურის პროპაგანდას და პოპულარიზაციას საზღვრებს გარეთ. მით უფრო, როცა პანდემიის პირობებში, ეს პროექტები რეგიონის კულტურის პროპაგანდაა საზღვარგარეთ და ამ მხრივაც ორმაგად მნიშვნელოვანია,– გვითხრა ინგა დუმბაძემ.
„გურია ნიუსი“ მალე ვრცლად უამბობს ჩვენს დაინტერესებულ მკითხველებს, განსაკუთრებით კი ახალგაზრდა მკითხველებს, ამ თემის ირგვლივ არსებულ პრობლემებსა თუ მზარდ მიღწევებზე.
