გასული წლის 28 დეკემბერს, ოზურგეთის მუნიციპალიტეტის საკრებულოს რიგგარეშე სხდომა შედგა. ჩვენ ამ სხდომის შესახებ ნიუსები უკვე შემოგთავაზეთ, თუმცა, იგი იმდენად საინტერესოდ წარიმართა, გადავწყვიტეთ, დაგვიანებით, თუმცა მაინც მოგვეყოლა თქვენთვის, როგორ არ იშურებდნენ დეპუტატები ერთმანეთის მისამართით “ტკბილ სიტყვებს” წინასაახალწლოდ.
სხდომის დღის წესრიგში მუნიციპალიტეტის ბიუჯეტის დამტკიცება იყო.
საკრებულოს თავმჯდომარის დავით დარჩიას მიერ, დღის წესრიგის წაკითხვის შემდეგ, სიტყვით გამოსვლა ითხოვა “ნაციონალმა” დეპუტატმა დავით მჟავანაძემ.
_ ბატონო დავით, ერთ წუთში ჩავეტევი, გთხოვთ, მომცეთ სიტყვა. ეს ეხება ჩვენს საკრებულოს, მუნიციპალიტეტს, ჩვენს მომავალ მუშაობას. წინააღმდეგ შემთხვევაში, მომიწევს რეგლამენტის დარღვევა, _ მიმართა დავით მჟავანაძემ საკრებულოს თავმჯდომარეს.
დავით დარჩიამ უპასუხა, რომ ახლა უმთავრესის, ბიუჯეტის პროექტის მოსმენა უნდა შემდგარიყო, შემდეგ კი ექნებოდათ კითხვების დასმის საშუალება, დებატებში მონაწილეობის უფლებაც და გააფრთხილა მჟავანაძე, საკრებულოს დღის წესრიგის რეჟიმს დამორჩილებოდა.
_ გამაფრთხილე, კარგი, გამაფრთხილე… მაშინ მომიწევს რეგლამენტის დარღვევა. მინდა, გამოვეხმაურო ოზურგეთის საკრებულოს 3 დეკემბრის გადაწყვეტილებას (აღნიშნულ სხდომაზე გამოიძახეს პოლიცია და მჟავანაძე ფოთის იზოლატორში აღმოჩნდა. ავტ.), როცა ადგილი არ ჰქონდა არც სისხლის სამართლის დანაშაულის ნიშნებს, არც ადმინისტრაციულ დარღვევას. საკრებულოს თავმჯდომარის მოვალეობის შემსრულებელმა, ლავრენტი ბიგვავამ შენობაში პოლიციის შემადგენლობა გამოიძახა და შემდეგ მისცა ცრუ ჩვენება, საკრებულოს წევრის წინააღმდეგ. ამის შემდეგ მე მომიხდა ფოთის იზოლატორში ერთი ღამის გათევა. ეს თქვენთვის შეიძლება პრობლემა არ იყოს, მაგრამ პრობლემა არის ის, რომ საფრთხის ქვეშაა ახალგაზრდა თვითმმართველობა და დემოკრატია. რამდენიც უნდა იუაროთ, აქ არის სასამართლოს გადაწყვეტილება, რომელმაც უარყო ეს ყველაფერი, _ ამ სიტყვებით და ხელში სასამართლოს გადაწყვეტილების ფურცლით, მჟავანაძე მივიდა ლავრენტი ბიგვავასთან, რომელიც დავით დარჩიას გვერდით იჯდა.
_ ახლა ნუ მიმაღებინებთ ზომებს, _ ხმას აუწია დავით დარჩიამ.
_ ცრუ ჩვენება თუ დაგჭირდეთ, აგერ არის ბატონი ლავრენტი. შეიქმნა პრეცედენტი, რომ ოზურგეთის საკრებულოდან გააძევეს წევრი, რომლის სიტყვაც არ მოეწონათ. ვიმეორებ _ ამით საფრთხე ექმნება ახალგაზრდა თვითმმართველობას… თქვენ შეგიძლიათ, ყველაფერი დამაბრალოთ! _ არ ცხრებოდა მჟავანაძე.
პასუხად დარბაზში “ქართული ოცნების” დეპუტატების ხმა ისმოდა: “დაჯექი ახლა, ხელს ნუ უშლი საკრებულოს მუშაობას”, “გვაცალე მუშაობა”, “კმარა მასხარაობა”…
საკრებულოს თავმჯდომარის პირველ მოადგილეს, ლავრენტი ბიგვავას მჟავანაძისთვის და “ნაციონალი” დეპუტატების რეპლიკებზე პასუხი არ გაუცია, გარდა ერთი შემთხვევისა, როცა “ნაციონალმა” დეპუტატმა შალვა თავდიშვილმა მისი მისამართით თქვა: “შენ დეიღუპე, ლავრენტი, საცხა!” ბიგვავამ პასუხად მიაგება: “დეიღუპე და გადაშენდი შენ!”
საკრებულოს სხდომის ასეთ “შესავლის” შემდეგ, 2022 წლის ბიუჯეტის პრიორიტეტებზე დავით დარჩიამ ისაუბრა:
_ ოზურგეთის მუნიციპალიტეტის დასაგეგმი 2022 წლის ბიუჯეტის შესწორებული პროექტით ბიუჯეტში შემოსულობები განსაზღვრულია 27 მილიონ 814 ათასი ლარით და იგი თითქმის 2,7 მილიონი ლარით მეტია 2021 წლის ბიუჯეტის შესაბამის პერიოდში დაგეგმილ სიდიდესთან შედარებით.
აღნიშნული ნიშნავს შესადარ პერიოდში საბიუჯეტო ასიგნების ზრდას 10,8 პროცენტული პუნქტით. პრიორიტეტებია: ინფრასტრუქტურის განვითარება, დასუფთავება და გარემოს დაცვა, განათლება, კულტურა, ახალგაზრდობა, სპორტი და რელიგია, მოსახლეობის ჯანმრთელობის დაცვა და სოცუზრუნველყოფა, ადგილობრივი ეკონომიკური განვითარების ხელშეწყობა. ბიუჯეტი ფორმირებულია საკუთარი შემოსულობების ხარჯზე. სახელმწიფოს ბიუჯეტის ფონდებიდან გამოყოფილი ტრანსფერები ბიუჯეტის პროექტში არ ფიქსირდება. შესაბამისად, ბიუჯეტი ასახავს იმ პოტენციალს, რომელიც რეალურად გააჩნია და განკარგავს ოზურგეთის მუნიციპალიტეტი, _ აღნიშნა დავით დარჩიამ და შემდეგ სიტყვა ოზურგეთის მუნიციპალიტეტის მერს, ავთანდილ თალაკვაძეს გადასცა:
_ თანამოქალაქეებს მინდა ვუთხრა, რომ ოზურგეთის ბიუჯეტი 2.7 მილიონი ლარით გაიზარდა და 27.814 მილიონ ლარს შეადგენს. იგი განვითარებაზეა ორიენტირებული და ჩვენს მუნიციპალიტეტში არსებული სოციალური და ეკონომიკური ამოცანების გადაჭრისკენ იქნება მიმართული. ასევე, გვაქვს აქტიური კომუნიკაცია საქართველოს მთავრობასთან, რათა დამატებითი დაფინანსების მობილიზება მოხდეს სახელმწიფო და დონორული ფონდებიდან. ვიმუშავებთ ახალ საინვესტიციო პროექტებზეც, რომ ჩვენი მუნიციპალიტეტის ეკონომიკური აქტივები საზოგადოების კეთილდღეობას მოხმარდეს. ჯანმრთელობის და სოციალური დაცვის მიმართულებით, საქართველოს სახელმწიფო ბიუჯეტში გათვალისწინებულია 30% -ზე მეტი (6.4 მილიარდი ლარი). ოზურგეთის მუნიციპალური ბიუჯეტიდან ამ მიზნებისთვის 2022 წელს, ვგეგმავთ დამატებით 7%-ის დახარჯვას, რაც 1.86 მილიონ ლარს შეადგენს; მუნიციპალური ბიუჯეტის 23% ინფრასტრუქტურის განახლებაზე დაიხარჯება. 19% დაიხარჯება განათლების სფეროში. კულტურის, სპორტის და ახალგაზრდობის მიმართულებით ბიუჯეტის 18% დაიხარჯება. გარემოსდაცვით საკითხებს და ეკოლოგიას კი ბიუჯეტის 10% მოხმარდება. იზრდება საბავშვო ბაღების პერსონალის ხელფასები. გათვალისწინებულია ხარჯები მოქალაქეთა საცხოვრისი პირობების გაუმჯობესების და მრავალსართულიანი კორპუსების რეაბილიტაციისთვის. ბიუჯეტში გამოყოფილია რესურსები მუნიციპალური სერვისების დაფინანსებისთვის.
ჩემთვის, როგორც მერისთვის, მნიშვნელოვანია მუნიციპალიტეტის საკრებულოსთან საქმიანი, შედეგზე ორიენტირებული დისკუსია, რათა, ერთობლივად ვუპასუხოთ იმ
ოზურგეთის მუნიციპალიტეტის ბიუჯეტი 27 მილიონ 814 ათასი ლარით განისაზღვრა, _ თქვა ავთანდილ თალაკვაძემ.
ფინანსური დოკუმენტი საფინანსო სამსახურის განყოფილების გამგემ, პავლე ჭყონიამ წარმოადგინა.
საკრებულოს სხდომაზე, წლის ბიუჯეტის განხილვის დროს, ხმაური პირველი პირების გამოსვლის შემდეგ, კვლავ გაგრძელდა.
“ნაციონალმა” დეპუტატმა ბესო ქათამაძემ ოზურგეთის მუნიციპალიტეტის მერს, ავთანდილ თალაკვაძეს კითხვა დაუსვა:
_ ოზურგეთის მუნიციპალიტეტის მერიის ფინანსური მომსახურება წელიწადში, თუ იცით რამდენია?
მან იგივე კითხვით მიმართა საფინანსო სამსახურის უფროსს გია მამაკაიშვილს.
როცა პასუხი ვერ მიიღო, თავად დაიწყო საუბარი:
_ წელიწადში მუნიციპალიტეტის მომსახურება ჯდება ერთი მილიონ 400 ათასი ლარი. ახლა ხელფასებს ზრდით ნახევარი მილიონით. ანუ წელიწადში მხოლოდ თქვენ გჭირდებათ 24 მილიონი. 80 პროცენტი ბიუჯეტიდან თქვენი ხარჯია. ამომრჩევლებს, ხმა მოგვეცითო, რომ თხოვდით, ეს უთხარით, ასე ვიზამთო?
“ნაციონალმა” დეპუტატებმა ბიუჯეტში ნახევარი მილიონით სახელფასო ფონდის გაზრდა, სოციალური პროგრამების დაფინანსების ფონზე, გადამეტებულად მიიჩნიეს.
შალვა თავდიშვილმა სხვა მიმართულებით დასვა კითხვა:
_ ინტერნეტი ჩართეთ, ბავშვებს ინტერნეტი არ აქვთ. კი, ბატონო, თქვენ, _ მიმართა მერის მოადგილეს გიორგი ღურჯუმელიძეს, _ გაასწორებინეთ… მაგრამ ვინ იყო ის ხალხი, ინტერნეტი რომ გაჰყავდათ და 50 მილიონიდან რომ 30 მილიონი ჯიბეში ჩაიდეს? სამთავრობო ხალხი იყო, “ქართული ოცნების” ხალხი იყო. ჩვენ კი ინტერნეტი არ გვაქვს.
_ რაფერ დათვალე ასე, _ ჰკითხა გიორგი ღურჯუმელიძემ.
_ რაფერ და ჭრელად, ძმაო! მაგის მეტს რას დაგითვლით… ფულების დარიგება და სიცრუე გაკლიათ თქვენ? ჰკითხეთ ერთი ბატონ ავთოს, რამდენი ათასის “ბაკი” მოიტანა ხალხის მოსასყიდად ძიმითში, თირის უბანში, ბაბასკურის უბანში?… სასამართლოში იუარეთ და გაგივიდათ, არა? _ იხსენებდა საარჩევნო ამბებს და ცხარობდა თავდიშვილი.
ოპოზიციის წარმომადგენელთა მტკიცებით, საკრებულოს სხდომაზე არაერთხელ გაისმა, რომ ბიუჯეტში მკაფიოდ არაა ის პრიორიტეტები გათვლილი, რაც ჩვენს მოსახლეობას სინამდვილეში აწუხებს.
ბესო ქათამაძემ არაერთხელ დასვა კითხვა, რატომ ზრდიან საკუთარ ხელფასებს და ამ დროს საბავშვო ბაღების თუ მეეზოვეთა მიზერული ხელფასების მცირედით მომატება რატომ ჰგონიათ წინ გადადგმული ნაბიჯი.
_ სასაცილო ხარ შენ, მასეთ განცხადებებს რომ აკეთებ, _ ქათამაძეს მიმართა გიორგი ღურჯუმელიძემ.
_ მარტო სასაცილო კი არა, ციხეში ხარ გასაშვები, იმდენი უბედურება გაქ გაკეთებული. დაჯექი მაქ და ნუ უზრდელობ, პატივი ეცი დეპუტატებს და საკრებულოს რეგლამენტს. უყურე ამ თავხედს! ბიჭო, ვინ გეკითხება შენ, მერის მოადგილეს საკრებულოს რეგლამენტს? დაჯექი მანდ! _ ხმას კიდევ უფრო აუწია ქათამაძემ.
ხმაური საკრებულოზე არაერთხელ გადაიზარდა პიროვნულ შეურაცხყოფაში.
_ დღეს პირველი შეხვედრაა და არ მინდოდა ასე დამეწყო, მაგრამ არ გრცხვენიათ ახლა, მაქ რომ ზიხართ და მერს რომ გიწოდებენ? რომ დააშინეთ, ამდენი ფული რომ იხადეთ ხალხის მოსასყიდად, გზაჯვარედინზე, ოთხივე მხარეს რომ ისხდნენ თქვენი კოორდინატორები, 11 წლის ბავშვები რომ გამოიყენეთ ბინძურად წინასაარჩევნოდ, ამ ყველაფრის არ გრცხვენიათ?! _ ასე მიმართა “ნაციონალმა” დეპუტატმა, გოჩა შარაშენიძემ მერს, ავთანდილ თალაკვაძეს.
“ოცნების” დეპუტატებმა უზრდელი და ცრუ უწოდეს შარაშენიძეს.
_ შენი შვილის საკითხით რომ აპელირებ, შენს შვილს ჰკითხე, რატომ გააქციე სახლიდან. მართლა ყველანაირ ზღვარს გასული კაცი ხარ, _ წინა რიგებიდან დაუძახა მას “ქართული ოცნების” ფრაქციის თავმჯდომარემ მარიკა ჩხიკვიშვილმა.
_ ვინ ახსენა შვილი? 700 ათასი კაცი გააქციეთ. უზრდელი დედაშენს და მამაშენს უძახე, სახლში რომ მიხვალ. მამის ტოლ კაცს მეძახი. მართლა უზრდელო ქალო! პირადულზე თუ წავიდა, ისეთები მაქვს სათქმელი და წამოსაძახებელი… _ იყვირა შარაშენიძემ
_ ჩემი შვილი გამიქციეთო, ეს თქვა. ამიტომ გავეცი პასუხი, თორემ არ ვაპირებდი, _ თქვა ჩხიკვიშვილმა.
ხმაურის და ურთიერთშეურაცხყოფის მიუხედავად, ბიუჯეტის განხილვა მაინც გაგრძელდა კითხვა-პასუხის რეჟიმში. კომისიების და ფრაქციების წარმოდგენილი დასკვნების შემდეგ, კენჭი უყარეს ბიუჯეტის პროექტს.
საბოლოოდ, ოზურგეთის მუნიციპალიტეტის 2022 წლის ბიუჯეტი 27 მილიონ 814 ათასი ლარით განისაზღვრა და 28 ხმით დაამტკიცეს.
ბიუჯეტის დამტკიცების წინააღმდეგ წავიდნენ და მხარი არ დაუჭირეს ფრაქცია “ერთიანი ნაციონალური მოძრაობის” და გახარიას პარტიის ფრაქციის “ოზურგეთი საქართველოსთვის” წევრებმა.
[sexy_author_bio]
